1 Samuel 23 - Bible in Tzeltal Bachajón

David ta jochol taquin q'uinal

¹ Hich halbot te David: Te filisteohetic yac ta ya'beyel guerra te Keila soc yac yelc'ambelic te trigo ta sq'uiyojibal yu'unic, xchi.

² Ha yu'un te David la sjoc'obe te Jehová: ¿Ya bal ca'be guerra te filisteohetic? xchi. Jac'bot yu'un te Jehová: Bahan, a'beya guerra te filisteohetic, coltaya te Keila, xchi sc'oblal.

³ Pero te winiquetic sjoquinejic te David hich la yalbeyic: Li' ta sq'uinal Judá ayotcotic ta xiwel, ¿ha'uc to balix a teme ya xbohotic ta Keila ta ya'beyel guerra te soldadohetic yu'un te filisteohetique? xchihic.

⁴ Ha yu'un te David baht sjoc'obe xan te Jehová. Te Jehová hich la yalbe: Hahchan, cohan bahel ta Keila, ho'on ya ca'bat ta ac'ab te filisteohetique, xchi.

⁵ Ha yu'un te David baht soc te winiquetic yu'un ta Keila, la ya'be guerra te filisteohetique. La yic'be bahel te schansbahlamic soc bayel la smilic hilel. Hich la scoltay Keila te David.

⁶ Te Abiatar snich'an Ahimelec, te baht ta ahnel ta stojol David, yich'oj bahel ta Keila te efod.

⁷ Halbot te Saúl te bahem ta Keila te David. Ha yu'un la yal te Saúl: Dios la ya'bonix ta jc'ab, la smaquix sba ta yutil pueblo te ay sts'ahcul soc ochibaletic soc sc'atal-te'eletic yu'un, xchi.

⁸ Hich te Saúl la tsob tal spisil te soldadohetic yu'un scuenta yu'un ya xco bahel ta Keila ta sjoytayel David soc te winiquetic yu'une.

⁹ C'alal la ya'iy te David te bin chopol snopoj te Saúl, hich la yalbe te sacerdote Abiatar: Ich'bon tal te efod, xchi.

¹⁰ La yal te David: Jehová, Diosat yu'un Israel, ya'iyejix te a'bat awu'un te snopoj te Saúl te ya xtal ta Keila yu'un ya slajin ta jcuenta.

¹¹ ¿Ya bal yac'onic ta sc'ab Saúl te mach'atic ayic ta Keila? ¿Ya bal xtal te Saúl hich te bin ut'il ya'iyej te a'bat awu'une? Jehová, Diosat yu'un Israel, awocoluc halbeya te a'bat awu'une, xchi. Yac, ya xco tal, xchi te Jehová.

¹² Te David la sjoc'oy xan: Te mach'atic ayic ta Keila ¿ya bal yac'onic ta sc'ab Saúl soc te winiquetic cu'un? xchi. Yac, ya yaq'uex ta sc'ab, xchi te Jehová.

¹³ Ha yu'un te David loc' bahel ta Keila soc te lajunwinic scha'bahc' (600) winiquetic yu'un, xmelmonic bahel ta yantic lugaretic. C'alal la ya'iy te Saúl te loq'uix bahel ta ahnel ta Keila te David, ma ba bahtix tey a.

¹⁴ Te David hil ta jochol taquin q'uinal ta ahnibal-ch'entiquil, ta witsiltic ta jochol taquin q'uinal Zif. Te Saúl jujun c'ahc'al la sle te David, pero ma ba ac'ot ta c'abal yu'un te Diose.

¹⁵ Ay ta Hores ta jochol taquin q'uinal Zif a te David c'alal la ya'iy te loq'uem tal ta lehaw te Saúl yu'un ya smil.

¹⁶ Te Jonatán te snich'an Saúl tal ta banti ay David ta Hores, la ya'be yip yo'tan ta scuenta Dios,

¹⁷ hich la yalbe: Ma xiwat, ma ba ya stahat te jtat Saúl. Ha'at me ya x'ochat ta ajwalil yu'un Israel, yan te ho'one patil ya xc'ohon awu'un. Hich nix sna'ojix te jtat Saúl, xchi.

¹⁸ Schebalic la schap sc'opic ta stojol Jehová. Te David hil ta Hores, yan te Jonatán suht bahel ta sna.

¹⁹ Patil te mach'atic ayic ta Zif hich baht yalbeyic te Saúl ta Gabaa: Snac'oj sba te David ta jq'uinalcotic ta ahnibal-ch'entiquil te ay ta wits Haquila ta Hores, te ay ta stojol sur yu'un te jochol taquin q'uinal.

²⁰ Ha yu'un, ajwalil, cohan tal teme hich ya sc'an awo'tan, ho'otcotic ya ca'becotic ta sc'ab te ajwalile, xchihic.

²¹ La yal te Saúl: Ac'a ya'beyex bendición te Jehová te bin ut'il la ana'bonic yo'bolil jba.

²² Bahanic, tsahtaya awilic ta lec banti mero snac'oj sba soc mach'a a te yiloj te tey ay a; como halbotonix te ya sna' bin ya yut ya scoltay sba.

²³ Ilawilic ta lec hiche soc halbonic ca'iy spisil te banti ya snac'ticlan sba. Patil suhtanic talel, ya me awa'bonic jna', hich ya joquinex bahel. Teme tey ay a, xtiq'uet ya jle ta yohlil jujuchahp sts'umbal Judá, xchi.

²⁴ Hich bahtic ta Zif, nahilijic bahel yu'un Saúl. Pero te David soc te winiquetic yu'un ayic ta jochol taquin q'uinal ta Maón, ta Arabá te ay ta sur yu'un te jochol taquin q'uinal.

²⁵ Te Saúl soc te winiquetic yu'un baht slehic. C'alal hich halbot te David, co bahel ta muc'ul ton, tey hil a ta jochol taquin q'uinal yu'un Maón. C'alal hich la ya'iy te Saúl, baht ta jochol taquin q'uinal yu'un Maón ta slehel te David.

²⁶ Te Saúl yac ta behel ta jehch wits, yan te David soc te winiquetic yu'un yaquic ta behel ta yan jehch wits. Te David yac'oj fuersa ta ahnel ta stojol te Saúl, pero te Saúl soc te winiquetic yu'un sjoytayejiquix te David soc te winiquetic yu'un, scuenta yu'un ya stsaquic.

²⁷ Ta hich ora tal ta halbeyel yu'un jtuhl winic te Saúl: ¡La' me ta ora! La yochintaybotiquix jq'uinaltic te filisteohetic, xchi.

²⁸ Hich te Saúl la yihquitay snutsel te David, baht stsac sba soc te filisteohetique. Ha scuentahil te la ya'be sbihilin te lugar, Sela-hama-lecot.

²⁹ Ha yu'un te David loc' bahel tey a, baht ta nahinel ta ahnibal-ch'entiquil ta En-gadi.