1 Samuel 18 - Bible in Tzeltal Bachajón

Jonatán soc David la schap sc'opic

¹ C'alal laj yo'tan ta c'op soc Saúl te David, te Jonatán mero jun sch'uhlel la ya'iy sba soc David, c'ux la ya'iy ta yo'tan hich te bin ut'il c'ux ya ya'iy sba.

² Ta hich ora te Saúl la yic' ta stojol, ma ba la yac' suhtel ta sna stat.

³ Te Jonatán la schap sc'op soc David, como c'ux la ya'iy ta yo'tan hich te bin ut'il c'ux ya ya'iy sba.

⁴ Te Jonatán la schol te smuc'ul-c'u' slapoj, la ya'be te David, soc te yan sc'u' spac', te espada yu'un, st'ihmalte' soc schuhquil sch'uht.

⁵ Te David ya xbaht ta bayuc ya xticonot yu'un Saúl; lec spisil te bintic la spas. Hich te Saúl la ya'be scuentahin te soldadohetic yu'un; lec ta o'tanil yu'un spisil te pueblo soc te a'batetic yu'un Saúl.

Saúl xut'et yo'tan ta stojol David

⁶ C'alal yacalic ta suhtel tal te soldadohetic, c'alal David la smil te filisteo, ta spisil te pueblohetic yu'un Israel loq'uic tal antsetic ta stahel te ajwalil Saúl, yacalic ta c'ayoj soc ahc'ot, yacalic ta stijel pandero soc ya'tejibic yu'un c'ayoj, soc tse'el yo'tanic ta c'ayoj.

⁷ Te c'alal yacalic ta ahc'ot a te antsetic, hich yacalic ta yalel ta c'ayoj: Te Saúl la smil bayel ta mil ta tuhl, te David la smil bayel ta lajunmil ta tuhl, xchihic.

⁸ Mero ilin yu'un te Saúl, ma lecuc la ya'iy te bin la yich' halele, hich la yal: Te David ya ya'beyic ta scuenta smilel bayel ta lajunmil (10,000) ta tuhl, yan te ho'one bayel ta mil (1,000) ta tuhl. Ha xanix te ma x'och ta ajwalil, xchi.

⁹ Ta hich ora te Saúl hahch sti'ti'o'tantay te David.

¹⁰ Ta schebal c'ahc'al hul soc yip ta stojol Saúl bohl espíritu ticombil tal yu'un Dios; hahch ta sohquel sjol ta yutil sna. Te David yac ta stijel arpa a, hich te bin ut'il ya spasulan ta spisil ora. Te Saúl yich'oj lanza ta sc'ab,

¹¹ la syalbay ta slanza, yu'un la yal: Ya me jts'ap ta pahc' ta lanza te David, xchi. Pero te David cheb buelta la sc'ases.

¹² Te Saúl la xi' te David, como joquimbil yu'un Jehová, yan te Saúl ihquitaybilix yu'un Jehová stuquel.

¹³ Ha yu'un te Saúl la sloq'ues bahel te David ta stojol, la yotses ta jtsobaw yu'un lajunwinic yoxbahc' (1,000) soldadohetic. Hich te David ya yic' bahel ta guerra soc ya yic' suhtel tal.

¹⁴ Lec c'oht spisil te bintic la spas, como joquimbil yu'un te Jehová.

¹⁵ C'alal la yil te Saúl te lec c'oht spisil bintic la spas, la xi' yu'un.

¹⁶ Pero ta spisil Israel soc Judá c'ux ya ya'iyic ta yo'tanic te David, como ha ya x'ic'otic bahel ta guerra soc ya x'ic'otic suhtel tal yu'un.

¹⁷ Ha yu'un te Saúl hich la yalbe te David: Ilawil, ya ca'bat awic' te cantsil-nich'an Merab, ha te wixil, teme ay yip awo'tan soc teme ya xbahat ta guerra yu'un Jehová, xchi. Como la yal ta yo'tan: Ma ho'ucon ya jmil, ha ac'a milec yu'un te filisteohetic, xchi.

¹⁸ Pero te David la yalbe te Saúl: ¿Mach'ahon a, soc bin a te jcuxlejal o te mach'atic ay yu'un te jtat ta Israel, te ha snihal ajwalil ya xc'ohon? xchi.

¹⁹ Te c'alal c'oht yorahil te ya x'a'bot yic' Merab te David, te Saúl la ya'be yic' te Adriel, te mehola-winic.

²⁰ Pero te Mical, te yan yantsil-nich'an Saúl, c'ux la ya'iy ta yo'tan te David. Te c'alal hich c'oht ta halbeyel te Saúl, mero lec la ya'iy.

²¹ Hich la yal ta yo'tan te Saúl: Ya ca'be yic', pero ha syacojibal ya xc'oht, yu'un ha ya x'och ta sc'ab te filisteohetic, xchi. Ha yu'un te Saúl la yalbe te David scuenta schebal buelta: Jni'al me ya xc'ohat yo'tic, xchi.

²² Hich te Saúl la spas ta mandar te a'batetic yu'une: Muquen xawalbeyic te David: C'uxat ta yo'tan te ajwalil soc lec yo'tanic awu'un spisil te a'batetic yu'une; ac'a snihalinat te ajwalile, xchi.

²³ Te a'batetic yu'un Saúl hich baht yalbeyic ya'iy te David. La yal te David: ¿Ya bal acuyic te mayuc sc'oblal te mach'a ya snihalin te ajwalil, te bin ut'il pobrehon soc te mayuc jc'oblal? xchi.

²⁴ Te a'batetic yu'un Saúl c'oht yalbeyic ya'iy te bin la yal te David.

²⁵ La yal te Saúl: Hich me yac awalbeyic te David: Te ajwalil ma sc'an smahtan, ha nax ho'winic (100) snuhculel sjol sc'unil sbaq'uetal filisteohetic, scuenta yu'un sutbeyel spacol a te scontra te ajwalil, xchi. Pero te Saúl ay ta yo'tan te ya x'och ta sc'ab filisteohetic te David.

²⁶ C'alal hich halbot te David yu'un te a'batetic, lec la ya'iy te David te ya snihalin te ajwalile. C'alal ma to xc'oht yorahil a,

²⁷ loc' bahel te David soc te winiquetic yu'un, la smil lajunwinic (200) ta tuhl filisteohetic. La yich'be tal te snuhculel sjol sc'unil sbaq'uetal te filisteohetic, la ya'be spisil te ajwalil, scuenta yu'un hich ya snihalin. Hich te Saúl la ya'be yic' te yantsil-nich'an Mical.

²⁸ Pero c'alal hich la yil te Saúl, la sna' te joquimbil yu'un Jehová te David soc te c'ux ta o'tanil yu'un te yantsil-nich'an Mical.

²⁹ Ha yu'un te Saúl bayel xan la xi' te David. Hich contrahinot yu'un Saúl te David te jayeb xan c'ahc'al cuxul.

³⁰ Ya xloq'uic bahel ta guerra te jtsobaw yu'un te filisteohetic. Te jujun buelta te ya xloq'uic bahele, ha bayel xan hu' yu'un te David te bin ut'il te yantic a'batetic yu'un Saúl. Hich mero na'bil sba c'oht.