2 Corintios 1 - Bible in Tzeltal Bachajón

Spatil-o'tanil

¹ Pablo, jpuc-c'op yu'un Jesucristo ta scuenta sc'anojel yo'tan Dios, soc te quermanotic Timoteo, ya jpatbecotic yo'tan te iglesia yu'un Dios te ay ta Corinto, soc spisil mach'atic ch'uhltesbilic te ayic ta spahmal sq'uinal Acaya:

² Ac'a c'ohtuc ta atojolic te yutsil yo'tan soc te lamal q'uinal yu'un te Jtatic Dios soc te Cajwaltic Jesucristo.

Swocol te Pablo

³ Ac'a yich' halbeyel yutsilal te Dios, te Stat te Cajwaltic Jesucristo, te Tatil yu'un c'uxultaywanej soc te Dios te ya yac' spisil muc'ul-o'tanil,

⁴ ha te mach'a ya smuc'ubtes q'uinal ca'iytic ta spisil te jwocoltic, scuenta yu'un te smuc'ul-o'tanil te ya ya'botic te Dios hich ya xhu' ya jmuc'ubtesbetic q'uinal ya'iyic yantic te ay swocolique.

⁵ Hich te bin ut'il bayel ya xc'ax ta jtojolcotic te swocol te Cristo, ha nix hich ta scuenta Cristo bayel ya xmuc'ub q'uinal ya ca'iycotic.

⁶ Teme ya xc'ax jwocolcotic, yu'un hich yac atahic smuc'ul q'uinal yac awa'iyic soc te colel awu'unique; soc teme ya xmuc'ubtesot q'uinal ca'iycotic, yu'un hich yac atahic smuc'ul q'uinal awa'iyic a, te ha ya yac' te ya xcuhch awu'unic te wocol te ha nix hich yac ta c'axel cu'uncotique.

⁷ Ay yip te smuc'ul co'tancotic ta atojolic, como jna'ojcotic te hich te bin ut'il jmohlol jbahtic ta wocol, ha nix hich jmohlol jbahtic te ya xmuc'ubtesot q'uinal ca'iytic.

⁸ Quermanotac, ya jc'ancotic te yac ana'ic bin ut'il c'ax jwocolcotic ta sq'uinal Asia. Mero c'ux obol jbahcotic, ma ba c'an cuhchuc cu'uncotic, la jcuycotic te jc'axel ya xlajotcotic.

⁹ Hich la jca'iycotic te quechelotcotiquix ta lajel; pero hich c'oht ta pasel scuenta yu'un ma ba talel c'axel ya smuc'ulin sba co'tancotic, pero ha smuc'ul co'tancotic te Dios te ya scha'cuxajtes mach'atic chamenic.

¹⁰ Ha nix la scoltayotcotic ta muc'ul lajel soc ya scoltayotcotic ta ora ini, soc ha smuc'ul co'tancotic te ya to scoltayotic xan ta patil.

¹¹ Ha scuentahil ya jc'ancotic te yacuc ac'opombotcotic Dios; yu'un hich te bin ut'il ay tsobolic te ya sc'opombotcotic Dios, ha nix hich ay tsobolic te ya yalbeyic wocol Dios ta jcuentacotic yu'un te mahtanil a'bibilotcotique.

Bin yu'un Pablo ma orahuc baht ta Corinto

¹² Hich ay te bin ya xtohy q'uinal ya ca'iycotic yu'un: Ha te ya yal te co'tancotic te smelelil soc ta scuenta jun-o'tanil te ya yac' te Dios hich a'tejotcotic ta bahlumilal, soc c'ax to xan hich a ta awohlilic. Ma hichuc la jpascotic ta scuenta sp'ijil ch'ich'-baq'uet, ha la jpascotic ta scuenta yutsil yo'tan te Diose.

¹³ Mayuc yan bin ya jts'ihbabeyex, ha nax te bin ya xhu' yac awilic ta hun soc te yac ana'beyic scuentahil; soc co'tanuc te ya xc'oht ta awo'tanic spisil,

¹⁴ hich te bin ut'il ana'ojiquix jtebuc, scuenta yu'un ta sc'ahc'alel te Cajwaltic Jesús ya xhu' ya xtohy q'uinal awa'iyic ta jcuentacotic hich te bin ut'il ya xtohy q'uinal ca'iycotic ta acuentahique.

¹⁵ Te bin ut'il hich sch'uhunej co'tan, la jc'an te ha nahil ya quilex scuenta yu'un yac atahic stse'elil awo'tanic cheb buelta a.

¹⁶ La jnop te ya xc'ax quilex te c'alal ya xbohon ta Macedonia, soc te c'alal ya suhton tal ta Macedonia ya xc'ax jcha'ilex xan yu'un hich yac acoltayonic xan bahel ta Judea.

¹⁷ Te bin ut'il hich la jnop ya jpas ¿yu'un bal hich nax la jnop ta co'tan? Te bin ya jnop ya jpas ¿yu'un bal hich ya jnop ta scuenta ch'ich'-baq'uet, scuenta yu'un schebal ya cal: Yac soc Ma'uc?

¹⁸ Pero hich te bin ut'il smelelil stalel jun yo'tan te Diose, te bin ya calbeyexcotic ma ha'uc: Yac soc Ma'uc, ma xchihotcotic.

¹⁹ Como te Snich'an Dios, ha te Jesucristo, te la jcalbecotiquix sc'oblal ta atojolic —ho'on soc Silvano soc Timoteo— ma ha'uc: Yac soc Ma'uc, xchi, pero ha nax: Yac, xchi ta scuenta Cristo,

²⁰ como spisil bintic yaloj ta jamal te Diose: Yac, xchi sc'oblal ta scuenta Cristo. Ha yu'un te ta scuenta Cristo ho'otic ya caltic: Hichuc, xchihotic, ta scuenta yutsilal te Diose.

²¹ Ha nix te Dios te ya yac' te ay yip co'tantic ta stojol Cristo, ho'otcotic soc ha'ex, soc te parte la yac'otic,

²² ha nix la ya'botic sello soc la ya'botic ta co'tantic te Espíritu scuenta seña yu'un te bin ya xtale.

²³ Ya cac' ta testigo cu'un te Dios te ha ta scuenta sna'beyel yo'bolil abahic te ma to ba c'axemon ta Corinto.

²⁴ Ma yu'unuc ya ca'batincotic te bin yac ach'uhunic, ha jmohlol jbahtic ta a'tel scuenta yu'un ayuc stse'elil awo'tanic, como ha ta scuenta sch'uhunel awo'tanic te ay yip awo'tanique.