2 Samuel 17 - Bible in Tzeltal Bachajón

Bin la yal Husai soc Ahitofel

¹ Te Ahitofel hich la yalbe te Absalón: Ac'awon ta stsahel j'ohlil scha'pic (12,000) winiquetic, ya jnuts bahel te David yo'tic ta ahc'abal.

² Ya jlumtay c'alal luhbenix soc lajemix yip a. Ya ca'be xiwel, soc spisil te pueblo sjoquinej ya me xloq'uic ta ahnel. Ha nax ya jmil te ajwalil,

³ hich ya cac' suhtuc tal ta atojol spisil te pueblo, como jtuhl nax te mach'a yac alehbe scuxlejal. Hich lamal q'uinal ya xc'oht yu'un te pueblohe, xchi.

⁴ Te bin la yal te Ahitofel, lec la ya'iy te Absalón, soc spisil te mamaletic ta Israel.

⁵ La yal te Absalón: Ic'a tal te Husai te arquita-winic scuenta yu'un ya ca'iytic te bin ya yal, xchi.

⁶ C'alal c'oht te Husai ta stojol te Absalón, hich halbot yu'un: Hich la yal te Ahitofel. ¿Ya bal jpastic te bin la yal o ma'uc? Hala ca'iycotic, xchi.

⁷ La sjac' te Husai: Ma ba lec te bin la yal yo'tic te Ahitofel, xchi.

⁸ Soc la yal xan te Husai: Ha'at ana'oj te ma xiwic te atat soc te winiquetic yu'un, soc hahchem slab yo'tanic hich te bin ut'il me' oso te yich'oj pojbeyel yalatac. Soc te atat mero ya sna' yaq'uel guerra, ma ba ya sjoquin ta ahc'abal te pueblo.

⁹ Yo'tic, snac'ojix sba ta ch'en, o ay wan ta yan lugar. Soc teme ha nahil ya xlaj te mach'atic ay awu'une, mach'ayuc a te ya ya'iy hich me ya yal: Tsalbiliquix te mach'atic st'unojic te Absalón, xchihic.

¹⁰ Ha nix te mach'a mero ma xiw, te hich yo'tan te bin ut'il choj, jc'axel me ya xiwic, como spisil Israel sna'oj te ma xiw te atat, soc te ay yipic te mach'atic sjoquinej.

¹¹ Ho'on ya calbat, ac'a stsob tal sbahic ta atojol spisil Israel ta Dan ha to ta Beerseba, c'ax bayelic hich te bin ut'il hi' ta ti'mar; soc ha'at nix ya me xbahat ta guerra.

¹² Hich ya ca'betic guerra ta bayuc ya jtahtic; ya jlumtaytic hich te bin ut'il ts'ujul te ya xyahl ta sba lum, ma ba ya cac'tic te cuxul ya xhil te David o te winiquetic yu'un.

¹³ Soc teme ya xbaht ta ahnel ta jun pueblo, spisil Israel ya me yich'ic bahel lazohetic tey a, ya jnitic bahel c'alal ta uc'um, hich mayuc junuc ton ya xhil tey a, xchi.

¹⁴ Ha yu'un te Absalón soc spisil Israel la yalic: Ha lec te bin la yal te Husai te arquita-winic, ha ma ba lec c'oht te bin la yal te Ahitofel, xchihic. Como te Jehová chapalix yu'un a te ya yich' howiytesel te bin la yal te Ahitofel scuenta yu'un ha ya xc'oht ta stojol Absalón te bin chopole.

¹⁵ Patil te Husai la yalbe te sacerdotehetic Sadoc soc Abiatar: Hich la yal te Ahitofel ta stojol te Absalón soc te mamaletic ta Israel, soc hich ay te bin la jcalbe.

¹⁶ Ha yu'un hich me xaticon bahel ta halbeyel ta ora te David: Ma me xhilat ta ahc'abal yo'tic ta banti ya xc'ax ha' ta jochol taquin q'uinal; c'axan bahel ta Jordán scuenta yu'un ma ba ya xlajat soc te pueblo te joquimbil awu'une, xchi.

¹⁷ Te Jonatán soc te Ahimaas ayic ta En-rogel. Ay jtuhl criada c'oht ta halbeyel yu'un, como ma xhu' ya yac' sbahic ta ilel te ya x'ochic bahel ta pueblo. Hich baht yalbeyic te ajwalil David.

¹⁸ Pero ilotic yu'un jtuhl querem te baht yalbe te Absalón. Hahchic ta tulan behel schebalic, c'ohtic ta sna jtuhl winic ta Bahurim. Ay pozo ta yamaq'uil, tey ochic a.

¹⁹ Te ants te ay ta na la smacbe ta pac' te sti'il te pozo, la sq'uiy trigo ta sba, hich mayuc mach'a la sna'.

²⁰ C'alal c'ohtic ta sna te ants te winiquetic yu'un Absalón, la sjoc'obeyic te antse: ¿Banti ay te Ahimaas soc te Jonatán? xchihic. Sohliquix bahel ta jehch ha', xchi te antse. Te bin ut'il ma ba la stahic ta lehel, suhtic bahel ta Jerusalén.

²¹ C'alal suhtemiquix bahel a, te winiquetic loq'uic tal ta pozo, hich baht yalbeyic te ajwalil David: Hahchanic, sohlanic bahel ta ora ta jehch ha', como hich yaloj te Ahitofel ta acontrahic, xchihic.

²² Hich te David soc spisil te mach'atic joquimbil yu'un hahchic ta ora, sohlic bahel ta jehch Jordán; te c'alal ma to sacub q'uinal a spisil c'axemiquix ta jehch ha'.

²³ Te Ahitofel, c'alal la yil te ma ba la spasic te bin la yal, la schahpan sburro, baht ta sna ta slumal. C'alal laj yalbel mandar ta sna, la sjihpan sba, hich laj; la yich' muquel ta banti mucul te state.

²⁴ Te David c'oht ta Mahanaim, yan te Absalón sohl bahel ta Jordán soc spisil te winiquetic yu'un Israel.

²⁵ Te Absalón la yotses ta jtsobaw yu'un soldadohetic te Amasa scuenta sjelol Joab. Te Amasa ha snich'an jtuhl israel-winic Itra sbihil, te way soc Abigail yantsil-nich'an Nahas, ha yermana sba soc te Sarvia te snan Joab.

²⁶ Te Absalón soc te soldadohetic yu'un Israel la spas scampamento ta sq'uinal Galaad.

²⁷ C'alal c'oht ta Mahanaim te David, loc' tal ta tahel yu'un Sobi snich'an Nahas, te talem ta Rabá yu'un te sts'umbal Amón, soc yu'un Maquir snich'an Amiel, te talem ta Lodebar, soc Barzilai te galaad-winic te talem ta Rogelim,

²⁸ la yich'beyic tal ta stojol David soc te pueblo sjoquinej, wayibaletic, vasijahetic, pac'bil oxometic, soc trigo, cebada, harina, ch'ilbil trigo, habas, lentejas,

²⁹ chab, mantequilla, tuminchijetic soc queso yu'un wacax, scuenta yu'un ya swe'ic; yu'un hich la yalic: Ay ta wi'nal te pueblo soc luhbenic soc taquinti'il ya ya'iyic ta jochol taquin q'uinal, xchihic.