2 Samuel 15 - Bible in Tzeltal Bachajón

Absalón la scontrahin David

¹ Ta patil a ini, te Absalón la sta scarreta scuenta guerra soc cawuhetic soc lajuneb yoxwinic (50) winiquetic te ya xnahilijic bahel yu'un.

² Te Absalón ya xhahch ta sab, ya yac' sba ta ti'be ta yochibal te pueblo. Mach'ahuc a te ay c'op yu'unic te ya xtal yac' sbahic ta chahpanel yu'un te ajwalil, ya yic'ticlan soc ya sjoc'obe: ¿Banti talemat? xchi. Hich ya sjaq'uic: Te a'bat awu'un talem ta jchahp yu'un Israel, xchi.

³ Ha yu'un te Absalón ya yalbe: Melel toj soc lec te bin yac awal; pero mayuc mach'a ya schahpanat ta scuenta te ajwalil, xchi.

⁴ Soc ya yal xan te Absalón: Ayuc bin ut'il ho'on ya x'ochon ta juez yu'un te q'uinal scuenta yu'un ya xtal yilonic spisil te mach'atic ay c'op yu'unic, o te bin ya sc'an chahpanel, ho'on stojil me ya jchahpan te hichuque, xchi.

⁵ Teme ay mach'a ya xnohpoj ta stojol yu'un ya snijan sba ta stojol, te Absalón ya yic' tal, ya smech' soc ya yuhts'uy.

⁶ Hich la spasbe spisil israeletic te ya xtalic ta stojol te ajwalil te ya sc'anic chahpanel yu'un. Hich la yu'untaybe yo'tanic te snich'nab Israel.

⁷ C'alal loc' chaneb ha'bil, te Absalón hich la yalbe te ajwalil: Ya calbat wocol te yacuc awac'on bahel ta Hebrón yu'un ya jc'ohtes ta pasel te bin jchapoj ta stojol Jehová.

⁸ Como te a'bat awu'un, te c'alal ay ta Gesur ta Siria a, ay bin la jchahpan, hich la jcal: Teme ya yac'on suhtel tal ta Jerusalén te Jehová, ya xtal quich' ta muc' te Jehová, xchi.

⁹ Junuc me awo'tan ya xbahat, xchi sc'oblal yu'un te ajwalil. Hich baht ta Hebrón te Absalón.

¹⁰ Pero te Absalón la sticon bahel winiquetic ta stojol spisil ta chahp yu'un Israel, hich la yal: Te c'alal yac awa'iyic ya x'oc' te xulubil hich me yac awalic: Ochix ta ajwalil ta Hebrón te Absalón, xchihex me.

¹¹ Soc te Absalón la yic' bahel lajunwinic (200) ta tuhl winiquetic yu'un Jerusalén, jun yo'tan bahtic soc, ma ba la sna'ic te bin scuentahil.

¹² Te c'alal yac ta aq'uel milbil mahtaniletic a te Absalón, la sticon ta iq'uel tal jtuhl jtojobteswanej yu'un David, Ahitofel te gilon-winic, talem ta Gilo. Hich behbe yich'bel yip te c'op ta scontrahinel te ajwalil, soc yac ta p'ohlel te mach'atic yac st'umbelic te Absalón.

¹³ Ay mach'a hich baht yalbe te David: Spisil Israel bahtix yo'tanic ta stojol Absalón, xchi.

¹⁴ Ha yu'un te David la yalbe spisil te a'batetic yu'un te sjoquinej ta Jerusalén: Hahchanic, ahnucotic bahel, como ma xhu' ya xcolotic ta sc'ab Absalón. Suja abahic, scuenta yu'un ma ba ya stahotic soc ya ya'botic jwocoltic a, soc te ya slajin ta espada te pueblo, xchi.

¹⁵ Te a'batetic yu'un te ajwalil la yalbeyic: Te a'batetic awu'un ya sch'uhunic spasel spisil bintic ya yal te ajwalil cu'uncotic, xchihic.

¹⁶ Hich loc' bahel te ajwalil, joquimbil yu'un spisil te mach'atic ayic ta sna. La yihquitay hilel lajuntuhl yantic antsetic yu'un te ya scanantayic te nahe.

¹⁷ Hich loc' bahel te ajwalil soc spisil te pueblo te la st'unic bahel; namal ayiquix a la stehc'an sbahic.

¹⁸ Spisil te a'batetic yu'un ayic ta sts'ehl. Soc spisil te cereteohetic soc te peleteohetic, spisil te geteohetic soc lajunwinic scha'bahc' (600) ta tuhl winiquetic te behenic talel c'alal ta Gat, nahilijic c'axel ta stojol te ajwalil.

¹⁹ Te ajwalil hich la yalbe te Itai ta talem ta Gat: ¿Bin yu'un te tal ajoquinotcotic? Suhtan bahel, joquina te yach'il ajwalil, como ha'at jyanlumat soc ha nix hich la awich'ix loq'uesel ta alumal.

²⁰ Ach' to nax hulat, ¿bin ya xtal ale ajoquinon, yu'un ma jna' banti ya xbohon ho'on? Ha lec suhtan bahel, soc ic'a suhtel te alumale. ¡Ac'a sc'uxultayat te Jehová soc junuc me yo'tan ta atojol spisil ora! xchi.

²¹ Te Itai la sjac'be sc'op te ajwalil: ¡Cuxul te Dios, soc cuxul te ajwalil cu'un! bayuc ya xbaht te ajwalil cu'un, aunque ta lajel o ta cuxlejal, ha nix hich tey ay a te a'bat awu'une, xchi.

²² Ha yu'un te David la yalbe te Itai: La' me hiche, c'axan bahel, xchi. Hich c'ax bahel te Itai te talem ta Gat soc spisil te winiquetic yu'un soc spisil te mach'atic ay yu'un.

²³ Spisil te pueblo tulan oq'uic. C'axic bahel spisilic ta uc'um Cedrón. Ha nix hich c'ax bahel te ajwalil. Spisil te pueblo behenic bahel ta sbehlal jochol taquin q'uinal.

²⁴ Ha nix hich baht te Sadoc soc spisil te levitahetic te yich'ojic te scaxahul te chapbil-c'op yu'un Dios; la yaq'uic hilel te scaxahul te chapbil-c'op ta sts'ehl te Abiatar ha to c'alal laj ta loq'uel tal spisilic ta pueblo.

²⁵ Pero te ajwalil hich la yalbe te Sadoc: Ich'a suhtel ta pueblo te scaxahul te chapbil-c'op yu'un Dios. Teme lecon ta sit te Jehová, ya me yac' te ya suhton tal soc ya quil yan buelta te scaxahul te chapbil-c'op soc te banti ya xnahine.

²⁶ Yan teme ya yalbon: Ma lecucat ta co'tan, teme xchihe, li' ayoni, ac'a spasbon te bin lec ya ya'iy, xchi.

²⁷ Te ajwalil la yalbe xan te sacerdote Sadoc: ¿Ma bal ha'ucat jalwanejat? Lamaluc me q'uinal suhtan bahel ta pueblo soc te anich'an Ahimaas, soc te Jonatán snich'an Abiatar.

²⁸ Yan te ho'one ya xhilon ta ban ya xc'ax ha' ta jochol taquin q'uinal ha to c'alal ya xhul suhtib te c'op yac aticombonic ta halbeyel, xchi.

²⁹ Ha yu'un te Sadoc soc Abiatar la yich'ic suhtel ta Jerusalén te scaxahul te chapbil-c'op yu'un Dios, tey hilic a.

³⁰ Te David mo bahel ta Wits yu'un Olivohetic; yac ta oq'uel mohel a, smucoj sjol soc mayuc step. Ha nix hich spisil te pueblo te joquimbil yu'un, smucoj sjolic jujutuhl soc yacalic ta oq'uel mohel.

³¹ Hich c'oht ta halbeyel te David: Te Ahitofel jun ay soc te mach'atic la shachic c'op soc te Absalón, xchihic. Ha yu'un la yal te David: ¡Jehová, jina te bin ya yal te Ahitofel! xchi.

³² C'alal c'oht ta ba wits te David te banti ya yich' ch'uhunel te Diose, loc' tal ta stojol te Husai te arquita-winic, ch'i'emtic sc'u' soc ya'tinej ts'u'lum te sjole.

³³ Te David hich la yalbe: Teme yac ajoquinon, ya me awa'bon jwocol.

³⁴ Yan teme ya suhtat bahel ta pueblo, teme hich yac awalbe te Absalón: Ajwalil, ho'on awa'baton ya xc'ohon awu'un. Hich te bin ut'il la jcac' jba ta a'batinel ta stojol te atat, hich nix ya cac' jba ta a'batinel ta atojol, xchihat. Hich yac alajimbe te bin ya yal te Ahitofel.

³⁵ Ya sjoquinat tey a te sacerdote Sadoc soc te sacerdote Abiatar. Ha yu'un spisil te bin yac awa'iy ta sna te ajwalil, hich yac awalbe te sacerdotehetic Sadoc soc Abiatar.

³⁶ Soc tey nix ayic a te schebal snich'nabic, ha te Ahimaas snich'an Sadoc, soc Jonatán snich'an Abiatar. Ha ta scuentahic te yac awa'bon jna' spisil bintic yac awa'iyic, xchi.

³⁷ Hich c'oht ta Jerusalén te Husai, te yamigo David, te c'alal yac ta ochel ta Jerusalén a te Absalón.