2 Samuel 14 - Bible in Tzeltal Bachajón

Joab la yic' suhtel tal Absalón

¹ Te Joab yal Sarvia, la yil te ay ta yo'tan te ajwalil te Absalón.

² Ha yu'un la sticon ta iq'uel tal jtuhl p'ijil ants ta Tecoa, hich la yalbe: Ya calbat wocol te yacuc ap'is aba te ayat ta mel-o'tan, lapa c'u'ul scuenta mel-o'tan, ma me xawa'be aba perfume, ya sc'an te hich yac awac' aba te bin ut'il ants te ayix bayel c'ahc'al ay ta mel-o'tan ta scuenta te ay mach'a cham yu'une.

³ Bahan ta stojol te ajwalil soc hich me xawalbe, xchi. Hich te Joab la ya'be sna' te bin ya xc'oht yale.

⁴ Hich te ants te talem ta Tecoa baht ta stojol te ajwalil. La spahcan sba ta lum ta yich'el ta muc', hich la yalbe: Coltayawon, ajwalil, xchi.

⁵ ¿Bin la apas? xchi sc'oblal yu'un te ajwalile. La sjac': Hilemon ta me'ba' ants, chamix jmamalal.

⁶ Ay cheb yalatac te awa'bate, ta schebalic la smaj sbahic ta aquiltic. Pero mayuc mach'a jatotic yu'un, te jtuhle la yehchentes te yane, jc'axel la smil.

⁷ Yo'tic spisil te mach'atic ay cu'un ma lecuc yo'tanic ta jtojol yu'un, hich ya yalic: Ac'a ta c'abal te mach'a la smil te yermano scuenta yu'un ya cac'cotic ta lajel yu'un te la smil te yermanohe. Hich ya jmilcotic te mach'a hilem te ya yich' te bin ay yu'un te state, xchihic. Hich ya stup'bonic te ac'al te hil cu'une. Hich ya stup'beyic ta bahlumilal te sbihil soc sts'umbal te jmamalal, xchi.

⁸ Ha yu'un te ajwalil hich la yalbe te ants: Bahan ta ana, ya me cal mandar te ya yich' chahpanel, xchi sc'oblal.

⁹ La sjac' te ants te talem ta Tecoa: Cajwal, ac'a c'ohtuc ta jtojol te mulil soc ta stojol te mach'atic ay yu'un te jtat, pero te ajwalil soc te cuentahinwanej yu'un ma me ayuc smul stuquel, xchi.

¹⁰ La sjac' te ajwalil: Teme ay mach'a ay bin ya yal ta acontra, ic'bon tal ta jtojol, hich mayuc bin ora ya yuts'inatix a, xchi.

¹¹ Ha yu'un la yal te ants: Awocoluc, ajwalil, c'opona te Jehová te Dios awu'un te manchuc ya ya'bon xan jwocol te mach'a c'an ya'be spacol te ch'ich', te manchuc ya smilbonic te jtuhl xan cale, xchi. La yal te ajwalil: ¡Yiloj Jehová! ma me xch'ay cohel ta lum jlihcuc stsotsel sjol te awale, xchi.

¹² La yal xan te antse: Awocoluc, ac'a xan ta c'op te a'bat awu'un ta stojol te ajwalil cu'un, xchi. C'opojan, xchi te ajwalil.

¹³ Hich la sjac' te antse: ¿Bin yu'un anopoj te hich nix yac apas ta scontrahinel te pueblo yu'un Dios? Como te bin ut'il hich ya yal te ajwalil, ha nix ya yal sba te ay smul, te bin ut'il ma ba ya yiq'uix suhtel tal te mach'a stenoj loq'uel.

¹⁴ Jna'ojtic te jpisiltic ya xchamotic, hichotic te bin ut'il ha' te ya xmahl ta lum, te ma spasix ta tsobel. Te Dios mayuc mach'a ya slajimbe scuxlejal, ha ya sle bin ut'il ma ba spisil ora namal ya xhil ta stojol te mach'a tembil loq'uele.

¹⁵ Te bin ut'il talonix ta yalbeyel ini te ajwalil cu'un, ha ta scaj te la xiwteson te pueblo. Hich la yal te a'bat awu'un: Ya jc'opon te ajwalil, ya wan spas te bin ya xhalbot yu'un te a'bat yu'une.

¹⁶ Te ajwalil ya wan yich' ta cuenta, ya wan scoltay loq'uel te ya'bat ta sc'ab te winic te ya sc'an ya slajinon soc te cal tey ta q'uinal te a'bot yu'un Dios.

¹⁷ Ha yu'un hich ya yal te a'bat awu'une: Ha'uc me smuc'ul co'tan te suhtib sc'op te ajwalil cu'un, como te ajwalil cu'un hich c'ohem te bin ut'il ch'ul a'bat yu'un Dios yu'un stsahtayel te bin lec soc te bin ma lecuc. Ac'a sjoquinat te Jehová te Dios awu'un, xchi.

¹⁸ Te ajwalil la sjac'be sc'op te antse: Awocoluc, ma me xamuc ta awo'tan te bin ya joc'obat, xchi. C'opojan, cajwal, xchi te antse.

¹⁹ ¿Ma bal meleluc te ha te Joab te la ya'bat ta acuenta yalel spisil ini? xchi te ajwalile. La sjac' te antse: Cuxul ach'uhlel, ajwalil cu'un, mayuc mach'a ya xhu' ya showiytes ta q'uexam o ta wa'el spisil te bin yalojix te cajwal. Ha nix te awa'bat Joab te la sticonon tal, ha la yalbon tal spisil te c'op te la jcalbatixe.

²⁰ Pero hich la spas te Joab scuenta yu'un ya xjelon a te bin hahcheme. Pero te ajwalil cu'un ay sp'ijil yo'tan hich te bin ut'il ch'ul a'bat yu'un Dios yu'un sna'el te bin yac ta c'ohel ta pasel ta q'uinal, xchi.

²¹ Ha yu'un te ajwalil hich la yalbe te Joab: Ilawil, hich ya jpas. Bahan, ic'a suhtel tal te querem Absalón, xchi.

²² Te Joab la squejan sba ta lum, la yich' ta muc', soc la ya'be bendición, hich la yal: Yo'tic c'ohtix ta yo'tan te a'bat awu'un te lecon ta asit, cajwal, como la spasix te ajwalil te bin c'ambot yu'un te ya'bate, xchi.

²³ Hich te Joab baht ta Gesur, la yic' tal te Absalón ta Jerusalén.

²⁴ Pero la yal te ajwalil: Ac'a bahtuc ta sna, ma me xyilbon jsit, xchi. Hich baht ta sna te Absalón, ma ba la yilbe sit te ajwalil.

²⁵ Ta spisil Israel mayuc yan winic te hich mulambil yu'un st'ujbilal te bin ut'il te Absalón. Ta yoc c'alal ta sjol, mayuc falta yu'un.

²⁶ Te c'alal ya yich' set'el te stsotsel sjol ta jujun slajel ha'bil —yu'un ya x'uts'inot yu'un te al ya ya'iy— ha lajunwinic (200) ciclo yalal te stsotsel sjol, hich te bin ut'il sp'isol yalal biluquetic yu'un ajwalil.

²⁷ Te Absalón ayin oxeb squerem-nich'nab soc jtuhl yantsil-nich'an, Tamar sbihil, mero t'ujbil ach'ix.

²⁸ Halaj cheb ha'bil ta Jerusalén te Absalón, ma ba la yilbe sit te ajwalil.

²⁹ Te Absalón la sticon ta iq'uel tal te Joab yu'un ya sticon bahel ta stojol te ajwalil, pero te Joab ma ba la sc'an tal. La sticon ta halbeyel schebal buelta, pero ma ba la sc'an tal.

³⁰ Ha yu'un te Absalón hich la yalbe te a'batetic yu'un: Ilawilic, te sq'uinal Joab slac'oj sba soc te cu'une, ay sts'unoj cebada tey a. Bahan, tsumbeyahic sc'ahc'al, xchi. Hich te a'batetic yu'un Absalón, baht ya'beyic sc'ahc'al te q'uinale.

³¹ Te Joab ora baht ta sna te Absalón, hich la sjoc'obe: ¿Bin yu'un la ya'beyic sc'ahc'al te jq'uinal te a'batetic awu'une? xchi.

³² La sjac' te Absalón: La jticonat ta iq'uel tal li'i yu'un ya jticonat bahel yu'un hich yac awalbe te ajwalil: ¿Bin yu'un te talon ta Gesur? Ha lec te teyuc ayon a. Co'tanuc ya quilbe sit te ajwalil; teme ay jmule, milawon, xchi.

³³ Hich baht te Joab ta stojol te ajwalil, la ya'be sna'. Te ajwalil la sticon ta iq'uel te Absalón; hich tal, la snijan sba ta lum ta stojol te ajwalil. Te ajwalil la yuhts'uy te Absalón.