1 Samuel 11 - Bible in Tzeltal Bachajón

Saúl la stsal amonetic

¹ Patil te Nahas te amon-winic, baht ya'be guerra te Jabes yu'un Galaad. Spisil mach'atic ayic ta Jabes hich la yalbeyic te Nahas: Ya jchap jc'optic, hich ya cac' jbahcotic ta a'batinel awu'un, xchihic.

² Te Nahas te amon-winic, hich la yalbe: Ya jchap jc'optic teme ya jloq'uesbeyex awa'el sitic ta apisilic, te hich ya xc'oht q'uexlal ta stojol spisil Israel, xchi.

³ Ha yu'un te mamaletic yu'un Jabes la yalbeyic: A'botcotic huqueb c'ahc'al scuenta yu'un ya jticoncotic bahel jpuc-c'opetic ta spahmal sq'uinal Israel. Teme mayuc mach'a ya xtal scoltayotcotic, ya cac' jbahcotic ta atojol, xchihic.

⁴ Te c'alal c'ohtic ta Gabaa yu'un Saúl te jpuc-c'opetic soc te la yalbe ya'iyic mach'atic ayic ta pueblo, spisil te pueblo hahchic ta oq'uel yu'un.

⁵ Ha yorahil yac ta hulel ta a'tel soc j'a'tel-wacaxetic a te Saúl, hich la sjoc'oy: ¿Bin la spas te pueblo te yacalic ta oq'uel? xchi. La yalbeyic ya'iy te bin la yalic te winiquetic yu'un Jabes.

⁶ C'alal hich la ya'iy te Saúl, hul ta stojol soc yu'el te espíritu yu'un Dios, soc bayel ilin yu'un.

⁷ Hich la stsac cheb j'a'tel-wacaxetic, la sesen soc la spucticlan bahel ta spahmal sq'uinal Israel ta scuenta jpuc-c'opetic, hich la yal: Hich me ya yich' pasbeyel te j'a'tel-wacaxetic yu'un te mach'atic ma ba ya xloc' tal st'unic te Saúl soc te Samuel, xchi. Te xiwel yu'un Jehová c'oht ta stojol te pueblo, loq'uic tal hich te bin ut'il jtuhl winic.

⁸ Te Saúl la yahtaylan ta Bezec, ay j'ohlil swaxaclajunpic (300,000) snich'nab Israel, soc oxpic soc ho'lajunbahc' (30,000) winiquetic yu'un Judá.

⁹ Patil hich la yalbeyic te jpuc-c'opetic hulemic talel: Hich me xawalbeyic te mach'atic ayic ta Jabes yu'un Galaad: Pajel, te c'alal c'uxix c'ahc'al a, ya me xcolex, xchihic. Hich bahtic te jpuc-c'opetic, c'oht yalbeyic te mach'atic ayic ta Jabes, buen tse'el yo'tanic yu'un.

¹⁰ Hich la yalbeyic te scontrahic: Pajel ya cac' jbahcotic ta ac'ab, scuenta yu'un yac apasbotcotic te bin ya sc'an awo'tanic, xchihic.

¹¹ Ta schebal c'ahc'al te Saúl la yac' ta oxchahp te winiquetic. Ihc' to q'uinal a, ochic bahel ta yohlil te campamento yu'un te amonetic, hahch smilticlanic ha to c'alal ohlil c'ahc'al. Te mach'atic cuxajtic hilel, la spuc sbahic, mayuquix mach'a cheb sjoquinej hilel sbahic.

¹² Hich te pueblo la yalbeyic te Samuel: ¿Mach'atic a te la yalic: Ma ba ya x'och ta ajwalil cu'untic te Saúl, te xchihique? A'botcotic te winiquetic, ya jmilcotic, xchihic.

¹³ Pero la yal te Saúl: Mayuc mach'a ya xlaj yo'tic, como te Jehová la scoltayix yo'tic te Israel, xchi.

¹⁴ Soc te Samuel hich la yalbe te pueblo: Conic ta Gilgal yu'un ya ca'betic yich' yan buelta te ya'tel ta ajwalil, xchi.

¹⁵ Ha yu'un spisil te pueblo bahtic ta Gilgal. Tey ta stojol Jehová la ya'beyic yich' ya'tel ta ajwalil te Saúl. Soc la yaq'uic milbil mahtaniletic scuenta lamal q'uinal ta stojol Jehová. Te Saúl soc spisil Israel mero bayel yutsil yo'tanic yu'un.