1 Samuel 29 - Bible in Tzeltal Bachajón

Filisteohetic ma ba la smuc'ulin yo'tanic David

¹ Te filisteohetic la stsob sbahic ta spisilic ta Afec, te Israel la spas scampamentohic ta sloq'uib-ha' te ay ta Jezreel.

² Te príncipaletic yu'un te filisteohetic, c'alal yacalic ta behel bahel soc te ho'ho'winic (100) soc ta jujumil (1,000) ta tuhl soldadohetic yu'unic, te David soc te winiquetic yu'un yacalic ta behel ta slajibal soc Aquis.

³ Te jtsobawetic yu'un te filisteohetic hich la yalic: ¿Bin ya spasic li'i te hebreohetique? xchihic. Te Aquis hich la sjac'be sc'op te jtsobawetic yu'un te filisteohetic: ¿Ma bal yac awilic te ha te David te ya'bat Saúl, ajwalil yu'un Israel? Sjoquinejon bayel c'ahc'al. Mayuc jtahbeyej falta yu'un te jayeb c'ahc'al te c'axix tal ta jtojol c'alal ora, xchi.

⁴ Pero te jtsobawetic yu'un te filisteohetic ilinic ta stojol Aquis, hich la yalic: Ticona suhtel te winic ini, ac'a bahtuc ta lugar te awa'beyej. Ma me xtal sjoquinotic ta guerra, teme repente ya sut sba ta jcontratic te c'alal yacotiquix ta guerra a. ¿Como bin a te ya scha'lecubtesbe yo'tan te yajwal ta stojol, ma bal ha'uc te ya yich'be bahel sjolic te winiquetic ini?

⁵ ¿Ma bal ha'uc te David te hich c'ayojtayot ta ahc'ot: Te Saúl la smil bayel ta mil ta tuhl, te David la smil bayel ta lajunmil ta tuhl, te xchihe? xchihic.

⁶ Ha yu'un te Aquis la sticon ta iq'uel tal te David, hich la yalbe: ¡Yiloj Jehová, te ha'at tojat ta winiquil! Lec ya quil te pajal ya xloc'otic bahel soc ya x'ochotic tal ta campamento. Mayuc bin chopol jtahoj ta acuenta jayebix c'ahc'al te hulat ha to c'alal ora ini; pero te jtsobawetic ma lecuc ya yilat stuquelic.

⁷ Suhtan bahel, lamaluc me q'uinal ya xbahat, hich mayuc bin ya xbohlob yo'tanic a te jtsobawetic yu'un te filisteohetique, xchi.

⁸ Te David la yalbe te Aquis: ¿Bin jpasoj? ¿Bin atahbeyej te a'bat awu'un te c'alal ochon ta a'batinel awu'un c'alal ora ini, te ma xhu' ya xbohon ta ya'beyel guerra te scontratac te ajwalil cu'une? xchi.

⁹ La sjac' te Aquis: Ya jna' te lecat ta winiquil ta jtojol, hichat te bin ut'il ch'ul a'bat yu'un Dios. Pero te jtsobawetic yu'un te filisteohetic la yalbonic: Ma me xtal sjoquinotic ta guerra, xchihic.

¹⁰ Ha yu'un ya me shahchat ta sab soc te a'batetic yu'un te ajwalil awu'un te sjoquinejat, ya me xloc'at bahel ta sacubel q'uinal, xchi.

¹¹ Hich te David soc te winiquetic yu'un hahchic ta sab yu'un ya suhtic bahel ta sq'uinal te filisteohetique. Yan te filisteohetic bahtic ta Jezreel.