1 Samuel 24 - Bible in Tzeltal Bachajón

David ma ba la smil Saúl ta En-gadi

¹ Te c'alal quehchaj ta snutsel te filisteohetic te Saúl, hich halbot ya'iy: Ay ta jochol taquin q'uinal yu'un En-gadi te David, xchihic.

² Ha yu'un te Saúl la yic' bahel lajunwinic swaxacbahc' (3,000) winiquetic te tsahbilic ta spisil Israel, baht sle te David soc te winiquetic yu'un ta sacal ch'entiquil ta witsiltic yu'un ha'mal tentsunetic.

³ C'alal c'oht ta banti ay corraletic yu'un tuminchijetic ta ti' be, ay ch'en tey a, och bahel tey a te Saúl ta stsa'nel. Te David soc te winiquetic yu'un huhcajtic ta sc'ubulil te ch'ene.

⁴ Ha yu'un te winiquetic yu'un la yalbeyic te David: Ilawil, c'ohtix te sc'ahc'alel te hich la yalbat te Jehová: Ilawil, ya ca'bat ta ac'ab te acontra, ya me apasbe te bin ya sc'an awo'tan, xchihic. Hich hahch bahel te David, muquen la set'be loq'uel jxeht' sti'il snahtil-c'u' te Saúl.

⁵ Patil la sna' te ma lecuc te bin la spas, como la set'be loq'uel jxeht' sti'il smuc'ul-c'u' te Saúl.

⁶ Hich la yalbe te swinictac: Ha me ac'a scomon te Jehová te hich ya jpasbe te cajwal, te mach'a tsahbil yu'un Jehová. ¡Ma ba ya hach jc'ab ta scontrahinel, como ha tsahbil yu'un Jehová! xchi.

⁷ Ta scuenta te c'op ini te David la scom te winiquetic yu'un, ma ba la ya'be shach sc'abic ta scontrahinel te Saúl. Loc' tal ta ch'en te Saúl, hahch xan ta behel.

⁸ Ha nix hich loc' talel ta ch'en te David, hahch yawtay te Saúl: ¡Cajwal, te ajwalil cu'un! xchi. Te c'alal la sut sit ta spat te Saúl, te David la snijan sba ta lum ta yich'el ta muc'.

⁹ Hich la yalbe te Saúl: ¿Bin yu'un yac awa'iybe sc'op te mach'atic hich ya yalic: Te David ya sc'an ya ya'bat wocol, te xchihique?

¹⁰ Yo'tic la awilix ta asit bin ut'il Jehová la yac'at ta jc'ab ta ch'en. Ay la yalbonic te yacuc jmilat, pero ma hichuc la jpas, yu'un hich la jcal: Ma ba ya hach jc'ab ta scontrahinel te cajwal, como ha tsahbil yu'un Jehová, xchihon.

¹¹ Ilawil, jtat, te sti'il anahtil-c'u' quich'oj ta jc'ab. La jset'bat loq'uel pero ma ba la jmilat. Na'a me te mayuc bin chopol o aq'uel ta c'abal te jnopoje. Mayuc jtahoj jmul ta atojol, pero ha'at yac alehbelon yu'un yac amilon.

¹² Te Jehová ac'a yilotic ta jchebaltic, soc ac'a spacbon jc'abal ta atojol stuquel. Yan te ho'one ma ba ya hach jc'ab ta atojol.

¹³ Ay antiguo c'op te hich ya yal: Ya xloc' tal te bin chopol ta yo'tan mach'atic chopolic, te xchihe; pero te ho'one ma ba ya hach jc'ab ta atojol.

¹⁴ Te ajwalil yu'un Israel ¿mach'a loc' tal scontrahin? ¿Mach'a a te yac anutsbel? ¿Jcoht bal chamen ts'i'? ¿Jcoht bal ch'ac?

¹⁵ Te Jehová ha juez ya xc'oht cu'untic, ya me yilotic ta jchebaltic. Ha ac'a yil soc ac'a c'opojuc cu'un, ac'a yac'on ta libre ta ac'ab, xchi.

¹⁶ C'alal laj yo'tan ta c'op te David, hich la yal te Saúl: ¿Ha bal ac'op ini, jnich'an David? xchi. Hich tulan awon ta oq'uel te Saúl,

¹⁷ hich la yalbe te David: Ha'at c'ax hich toj awo'tan a te bin ut'il te ho'one, yu'un lec te bin la apasbon, yan te ho'one chopol bin la jpasbat.

¹⁸ Yo'tic la awaq'uix ta ilel te bin lec la apasbon. Te Jehová la yac'onix ta ac'ab, pero ma ba la amilon.

¹⁹ Como ¿mach'a a te ya sta scontra te lec ya scoltay bahele? Te Jehová ac'a stojbat te bin lec, yu'un te bin la apasbonix ha'i c'ahc'al ini.

²⁰ Yo'tic ya jna'ix te melel ya x'ochat ta ajwalil, soc te ban c'alal smacoj te Israel ya me yich' yip ta acuenta.

²¹ Yo'tic jc'axel me xawalbon ta jamal ta stojol Jehová te ma ba yac alajimbon te jts'umbal ta patil bahel o te yac atup'bon te jbihil ta sna te jtate, xchi.

²² Ha yu'un te David hich jc'axel la yalbe ta jamal te Saúl. Hich suht bahel ta sna te Saúl, yan te David soc te swinictac mohic bahel ta ahnibal.