YEREMIA 33 - Susula Malalaok Hehelu Palak Ma Hehelu Beuk

Hehelu fe'ek fo neni namahehenak

¹ Nai lelek au bei nanatahan nai uma manek-ka so'dan-na te, au hapu hala haitu fe'ek neme Manetualain mai

² fo manamakadada'dik debafak-ka ma ana heheo-hihiluk-kana fo ana taon neu mamanan-na. Ana nafa'da nae,

³ “Maloo bou-bou neu Au, soona neukose Au ataa; neukose Au afa'da neu emi dede'ak fo neulau ina-la, ma matua-madema-la fo emi beita bubuluk fa.

⁴ Manek Yehuda uma manen-na, ma uma manai kota Yerusalem-mala ala ofe henis fo ala tao latea-laheles soaneu musu-a mamain-na. Tehu Au, Manetualain, fo Israel Manetualain, nafa'da nae,

⁵ palsuma la'i esak-kana la'ban hataholi Babel-la, nanahu dede'ak ndia ka'da Ana taon-na kota ia henuk no hataholi-la popolan-nala fo Au taoisas nai Au nasa-melung-nga dalek soaneu sila. Au ta mete-lakanae kota ia fa, nanahu ala tao-no'i hata fo mangalauk-ka.

⁶ Tehu neu makabuin-na te neukose Au tao ahii kota ia no laun-nala heo-hilun; neukose ala labe'i-balakai lasafali. Neukose Au fes tetu-temak ma nene-lino-linok fo manasasi kao-kaok-ka.

⁷ Yehuda ma Israel neukose Au taos lalole-lanapu sama leo makahulun-na, ma neukose ala lapadeik lasafali da'di leo Au anang-gala.

⁸ Neukose Au tao balisis neme sala-singok fo ala tao basak-ka soaneu Au-a; sila sala-singon-nala ma tutu'da-momonun-nala neukose Au fes do'o-do ampong.

⁹ Yerusalem neukose ana da'di namahokok ma Au matua mademang. Basa leoina manai daebafak ia neukose ala da'di manabiik ma mamata'uk, ma ala ta fe ha'da-holomata mai Au, metema lamanene la'eneu basa malole-mana'a fo Au taon soaneu Yerusalem laun-nala, ma la'eneu tetu-temak fo Au fen neu kota ndia.”

¹⁰ Manetualain nafa'da nae, “Hataholi-la lafa'da lae, mamanak ia sama lao mook-solokaek-ka, de ta hapu hataholi do bana-manu leo lai ndia fa. Sila hala-kokolan-nala memak tete'ek-ka, nana Yehuda kotan-nala ma eno-enok manai Yerusalem louk-kala beno'u so; ta hapu bana-manu do hataholi leo lai ndia fa.

¹¹ Tehu nai mamanak ndia hapu lamanene halak namahokok-kala ma setelek-kala ma halak feta ka'bing-ngala seluk. Hapu lamanene hataholi-la leni nakamek tutunu-hohotu makasi lo Au umang-nga neu boe. Neukose lafa'da lae, ‘Toke makasi neu Manetualain Fo Manakoasa, nanahu Ndia malole-a, ma susue-lalain manaketu basa tak, ma matetuk.’ Neukose nusak ia Au taon da'di manahapu-manadaik sama leo makasososan-na. Au, Manetualain, nde manakokolak-ka.”

¹² Manetualain Fo Manakoasa nafa'da nae, “Nusak-ka no kotan-nala fo sama leo mook-solokaek-ka ia hataholi-la ma bana-manu ta leo fan. Tehu leomae leondiak boe, neukose neu fai makabuin-na te hapu seluk mook mana'uk-kala fo mamanak hataholi-la fo-loloo bi'ilopon-nala.

¹³ Basa manafoo-la leke seluk sila bi'ilopon-nala nai kota-kota manai letelepak-kala, letelepak-kala huun-na, nggolo-ta'duk manai Yehuda boboan kona, ma nai Benyamin dae paletan-na, boema nggolo-ta'duk manai Yerusalem boboa-kaisun, ma nai Yehuda kotan-nala. Au, Manetualain, nde manakokolak-ka.”

¹⁴ Manetualain nafa'da nae, “Losa fain-na te, neukose Au tao atetu hala heheluk fo Au tao basan neu Israel ma Yehuda.

¹⁵ Neu faik ndia te, Au hele hataholi esa fo ndos ma matetuk neme Dauk tititi-nonosin neukose ana da'di manek. Manek ndia neukose ana tao hata fo ndos ma matetuk ma tete'ek-ka nai basa nusak-ka lala'en-na.

¹⁶ Hataholi Yehuda-la ma Yerusalem laun-nala neukose nanasoi-po'ik ma laso'da no nene-lino-linok. Kota Yerusalem-ma neukose nanafoik na'de ‘Manetualain Soi-po'i Ita’.

¹⁷ Au, Manetualain, hule ae, meten te neukose hapu hataholi esa neme Dauk tititi-nonosin-na fo ana da'di Israel manen-na;

¹⁸ ma meten te neukose hapu imam-imam-mala leme leo Lewi mai fo lalalau-laoonon ma ala fe tutunu-hohotu bana-manu, gandum ma tutunu-hohotuk fo nanatunuk.”

¹⁹ Manetualain nafa'da neu au nae,

²⁰ “Au tao basa heheluk neu lele'dok-ka ma le'dodaek-ka, fo ela lele'dok-kama le'dodaek-ka ana mai nahele nanda no fain-na; heheluk ndia ta bisa nasanggango heni fan.

²¹ Leondiak boe Au helu basa neu Au atang Dauk so, ae, neme ndia tititi-nonosin mai-a neukose hapu nahele hataholin esa fo ana da'di manek; ma Au tao basa heheluk neu imam-mala fo Lewi tititi-nonosin-nala ae, neukose sila lalalau-laoono Au lahele. Heheluk sila-la ta hapu lose heni fan.

²² Neukose Au tama Au atang Dauk tititi-nonosin, ma leo Lewi-a imam-nala, de nalosa dede'un-nala boetai lamaba'uk-ka sama leo solokaek manai tasi su'un-na, ma nduk manai lalai-a fo ta hapu leke-na fan.”

²³ Manetualain nafa'da neu au nae,

²⁴ “Ade o tao afik basa neu hata fo hataholi-la kokolak basa neu Israel ma Yehuda? Ala lafa'da lae, Au tu'u-tapa heni leoina kaduak fo Au hele basak sila so. Hundia de, ala mete lakadadaek Au anang-ngala, ma ala ta tao sila da'di leo leoina esa fa.

²⁵ Tehu neme Au-a mai fo Manetualain, tao basa heheluk neu lele'dok-ka ma le'dodaek-ka, ma tao basa hoholo-lalanek fo mana ito-ato lalai-a ma daebafak-ka,

²⁶ leondiak boe neukose Au ho'u ahele Au hehelung-nga neu Yakob tititi-nonosin ma neu Au atang Dauk. Neukose Au hele-a hataholi esa neme Dauk tititi-nonosin-na soaneu ana paleta Abraham, Isak, ma Yakob tititi-nonosin. Neukose Au sue-lai an seli neu Au anang-ngala, ma Au tao-a so'dan-nala latetu seluk.”