2 Samuel 13 - Bible in Tzeltal Bachajón

Amnón soc Tamar

¹ Te Absalón snich'an David, ay jtuhl yihts'in ach'ix, buen t'ujbil, Tamar sbihil. Te Amnón snich'an David bayel la smulan te ach'ixe.

² Ay swocol yu'un, tsacot ta chamel yu'un ta scuenta Tamar ha te yihts'ine. Scaj te ach'ix to ma ba weht bin la spasbe ta stojol.

³ Pero te Amnón ay yamigo, Jonadab sbihil, snich'an Simea, sbanquil te David. Te Jonadab ya sna' lo'loywanej,

⁴ hich la yalbe te Amnón: Snich'anat ajwalil, ¿bin yu'un te jujun c'ahc'al yacat ta yahubel? ¿Ma bal yacuc xhu' yac awalbon ca'iy? xchi. La sjac' te Amnón: Yu'un mero bayel ya jmulan te Tamar te yihts'in te jbanquil Absalón, xchi.

⁵ Te Jonadab hich la yalbe: Mehtsana aba ta awayib, pasa aba te yacat ta chamel. Te c'alal ya xtal yilat te atat, hich yac awalbe: Awocoluc, ac'a yich'bon tal we'elil te quihts'in Tamar. Ac'a schahpambon ta jtojol lequil we'elil scuenta yu'un ya quil soc ha nix ya ya'bon te jwe'ele, xchi.

⁶ Hich te Amnón baht ta swayib, la spas sba te ay ta chamel. Tal ta ilel yu'un te ajwalil. Te Amnón hich la yalbe: Awocoluc, ac'a taluc te quihts'in Tamar. Ac'a tal spasbon cha'pehchuc jayal pan, ac'a ya'bon jwe'el ta sc'ab, xchi.

⁷ Hich te David la sticon bahel c'op ta sna te Tamar, hich la yal: Bahan ta sna abanquil Amnón, pasbeya swe'el, xchi.

⁸ Hich te Tamar baht ta sna te sbanquil Amnón te metsel ta swayib. La stsac harina, la swots', la spas jayal pan ta stojol, la sta'ajtes.

⁹ Hich la stsac te sartén yu'un ya ya'be te pane, pero te Amnón ma ba la sc'an la swe, hich la yal: Loq'uesa bahel spisil te mach'atic li' ayique, xchi.

¹⁰ Ha yu'un te Amnón hich la yalbe te Tamar: Ich'a tal te we'elil li' ta banti ayoni. Ha'at nix yac awa'bon, xchi. Hich te Tamar la stsac te jayal pan spasoj, la yich'be bahel te sbanquil Amnón tey ta swayib.

¹¹ Pero te c'alal la ya'be yu'un ya swe', te Amnón la stsac te Tamar, hich la yalbe: La', quihts'in, wayucotic, xchi.

¹² Ma'uc, banquil, ma me xawuts'inon. Mayuc hich ta pasel ta Israel. Ma xapas te bin ihlaybil.

¹³ Como ¿banti ya xbohon yu'un te jq'uexlale? Soc te ha'ate, hich ya xc'ohat ta stojol Israel te bin ut'il bohl winic. Awocoluc, c'opona te ajwalil, ma yu'unuc ma ba ya yac' te awu'unon ya xc'ohon te hichuque, xchi.

¹⁴ Te Amnón ma ba la yich' ta cuenta. Te bin ut'il c'ax hich ay yip a, la stsac ta tulan, way soc.

¹⁵ Ta patil, te Amnón mero ihlaybil c'oht yu'un la ya'iy ta yo'tan. C'ax hich la ya'iy a te bin ut'il la smulan ta nahilal. Hich la yalbe: Hahchan, bahan me, la yut.

¹⁶ La sjac' te Tamar: ¡Ma'uc! como c'ax hich chopol a teme yac atenon loq'uel te bin ut'il la apasbonix, xchi. Pero te Amnón ma ba la yich'be ta cuenta.

¹⁷ La yic' tal te a'bat yu'un, hich la yalbe: Tena loq'uel li'i, maca hilel te puerta, xchi.

¹⁸ Te a'bat la sten loq'uel, la smac hilel te puerta. Te Tamar slapoj buen t'ujbil nahtil-c'u'ul, ha c'u'ul te ya slapic te yantsil-nich'an ajwalil te ach'ix to.

¹⁹ Te Tamar la yac' tan ta sjol, la sch'i' te snahtil-c'u' slapoj, la yac' sc'ab ta sjol, yac ta aw bahel.

²⁰ Hich joc'obot yu'un te Absalón te sbanquil: ¿Sjoquinejat bal te abanquil Amnón? Ch'abanix, quihts'in, como ha abanquil. Ma me xamel awo'tan yu'un, xchi. Hich te Tamar yac ta mel-o'tan a hil ta sna te sbanquil Absalón.

²¹ Te c'alal la ya'iy spisil te bin c'ohem ta pasel te ajwalil David, bayel ilin yu'un.

²² Pero te Absalón mayuc bin lec o mayuc bin chopol la yalbe te Amnón, aunque la yihlay te Amnón yu'un te la stsac te Tamar te yihts'ine.

Absalón ya suhtbe spacol ta stojol Amnón

²³ Cheb ha'bil ta patil a, te swinictac Absalón yacalic ta sloq'uesel stsotsel tuminchijetic ta Baal-hazor ta nopol Efraín. Te Absalón la yic' ta we'el spisil te snich'nab te ajwalile.

²⁴ Te Absalón tal ta stojol te ajwalil, hich la yalbe: Te awa'bat ay jloq'uesej-tsotsel tuminchijetic yu'un. Ya calbe wocol te ajwalil te yacuc xtal sjoquinon soc te a'batetic yu'une, xchi.

²⁵ Te ajwalil la sjac'be te Absalón: Ma'uc, jnich'an, ma ba ya xbohotcotic jpisilcotic scuenta yu'un mayuc awocol cu'uncotic a, xchi. Aunque la sbic'talc'optay, pero ma ba la sc'an baht, pero la ya'be bendición.

²⁶ Ha yu'un la yal te Absalón: Teme ma xhu' awu'un, awocoluc, ac'a sjoquinotcotic te quihts'in Amnón, xchi. ¿Bin yu'un te ya sjoquinat? xchi te ajwalil.

²⁷ Pero te bin ut'il la yac' fuersa te Absalón, la ya'be sjoquin bahel te Amnón soc spisil snich'nab te ajwalil.

²⁸ Te Absalón hich la yalbe te a'batetic yu'un: Ya me awilic ta lec te Amnón te c'alal yacubenix yu'un vino a. Te c'alal hich ya cal: Milahic te Amnón, teme xchihone, ya me amilic. Ma me xiwex, como ho'on jmandar. Ac'a fuersa, ayuc me yip awo'tanic ta spasel, xchi.

²⁹ Te a'batetic yu'un Absalón hich nix la spasic te bin ut'il halbotic yu'un te Absalón. Ha yu'un spisil te snich'nab te ajwalil mo ta smulahic, bahtic ta ahnel.

³⁰ C'alal ayic to ta behel a, hul ta halbeyel te David: Milot yu'un Absalón spisil te snich'nab ajwalil, mayuc cuxul hilel jtuhluc, xchi.

³¹ Ha yu'un hahch te David, la sch'i' sc'u' soc la smehtsan sba ta lum. Spisil te a'batetic yu'un te sjoquinej ha nix hich la sch'i' sc'u'ic.

³² Pero te Jonadab snich'an Simea, te sbanquil David, c'opoj, hich la yal: Ma me scuy te cajwal te spisil laj ta milel te snich'nabe. Ha nax laj te Amnón; como hich la schap ta yo'tan te Absalón te c'alal tsacbot te yihts'in Tamar yu'un te Amnón.

³³ Ha yu'un ma me xyich' ta cuenta te cajwal te bin la yich' halel te spisil lajic te snich'nab te ajwalile. Ha nax laj te Amnón,

³⁴ soc te Absalón loc' ta ahnel, xchi. Te j'il-q'uinal, c'alal la stoy sit, la yil tsobol winiquetic yacalic ta talel ta be yu'un Horonaim, ta sch'uht wits.

³⁵ Ha yu'un te Jonadab hich la yalbe te ajwalil: Ilawil, taliquix te snich'nab te ajwalil, hich te bin ut'il la yalbat te awa'bate, xchi.

³⁶ Yac to nax ta lajel yo'tan ta c'op a, c'ohtic te snich'nab te ajwalil, hahchic ta tulan oq'uel. Ha nix hich te ajwalil soc spisil te a'batetic yu'un, mero tulan oq'uic.

³⁷ Yan te Absalón baht ta ahnel ta stojol Talmai snich'an Amiud, ajwalil yu'un Gesur. Te David jujun c'ahc'al ya x'oc' yu'un te snich'ane.

³⁸ Hich loc' ta ahnel te Absalón, baht ta Gesur, tey halaj oxeb ha'bil a.

³⁹ Te ajwalil David yo'tanuc ya yilbe sit te Absalón, como ch'ayix te mel-o'tan yu'un te bin ut'il laj te Amnón.