2 Pedro 3 - Bible in Tzeltal Bachajón

Ya xtal te sc'ahc'alel Cajwaltic

¹ Quermanotac te c'uxex ta co'tan, schebalix carta a te ya jts'ihbabeyex. Ta schebal te carta ya jtijbeyex awo'tanic te ayuc lec snopojibal awu'unic,

² yu'un yac ana'ulanic te bin la yalic hilel ta nahil to te ch'ul jalwanejetic soc te smandar te Cajwaltic, te Jcoltaywanej cu'untic, te halbotex yu'un te jpuc-c'opetic awu'unique.

³ Te bin bayel sc'oblal, ha te yac ana'ic te ta slajibal c'ahc'al ya me xtal jlabanwanejetic te ya spasic te bintic chopol ya smulanic,

⁴ soc hich me ya yalic: ¿Banti ay te yalojix te ya xtale? C'alal way sbaq'uetalic te antiguo me'iltatiletic stalel ay spisil, hich te bin ut'il c'alal shahchibal te bin pasbile, xchihic.

⁵ Pero yoloj xanix te ya xch'ay ta yo'tanic te ha ta scuenta sc'op Dios la yich' pasel te ch'ulchan soc bahlumilal ta namey, soc te chicnaj ta ha' te bahlumilal soc tey nix ipajem a,

⁶ soc te ha nix ta scuenta te laj te bahlumilal ta namey, yu'un puhl ta ha'.

⁷ Yan te ch'ulchan soc bahlumilal te ay ta ora ini, ha nix ta scuenta te sc'op Dios quechel te ya xlajic ta c'ahc', ha quechelic yu'un te yorahil ich'el ta c'op soc sjinel te chopol ants-winiquetique.

⁸ Soc ma me xch'ay ta awo'tanic, quermanotac te c'uxex ta co'tan, te jun c'ahc'al ha jmil ha'bil c'ohem yu'un te Cajwaltic, soc te jmil ha'bil ha jun c'ahc'al c'ohem yu'un.

⁹ Ma ba hal ya xc'oht ta pasel te bin yaloj te Cajwaltic, hich te bin ut'il ay ya scuyic te ya xhalaje, pero yac smahliybelex, ma sc'an te ay mach'a ch'ayel ya xbaht, ha ya sc'an te yacuc suhtes yo'tanic spisilic.

¹⁰ Pero te c'alal ya xtal te Cajwaltic hich ya xtal te bin ut'il j'elec' ta ahc'abal. Ta hich ora ya xch'ay bahel te ch'ulchan soc tulan c'op, spisil bintic pasbil ya xlaj ta c'ahc', soc te bahlumilal soc spisil te bintic pasticlambil tey a ya me xlajic ta chiq'uel.

¹¹ Te bin ut'il hich ya xjihn spisil, ¡ya sc'an te ch'ultesbiluc acuxlejalic soc junuc awo'tanic ta stojol Dios

¹² te c'alal yaquex ta smahliyel soc yaquex ta yahnutayel te sc'ahc'alel yu'un Dios, ha te bin ora xpulet ta tihlel ya xlaj ta c'ahq'uel te ch'ulchan, soc ya x'uhl ta c'ahc' spisil bintic pasticlambil!

¹³ Pero te ho'otic yacotic ta smahliyel te bin yaloj te Diose, ha te yach'il ch'ulchan soc yach'il bahlumilal, te banti ya xnahin te bin toj ta pasele.

¹⁴ Ha yu'un, quermanotac te c'uxex ta co'tan, te bin ut'il yaquex ta smahliyel ini, o'tantayahic me te hichuc ya stahex a te Dios te mayuc awa'baquilic soc mayuc bin ya stijex ta c'op yu'un, soc te lamaluc q'uinal soc.

¹⁵ Na'ahic me, te bin ut'il te Cajwaltic yac ta smahliyel, ha scuenta colel, hich te bin ut'il te quermanotic Pablo te c'ux ta co'tantic la sts'ihbabeyex ta scuenta sp'ijil yo'tan te a'bibile.

¹⁶ Hich la sts'ihbay ta spisil te cartahetic yu'une. Ay banti wocol ta na'beyel scuentahil, te ha yan sc'oblal ya xc'oht yu'un te mach'atic ma sna'ic q'uinal soc te xyahl xmo te yo'tanique, hich te bin ut'il ya spasbeyic te yan bintic ts'ihbalambil ta Shun Dios; ha me ch'ayel ya xbahtic yu'un.

¹⁷ Ha yu'un, quermanotac te c'uxex ta co'tan, te bin ut'il hich ana'ojic ta nahilal, canantaya abahic scuenta yu'un ma ba ya snitex bahel te showilc'opic te mach'atic ya spasic biluc ya sc'anic, te hich ya xyahlat cohel ta banti jun awo'tan ach'uhunejique.

¹⁸ Behbehuc me muc'ubel te yutsil-o'tanil soc ta sna'beyel xan sba te Cajwaltic Jesucristo, te Jcoltaywanej cu'untique. Ac'a yich' halbeyel yutsil sc'oblal ta ora ini soc ta sbahtel q'uinal. Hichuc.