1 Samuel 20 - Bible in Tzeltal Bachajón

Jonatán sc'uxultaywanej sba soc David

¹ Ta patil, te David loc' bahel ta ahnel ta Naiot te ay ta Ramá, c'oht ta stojol Jonatán, hich la yal: ¿Bin la jpas ho'on? ¿Bin chopol jpasoj o bin jmul jtahoj ta stojol atat, te yac slehbelon yu'un ya smilon? xchi.

² Mayuc; ma ba ya xlajat. Mayuc bin ya spas te jtat, teme bin muc' o tut, te ma ba ya yalbon. ¿Bin yu'un ya smucbon ta yo'tan te jtate? Ma hichuc ay, xchi te Jonatán.

³ Te David la scha'hal xan ta jamal: Te atat sna'oj te lec awo'tan cu'un, hich wan ya yal: Ma me x'a'bot sna' ini te Jonatán scuenta yu'un ma ba ya smel yo'tan a, xchi. ¡Yiloj Jehová, soc cuxulat! jihm xanix ta ocal quiloj jba soc te lajele, xchi.

⁴ Te Jonatán la yalbe te David: Ya jpas ta atojol te bin ya sc'an awo'tan, xchi.

⁵ Te David la sjac'be te Jonatán: Ilawil, ha'ix yach'il u pajel, ya sc'an te ya juhcan jba ta we'el soc te ajwalil; pero ac'awon te ya jnac' jba ta aquiltic ha to ta tibiltic cha'bej.

⁶ Teme ya sjoc'oyon te atat, hich xawalbe: La yalbon wocol te yacuc xbaht ta slumal ta Belén, como spisil te mach'atic ay yu'un ya yaq'uic te milbil mahtanil scuenta jujun ha'bil, xchihan me.

⁷ Teme hich ya yal: Lec ay, teme xchihe, hich jun yo'tan a te awa'bate; yan teme ya x'ilin yu'un, ya me ana' te ay bin chopol ya spasbon.

⁸ C'uxultaya hiche te a'bat awu'un, como ha'at la awal te ya jchap jc'optic ta stojol Jehová. Teme ay mulil ta jtojol, milawon ha'at, ma fuersahuc yac awic'on bahel ta stojol te atate, xchi.

⁹ Te Jonatán la yalbe: ¡Mayuc bin ora te hich ya xc'oht ta atojol! Teme ay la jca'iy te ay bin chopol ya spasbat te jtate, ¿ma bal yacuc calbat te hichuque? xchi.

¹⁰ Ha yu'un te David la yalbe te Jonatán: ¿Mach'a ya yalbon ca'iy teme ma lecuc ya sjac'bat te ac'ope? xchi.

¹¹ Te Jonatán la yalbe te David: La', loc'ucotic bahel ta aquiltic, xchi. Hich loq'uic bahel schebalic ta aquiltic.

¹² Hich la yalbe David te Jonatán: ¡Ha me testigo te Jehová te Dios yu'un Israel! c'alal la joc'obeyix a te jtat ta hichilan ora pajel o cha'bej, teme lec yo'tan ta stojol David, ya jticombat ta halbeyel.

¹³ Pero teme chopol bin snopoj ya spasbat te jtate, hich me ac'a spasbon Jehová, soc c'axem to xan hich a, teme ma ba ya ca'bat ana' yu'un lamal q'uinal ya xbahat. Ac'a sjoquinat te Jehová, hich te bin ut'il la sjoquin te jtate.

¹⁴ Teme cuxul ya xhilon, c'uxultayawon hich te bin ut'il ya xc'uxultaywan te Jehová; teme ya xlajon,

¹⁵ ma me ayuc bin ora ya xch'ay sc'uxul awo'tan ta stojol te mach'atic ay cu'un. C'alal Jehová ya slajin ta q'uinal jujutuhl te scontra David, ma me xawac' ch'ayuc te sbihil Jonatán ta sna David, xchi.

¹⁶ Hich te Jonatán la schap sc'op soc te mach'atic ay yu'un David; hich la yal: Te Jehová ac'a yich'be ta c'op te scontra te David, xchi.

¹⁷ Te Jonatán la ya'be ya yal ta jamal yan buelta te David, yu'un hich c'ux ta yo'tan te bin ut'il c'ux ya ya'iy sba.

¹⁸ Patil te Jonatán hich la yalbe te David: Ha yach'il u pajel, ya me xchicnaj te ma ba tey ayat a, como jochol ya xhil te ahuctajibe.

¹⁹ Ta yoxebal c'ahc'al ya me xcohat bahel ta banti anac'oj aba te bin ora hahch te awocole, tey ya xhilat a ta banti te ton yu'un Ezel.

²⁰ Ya jt'im bahel oxeb ya'tejibal jt'ihmalte' ta jehch, hich yilel te yacon ta blanco.

²¹ Ta patil ya jticon bahel te a'bat, hich ya calbe: Bahan, leha tal te ya'tejibal jt'ihmalte', xchihon. Teme ya calbe: Te ya'tejibal jt'ihmalte' ma sta c'ohel ta banti ayat, ich'a talel, teme xchihone, ya me xtalat, como lamal q'uinal ta atojol. ¡Yiloj Jehová! mayuc bin chopol ya xc'oht ta acuenta.

²² Yan teme hich ya calbe te quereme: Te ya'tejibal jt'ihmalte' tey to ay bahel ta ajehchelul, teme xchihone, bahan me, yu'un te Jehová ya sc'an te ya xbahat.

²³ Te bin jchapojtic ta jchebaltic, ha'uc stalel testigo cu'untic te Jehová, xchi.

²⁴ Ha yu'un te David la snac' sba ta aquiltic. Te c'alal c'oht yorahil te q'uin scuenta yach'il u, te ajwalil la shuhcan sba ta we'el ta mesa.

²⁵ La shuhcan sba ta shuctajib te ajwalil tey ta nopol pahc' ta banti c'ahyem, te snuhp'usitayej sba soc Jonatán; te Abner huhcaj ta xuhc Saúl, te shuctajib David jochol hilel stuquel.

²⁶ Pero mayuc bin la yal te Saúl ta yorahil, como la yal ta yo'tan: Ay wan bin la spas te ma ba lec sc'oblal yu'un; ma to ba slecubtesej sba, xchi.

²⁷ Pero ta schebal c'ahc'al te q'uin yu'un yach'il u, ha nix hich jochol hil te shuctajib David. Te Saúl la sjoc'obe te Jonatán te snich'an: ¿Bin yu'un ma ba tal ta we'el wojey soc yo'tic te snich'an Isaí? xchi.

²⁸ Te Jonatán la sjac'be te Saúl: Te David bayel la yalbon wocol yu'un ya cac' bahel ta Belén.

²⁹ Hich la yal: Awocoluc ac'awon bahel, como te mach'atic ay cu'un ya yaq'uic milbil mahtanil ta jlumal, soc la spason ta mandar te jbanquile; ha yu'un, teme lec awo'tan cu'un, ac'awon bahel yu'un ya quil te jbanquiltac, xchi. Ha yu'un ma ba tal shuhcan sba ta smesa te ajwalil, xchi.

³⁰ Hich hahch yilimba Saúl ta stojol Jonatán, hich la yalbe: Yalat chopol toyba-ants. ¿Yu'un bal ma ba jna'oj te jun awo'tan aba soc te snich'an Isaí te q'uexlaltic sba ta atojol soc ta stojol anan?

³¹ Como te jayeb c'ahc'al cuxul ta bahlumilal te snich'an Isaí, mayuc awip yac ata soc ma ba ya x'ochat ta ajwalil. ¡Ticombon ta iq'uel tal, yu'un ya sc'an ya yich' milel! xchi.

³² Te Jonatán la sjoc'obe te Saúl te stat: ¿Bin yu'un ya yich' milel? ¿Bin spasoj hiche? xchi.

³³ Ha yu'un te Saúl la syalbay ta lanza yu'un ya smil. Tey la sna' a te Jonatán te snopoj ta yo'tan te stat te ya smil te David.

³⁴ Hich bayel ilinem yo'tan a loc' hahchel ta mesa te Jonatán, ma ba we'ix ta schebal c'ahc'al yu'un te q'uin yu'un yach'il u ta scaj te bayel la smel yo'tan yu'un te David, como ac'ot ta q'uexlal yu'un te state.

³⁵ Ta sab yu'un schebal c'ahc'al loc' bahel ta aquiltic te Jonatán ta yorahil te schapoj soc David; joquinot yu'un tut querem.

³⁶ Hich la yalbe te querem: Ahnimajan, ya me ale tal te ya'tejibal jt'ihmalte' te ya jt'im bahel, xchi. Te c'alal yac ta ahnimal bahel a te querem, te Jonatán la st'im bahel ta tulan te ya'tejibal st'ihmalte' yu'un ya sohl bahel ta sjehchelul.

³⁷ Te c'alal c'oht te querem tey ta banti yahl cohel te ya'tejibal st'ihmalte' la st'im bahel te Jonatán, hich la yawtay te querem: ¿Ma bal sohlemuc bahel te ya'tejibal t'ihmalte' te banti ayate? xchi ta aw.

³⁸ Te Jonatán la yawtay xan te querem: ¡Suja aba, ahnimajan, ma xatehc'an aba! xchi. Te ya'bat te Jonatán la stam tal te ya'tejibal t'ihmalte', tal ta stojol te yajwal.

³⁹ Pero mayuc bin la sna' stuquel te querem, ha nax stuquel te Jonatán soc David sna'ojic te bin scuentahil.

⁴⁰ Patil te Jonatán la ya'be te ya'tejib yu'un guerra te querem, soc hich la yalbe: Bahan, ich'a suhtel ta pueblo, xchi.

⁴¹ Te c'alal bahtix a te quereme, loc' tal te David ta sts'ehl te ton, oxeb buelta la spahcan sba c'alal ta lum ta stojol; la yuhts'uy sbahic soc la yoq'uetay sbahic, ha tulan xan oc' a te David.

⁴² Te Jonatán hich la yalbe te David: Jun awo'tan xbahat, como jchebaltic hich calojtic ta jamal ta scuenta sbihil Jehová: Ha testigo ta jtojoltic spisil ora te Jehová soc ta stojol ats'umbal soc te jts'umbale, xchi. Hich loc' bahel te David, yan te Jonatán suht bahel ta pueblo.