1 Samuel 12 - Bible in Tzeltal Bachajón

Bin la yal Samuel ta stojol te pueblo

¹ Te Samuel hich la yalbe spisil Israel: Ilawil, la jquich'beyex ta cuenta spisil bintic la awalbonic, la jca'beyex te ajwalil awu'unic.

² Li' ayix te ajwalil te ya xnahilij bahel awu'unic. Te ho'one mamalonix, saquix jol; te jnich'nab ay ta awohlilic. Behenon ta awohlilic ta jqueremil c'alal ora ini.

³ Li' ayon; halbonic jmul ta stojol Jehová soc ta stojol te mach'a tsahbil yu'un, teme ay mach'a la jpojbe swacax, teme ay mach'a la jpojbe sburro, teme ay mach'a la jtojol-lehbe smul, teme ay mach'a ay swocol cu'un, o teme ay mach'a la jquich'be staq'uin yu'un ya smacbon jsit a; ya me jsuhtbeyex, xchi.

⁴ Mayuc la atojol-lehbotcotic jmulcotic o la awuts'inotcotic, soc mayuc bin awich'ojbe yan, xchihic.

⁵ Te Samuel hich la yalbe: Te Jehová soc te mach'a tsahbil yu'un, ha testigohetic ta c'ahc'al ini te mayuc bin la atahbonic ta jc'ab, xchi. Hich nix a, xchihic xan.

⁶ Hich te Samuel la yalbe te pueblo: Ha testigo te Jehová te la stsa Moisés soc Aarón, soc te la sloq'ues tal ta sq'uinal Egipto te ame'atatique.

⁷ Tehc'ana abahic ta jtojol hiche, ya jtijex ta c'op ta stojol Jehová yu'un spisil te bintic la scoltayex a soc te ame'atatique.

⁸ Te c'alal och ta Egipto te Jacob soc te tulan awonic yu'un swocolic ta stojol Jehová te ame'atatique, te Jehová la sticon bahel Moisés soc Aarón te la sloq'uesic tal ta Egipto te ame'atatic soc la yaq'uic nahinuc ta lugar ini.

⁹ Pero ch'ay ta yo'tanic te Jehová te Dios yu'unic, hich la yac'ticlambe ta sc'ab Sísara, te jtsobaw yu'un te soldadohetic yu'un Hazor, soc ta sc'ab filisteohetic soc ta sc'ab te ajwalil yu'un Moab, te a'botic guerra yu'un.

¹⁰ Pero awonic ta stojol Jehová, hich la yalic: La jta jmulcotic, yu'un la jquihquitaycotic hilel te Jehová, la jch'uhuntaycotic te baaletic soc te Astarot. Coltayawotcotic loq'uel ta sc'ab te jcontracotic, ya me jch'uhuntayatcotic, xchihic.

¹¹ Ha yu'un te Jehová la sticombeyex te Jerobaal, Barac, Jefté soc Samuel, la scoltayex loq'uel ta sc'ab acontrahic te ay ta ajoyobalic; hich jun awo'tanic ayinex.

¹² Pero te c'alal la awilic te ya xtal ya'beyex guerra te Nahas, te ajwalil yu'un te amonetic, hich la awalbonic: Ma'uc, ac'a scuentahinotcotic ajwalil, xchihex, aunque ha ajwalil awu'unic te Jehová te Dios awu'unique.

¹³ Li' ayix te ajwalil te tsahbil awu'unic, te c'ambil awu'unique. Ilawilic, te Jehová la ya'beyex jtuhl ajwalil.

¹⁴ Teme yac awich'ic ta muc' te Jehová soc teme yac awac' abahic ta a'batinel yu'un, teme yac awa'iybeyic sc'op soc teme ma ba yac atoy abahic ta stojol te sc'op te Jehová, teme yac ach'uhunic te Jehová ha'ex soc te ajwalil te ya scuentahinex, lec ya xc'ohex yu'un.

¹⁵ Yan teme ma ba yac awa'iybeyic sc'op te Jehová, teme yac atoy abahic ta stojol te mandariletic yu'une, ya me scontrahinex te sc'ab Jehová hich te bin ut'il la scontrahin te ame'atatique.

¹⁶ Ha yu'un mahliyahic yo'tic soc ila me awilic te muc'ul seña ya spasbeyex awilic te Jehová.

¹⁷ ¿Ma bal ha'uc yorahil boj trigo? Ya jc'opon te Jehová, ya me yac' talel chahwuc soc ha'al, scuenta yu'un hich yac ana'ic soc hich yac awilic a te c'ax bayel schopolil bin la apasic ta stojol Jehová yu'un te la ac'anic ajwalil awu'unic, xchi te Samuel.

¹⁸ Hich te Samuel la sc'opon te Jehová. Ta hich ora te Jehová la yac' tal chahwuc soc ha'al; spisil te pueblo bayel la xi'ic te Jehová soc te Samuel.

¹⁹ Ha yu'un spisil te pueblo hich la yalbeyic te Samuel: C'opona te Jehová te Dios awu'un ta jcuentacotic ho'otcotic te a'batotcotic awu'un, te manchuc ya xchamotcotic, como ta spisil te jmulcotic, la jtahcotic xan yan mulil te la jc'ancotic ajwalil cu'uncotic, xchihic.

²⁰ Pero te Samuel la yalbe te pueblo: Ma xiwex. Melel nix a te apasojic spisil te bin chopol ini, pero ma me xawihquitayic st'unel te Jehová, ac'a abahic ta a'batinel yu'un soc spisil awo'tanic.

²¹ Ma me xat'unic bahel te bin mayuc scuentahil, te mayuc bin ya ya'beyex soc ma xcoltaywan, como tojol nax stuquelic.

²² Te Jehová, ta scuenta te smuc'ul sbihil, ma ba ya spihtes te pueblo yu'une; como la sc'an te Jehová te ha'ex pueblohex ya xc'ohex yu'un.

²³ Hich te ho'one, ma me jta jmul ta stojol Jehová yu'un te ya jquehchan yalel wocol ta stojol ta acuentahique; ya ca'beyex anopic bin ut'il ay te lequil be soc te toj behe.

²⁴ Ha nax ich'ahic ta muc' te Jehová soc ac'a abahic ta a'batinel yu'un ta mero melel soc ta spisil awo'tanic; na'ahic me te bintic muc' la spasbeyex.

²⁵ Pero teme ya to apasic xan te bin chopol, pajal me ya xlajex soc te ajwalil awu'unique, xchi.