2 Samuel 11 - Bible in Tzeltal Bachajón

David soc Betsabé

¹ Ta yorahil ya x'ach'ub ya'binal te'etic, te bin ora ya xloq'uic bahel ta guerra te ajwaliletic, te David la sticon bahel te Joab soc te a'batetic yu'un soc spisil Israel. La slajinic te amonetic soc la sjoytayic te Rabá. Pero hil ta Jerusalén te David.

² Ta jun c'ahc'al ta tibiltic hahch ta swayib te David, behen ta yamaq'uil sba sna ajwalil, la yil cohel jtuhl ants yac ta atimal; mero t'ujbil ants.

³ Te David la sticon ta joc'oyel mach'a a te antse, hich halbot: Ha Betsabé yantsil nich'an Eliam, yihnam Urías te heteo-winic.

⁴ Te David la sticon bahel a'batetic ta yiq'uel tal. Hich tal ta stojol, way soc. (Slecubtesejix sba a yu'un te bohloben sc'oblal yu'un te schamel scuenta jujun u.) Patil suht bahel ta sna.

⁵ La yic' yal te antse, hich la sticon ta halbeyel te David: Ayix cal, xchi.

⁶ Ha yu'un te David hich la sticon ta halbeyel te Joab: Ticombon tal te Urías te heteo-winic, xchi. Hich te Joab la sticon te Urías ta stojol David.

⁷ Te c'alal hul ta stojol David te Urías, te David la sjoc'obe bin yilel te Joab soc te soldadohetic, soc bin ut'il ay te guerra.

⁸ Patil la yalbe te Urías: Bahan ta ana, poca awoc, xchi. Te c'alal loc' bahel ta sna ajwalil te Urías, ticombot mahtanil yu'un te ajwalil.

⁹ Pero te Urías ma ba baht ta sna, tey way a ta sti'il sna te ajwalil soc te a'batetic yu'un te yajwale.

¹⁰ Hich a'bot sna' te David: Ma ba co bahel ta sna te Urías, xchihic. Te David la sjoc'obe te Urías: ¿Ma bal namaluc talat hiche? ¿Bin yu'un ma ba bahat ta ana? xchi.

¹¹ La sjac' te Urías: Te scaxahul te chapbil-c'op yu'un Dios soc te soldadohetic yu'un Israel soc Judá nahinemic ta nahilpac', soc te cajwal Joab soc te a'batetic yu'un ayic ta aquiltic. ¿Ya bal spas te ya x'ochon bahel ta jna, te ya xwe' x'uch'on soc te ya xwayon soc te quihname? ¡Ta scuenta acuxlejal soc ta scuenta ach'uhlel, ma ba hich ya jpas! xchi.

¹² Pero te David la yalbe te Urías: Hilan yo'tic li'i, pajel ya jticonat bahel, xchi. Hich te Urías hil ta Jerusalén soc ta schebal c'ahc'al.

¹³ Te David la yic' sjoquin ta we'el uch'el, la syacubtes. C'alal ihc'ub, tey baht ta wayel ta swayib soc te a'batetic yu'un te yajwal, ma ba baht ta sna.

¹⁴ C'alal sacub q'uinal, te David la sts'ihbabe shun te Joab, la ya'be yich' bahel te Urías.

¹⁵ Hich la sts'ihbabe bahel ta hun: Ha me nahil xawac' te Urías te banti mero tulan te guerra. Pihtesahic hilel ta stuquel scuenta yu'un ya x'ehchentesot, hich ya xlaj tey a, xchi.

¹⁶ Ha yu'un te Joab, te c'alal la sjoytayic te pueblo, la yac' te Urías te banti sna'oj te ay tulan soldadohetic.

¹⁷ C'alal loq'uic tal te winiquetic yu'un te pueblo, och ya'beyic guerra te Joab. Ay lajic ta guerra soldadohetic yu'un David; ha nix hich tey laj a te Urías.

¹⁸ Te Joab la sticon ta a'beyel sna' te David te bin c'oht ta pasel ta guerra.

¹⁹ Hich la yalbe bahel te a'bat: Te c'alal ya xlaj awo'tan ta yalbeyel te ajwalil te bin c'oht ta pasel ta guerra,

²⁰ teme ya x'ilin te ajwalil, teme ya sjoc'obat: ¿Bin yu'un te mero nohpojex bahel ta pueblo ta guerra? ¿Yu'un bal ma ba ana'ojic te ay bin ya sch'ojic cohel tal ta ba ts'ahc?

²¹ ¿Mach'a la smil te Abimelec te snich'an Jerobaal? ¿Ma bal jtuhluc ants te la sch'oj cohel tal jxeht' ye molino, te hich laj a ta Tebes? ¿Bin yu'un te c'ax nohpojex bahel ta ts'ahc? teme xchihe, hich me yac awalbe: Soc laj te awa'bat Urías te heteo-winic, xchihan me.

²² Hich baht te a'bat. C'alal c'oht ta stojol David, la yalbe ya'iy spisil bintic halbot bahel yu'un Joab.

²³ Te a'bat hich la yalbe te David: Te winiquetic loq'uic tal, la ya'botcotic guerra ta aquiltic, ha hu'em yu'unic a, pero la jnutscotic bahel c'alal ta yochibal te pueblo.

²⁴ Pero te j'ac'-t'ihmalte'etic la yac'ticlanic tal te ya'tejibal st'ihmalte'ic c'alal ta ba sts'ahc, ay lajic a'batetic yu'un te ajwalil, soc ha nix hich laj tey a te awa'bat Urías te heteo-winic, xchi.

²⁵ Te David la yalbe te a'bat: Hich me ya xc'oht awalbe te Joab: Ma me xamel awo'tan yu'un, como te espada pajal ya xlajinwan ta jehch ta jehch. A'beya xan yipal te guerra ta pueblo ha to c'alal yac alajin, xchihat. Hich me yac awa'be xan yip yo'tan a, xchi.

²⁶ C'alal la ya'iy te yihnam Urías te lajix te smamalal, la yoq'uetay.

²⁷ C'alal c'ax yorahil te ya yoq'uetay, te David la sticon ta iq'uel tal ta sna. Ha yihnam c'oht, soc la yac' jtuhl yal. Pero te Jehová ma ba lec la ya'iy te bin la spas te David.