1 Samuel 5 - Bible in Tzeltal Bachajón

Scaxahul chapbil-c'op ta sq'uinal filisteohetic

¹ Te filisteohetic, c'alal la spojic te scaxahul te chapbil-c'op yu'un Dios, la yich'ic hahchel ta Eben-ezer, bahtic soc ta Asdod.

² La yotsesic te scaxahul te chapbil-c'op ta templo yu'un Dagón, la yaq'uic ta sts'ehl te Dagón.

³ C'alal hahchic ta sab ta yan c'ahc'al te mach'atic ayic ta Asdod, pacal ta lum a te Dagón ta stojol te scaxahul te chapbil-c'op yu'un Jehová. La stamic hahchel te Dagón, la yaq'uic ta yawil.

⁴ Pero c'alal hahchic ta sab ta yan c'ahc'al pacal ta lum yan buelta te Dagón ta stojol te scaxahul te chapbil-c'op yu'un Jehová, soc te sjol te Dagón soc schebal sc'ab waq'uemic ta smarcohil te puerta; ha xanix wolol hilel smuc'ul te Dagón.

⁵ Ha scuentahil te sacerdotehetic yu'un Dagón soc spisil te mach'atic ya x'ochic bahel ta templo yu'un Dagón ta Asdod ma ba ya stec'beyic ye'tal te smarcohil c'alal ora.

⁶ Tulan c'oht te sc'ab Jehová ta stojol te mach'atic ayic ta Asdod soc ta sjoyobal, la sjinticlan soc la yac'ticlambe coluc siht'el.

⁷ C'alal hich la yilic, hich la yalic te mach'atic ayic ta Asdod: Ma me xhil ta cohliltic te scaxahul te chapbil-c'op yu'un te Dios yu'un Israel, yu'un tulan yac'oj tal sc'ab ta jtojoltic soc ta stojol te Dagón te dios cu'untique, xchihic.

⁸ Ha yu'un la sticonic ta iq'uel tal spisil te príncipaletic yu'un te filisteohetic, hich la sjoc'obeyic: ¿Bin ya jpascotic soc te scaxahul te chapbil-c'op yu'un te Dios yu'un Israel? xchihic. C'asesahic bahel ta Gat te scaxahul te chapbil-c'op yu'un te Dios yu'un Israel, xchihic. Hich la sc'asesic bahel tey a te scaxahul te chapbil-c'op yu'un te Dios yu'un Israel.

⁹ Pero te c'alal la yich'ic bahel tey a, tulan la yac' tal sc'ab te Jehová ta scontrahinel te pueblo, la yac' buen xiwel; soc la ya'be swocolic te mach'atic ayic ta pueblo, muc' biq'uit hahch siht'el yu'unic.

¹⁰ Ha yu'un la sticonic bahel ta Ecrón te scaxahul te chapbil-c'op yu'un Dios. Pero c'alal c'oht ta Ecrón, te mach'atic ayic ta Ecrón hich hahchic ta aw: La yich'botiquix tal te scaxahul te chapbil-c'op yu'un te Dios yu'un Israel scuenta yu'un ya smilotic soc te jlumaltic, xchihic ta xiwel.

¹¹ Ha yu'un la sticonic ta iq'uel te príncipaletic yu'un te filisteohetic, hich la yalbeyic: Ticonahic bahel te scaxahul te chapbil-c'op yu'un te Dios yu'un Israel, ac'a suhtuc bahel ta banti te lugar yu'un, scuenta yu'un ma ba ya smilotcotic soc te jlumalcotic, xchihic; como ay buen tulan xiwel scuenta lajel ta spisil te pueblo, como tulan yac'oj sc'ab Dios tey a.

¹² Te mach'atic ma ba chamic, a'botic siht'el; te aw yu'un te pueblo c'oht c'alal ta ch'ulchan.