1 Samuel 16 - Bible in Tzeltal Bachajón

Samuel ya smalbe aceite te David

¹ Te Jehová hich la yalbe te Samuel: ¿Jayeb xan c'ahc'al te yac awoq'uetay te Saúl, te bin ut'il ho'on la jch'aybeyix ya'tel ta ajwalil ta Israel? Bahan nojesa ta aceite te xulubil awu'un, ya jticonat bahel ta stojol Isaí ta Belén, yu'un la jtsahbeyix jtuhl snich'an te ya x'och ta ajwalil, xchi.

² La yal te Samuel: ¿Bin ut'il ya xbohon? Teme ya ya'iy te Saúl, ya smilon yu'un, xchi. La sjac' te Jehová: Ic'a bahel jcoht tut wacax, hich yac awal: Talemon ta ya'beyel milbil smahtan Jehová, xchihat.

³ Ic'a tal te Isaí ta banti ya yich' aq'uel te milbil mahtanil, ho'on ya ca'bat ana' bin yac apas. Ya me amalbe aceite ta sjol te mach'a ya calbate, xchi.

⁴ Hich la spas te Samuel te bin ut'il halbot yu'un Jehová. C'alal c'oht ta Belén, te mamaletic yu'un te pueblo loq'uic tal ta stahel soc xiwel, hich la yalic: ¿Scuenta bal lamal-o'tanil te talate? xchihic.

⁵ Ha, talon ta ya'beyel milbil smahtan te Jehová. Ch'ultesa abahic, la', joquinawonic ta yaq'uel te milbil mahtanil, xchi te Samuel. Patil te Samuel la sch'ultes te Isaí soc te snich'nab, la yic' ta yaq'uel te milbil mahtanil.

⁶ Te c'alal hulic talel, te Samuel la yil te Eliab, hich la yal: Li' me ay ta stojol Jehová te mach'a tsahbil yu'une, xchi.

⁷ Pero halbot yu'un Jehová te Samuel: Ma me ha'uc xawil te bin yilel o te bin yilel snahtil, como ch'aybil cu'un. Como te Jehová ma ha'uc ya yil te bin ya yil te ants-winic, como te ants-winic ha ya yil te bin chican ta sit, yan te Jehová ha ya yil te bin yilel te o'tanile, xchi.

⁸ Ha yu'un te Isaí la yic' tal te Abinadab, la yac' stehc'an sba ta stojol Samuel. La yal te Samuel: Ha nix hich ma ha'uc te tsahbil yu'un Jehová, xchi.

⁹ Te Isaí la yic' tal te Sama. La yal te Samuel: Ha nix hich ma ha'uc te tsahbil yu'un Jehová, xchi.

¹⁰ Te Isaí xmelmon la stehc'ambe ta stojol Samuel huctuhl te snich'nab, pero te Samuel la yalbe te Isaí: Ma ha'uc te tsahbilic yu'un Jehová ini, xchi.

¹¹ Ha yu'un te Samuel la yalbe te Isaí: ¿Ha bal spisil anich'nab ini? xchi. Ay to jtuhl xan ihts'inal te yac ta scanantayel tuminchijetic, xchi te Isaí. Te Samuel la yalbe te Isaí: Ticona ta iq'uel tal, ma ba ya xhuhcajotic ta we'el ha to teme hul talele, xchi.

¹² Hich la sticon ta iq'uel tal, la yic' ochel. Ha tsajal querem, t'ujbil sit yelaw soc lec ta ilel. La yal te Jehová: Hahchan, malbeya aceite, como ha me ini, xchi.

¹³ Hich te Samuel la stsac te xulubil te yich'oj aceite, la smalbe aceite ta yohlil te sbanquiltac. Ta hich ora bahel te David u'untayot yu'un te espíritu yu'un Jehová. Patil hahch te Samuel, suht bahel ta Ramá.

David baht ta a'batinel yu'un Saúl

¹⁴ Te espíritu yu'un Jehová la yihquitay hilel te Saúl, ha uts'inot yu'un bohl espíritu te ticombil yu'un Jehová.

¹⁵ Te a'batetic yu'un Saúl hich la yalbeyic: Ilawil, yac yuts'imbelat bohl espíritu te ticombil yu'un Dios.

¹⁶ Ha yu'un halbeya te a'batetic awu'un te ayic ta atojol te ac'a slehic mach'a ya sna' stijel arpa, scuenta yu'un te c'alal ya xhul ta atojol te bohl espíritu te ticombil yu'un Dios ya me stij te arpa, hich ya xlecub q'uinal yac awa'iy a, xchihic.

¹⁷ Te Saúl la sjac'be sc'op te a'batetic yu'un: Lehbonic tal hiche te mach'a ya sna' stijel ta lec arpa, xchi.

¹⁸ Ha yu'un ay jtuhl ya'bat te hich la yal: Ay quiloj jtuhl snich'an Isaí ta Belén te ya sna' stijel te arpa, ay yip yo'tan soc ya sna' yaq'uel guerra, lec ya xc'opoj, t'ujbil soc joquimbil yu'un Jehová, xchi.

¹⁹ Hich te Saúl la sticon bahel c'op ta stojol Isaí, hich la yal: Ticombon tal te anich'an David, ha te ya scanantay te tuminchijetic, xchi.

²⁰ Ha yu'un te Isaí la stsac jcoht burro te scuchoj pan, jun yawil vino soc jcoht tut tentsun, la sticombe bahel te Saúl ta scuenta David te snich'ane.

²¹ Hich c'oht ta stojol Saúl te David, tey hil ta a'batinel yu'un. Te Saúl bayel c'ux ta yo'tan, la yotses ta jcuch-a'tejibal ta guerra yu'un.

²² Patil hich la sticon ta halbeyel te Isaí: Awocoluc, a'bon joquin te David, yu'un mero tse'el co'tan yu'un, xchi.

²³ C'alal ya xhul ta stojol Saúl te bohl espíritu ticombil yu'un Dios, te David ya stsac te arpa, ya x'och stij. Hich ya xlecub q'uinal ya ya'iy a te Saúl, ya x'ihquitayot yu'un te bohl espíritu.