1 Samuel 31 - Bible in Tzeltal Bachajón

Laj Saúl soc snich'nab

¹ Te filisteohetic la ya'beyic guerra te Israel. Te israeletic loq'uic ta ahnel ta stojol te filisteohetic; bayel lajic ta wits Gilboa.

² Te filisteohetic la snutsic bahel te Saúl soc te snich'nab, la smilic te Jonatán, Abinadab soc Malquisúa, te snich'nab Saúl.

³ Tulanij te guerra ta stojol Saúl. C'alal tahot yu'un te j'ac'-t'ihmalte'etic, la yehchentesic ta tulan.

⁴ Ha yu'un te Saúl la yalbe te jcuch-a'tejibal yu'un: Loq'uesa te espada awu'un, lowahon a scuenta yu'un ma ha'uc ya xtal slowon ta espada te mach'atic ma ba yich'ojic circuncisión, te hich ya slabanonic a, xchi. Pero te jcuch-a'tejibal yu'un ma ba la sc'an, yu'un bayel xiw. Ha yu'un te Saúl la stsac te espada yu'un, la syahltes sba ta sni'il.

⁵ Te c'alal la yil te jcuch-a'tejibal yu'un te lajix te Saúl, ha nix hich la syahltes sba ta sni'il te espada yu'un, pajal laj soc.

⁶ Hich laj te Saúl soc te snich'nab, te jcuch-a'tejibal yu'un soc spisil te winiquetic yu'une.

⁷ Te israeletic te ayic ta jehch spamlej soc te ayic ta jehch muc'ul-ha' Jordán, c'alal la yilic te ahniquix bahel te soldadohetic yu'un Israel soc te lajix te Saúl soc te snich'nab, la yihquitayic hilel te pueblohetic yu'unic, loq'uic ta ahnel. Te filisteohetic talic ta nahinel tey a.

⁸ Ta yan c'ahc'al, c'alal bahtic te filisteohetic ta spojbeyel sbiluc te chamen winiquetic, c'oht stahic te Saúl soc te snich'nab xach'ajtic ta wits Gilboa.

⁹ La xot'beyic loq'uel sjol soc la yich'beyic te ya'tejibic; la sticonic ta halel ta spahmal sq'uinal filisteo scuenta yu'un ya ya'iyic ta banti te templohetic yu'un te loc'ombahetic yu'unic soc te ants-winiquetic te bin lec c'ohtix ta pasele.

¹⁰ La ya'beyic ta templo yu'un Astarot te ya'tejib te Saúl soc la sjihpambeyic te sbaq'uetal ta sts'ahcul te Bet-sán.

¹¹ C'alal la ya'iyic te mach'atic ayic ta Jabes yu'un Galaad te bin la spasbeyic te Saúl te filisteohetic,

¹² spisil te winiquetic te ay yip yo'tanic behenic bahel sjunal ahc'abal. La scohtesbeyic te sbaq'uetalic te Saúl soc te snich'nab ta sts'ahcul te Bet-sán, suhtic tal ta Jabes, tey hul schic'beyic a.

¹³ La stsobeyic te sbaquelic, la smuquic ta ye'tal te' ta Jabes, soc la scom swe'elic huqueb c'ahc'al.