RUT SUSULAN-NA 4 - Susula Malalaok Hehelu Palak Ma Hehelu Beuk

Boas ka'bing no Rut

¹ Boas neu leo mamana natotongok-ka, nai kota lelesuinan-na. Nangatuuk boema, touk esa tunga ndia, fo tunga Boas soona, hataholi ndia nde been-na, Elimelekh teidale mata dalen. Boema Boas naloon de nafa'dan nae, “Tolanoong-nganei, mai fo mangatuuk mai ia!” Hataholi ndia mai boema, nangatuuk.

² Basa boema Boas noke-na kota ndia, lasi nggolon 10, fo langatuuk lakabubua leu ndia boe. Langatuuk-la boema,

³ nafa'da hataholi fo bei teidalek esa no Elimelekh ndia nae, “Naomi fali ma'in neme Moab mai so. Besak ia, ana sanga nase'o ita teidale manamaten Elimelekh, daen-na.

⁴ De tunga au soona, o muse bubuluk dede'ak ndia. Metema, o nau asa-man soona, mafa'da nai hataholi mangatuuk manai ia-la matan leona. Metema ta soona, mafa'da no mangale'dok, nana ka'da ita 2, nde ta nuu hak neu dede'ak ndia. O nde makasososa, fo basa soona, besak-ka au.” Hataholi ndia nataa nae, “Hei, neukose au asa-an.”

⁵ Boema Boas nae, “Metema leondiak soona, malole so. Tehu, metema o asa-ma dae ndia neme Naomi mai soona, o boeo muse ho'i-ma Rut, ina Moab fo Naomi ana manamaten-na saon-na. Nana, dae ndia muse da'di hataholi manamatek ndia tititi-nonosin-nala pusakan nahele.”

⁶ Boema hataholi ndia nataa nae, “Metema leondiak soona, au ta abe'i fan. Besak ia, malole lenak au po'i au hak-ka, da'di leo hataholi makasososak fo muse asa dae ndia. Metema au asa-an soona, sosoa-ndandaan ta, nana tao leo bee-o, neukose dae ndia ta da'di au tititi-nonosing pusakan fa. Malole lenak o asa-man.”

⁷ Nai lelek ndia, metema hataholi nase'o hatan esa, do tuka hak-ka soona, soaneu pakunisa dede'ak ndia, biasa na hataholi makasososak-ka, se'i heni ta'buein-na, fo ana fen leo hataholi ka dua neu. Hataholi Israe la pakunisa dede'ak esa soona, leondiak.

⁸ Hu ndia de, lelek hataholi ndia nafa'da Boas nae, “O asa-man,” boema ana se'i heni ta'buein-na, de ana fen leo Boas neu.

⁹ Boema Boas nafa'da lasi nggolok-kala ma basa hataholi manai sila-la nae, “Faik ia, emi basa-basam-mala da'di sakasii, mae au asa-ala, basa hata fo Naomi hapus leme sao manamaten Elimelekh no anan duas fo nde Kilyon ma Mahlon.

¹⁰ Boema au ho'i-a Rut, ina Moab, fo Mahlon manamatek-ka saon-na, da'di au saong. No enok ndia, neukose dae ndia da'di hataholi manamatek ndia teidalen-nala nuun nahele. Ma tititi-nonosin-nala boeo, neukose lahele lai teidalen-nala dalek. Ma nai kotan-na dalek. Mafandendelek, tolano-tolanoong-ngala lemin, faik ia, emi basa-basam-mala da'di sakasii.”

¹¹ Boema lasi nggolok-kala ma hataholi manai sila-la lae, “Hei, ami sakasii. Sa'di leo been-na, Manetualain tao o saoinam ndia da'di sama leo Rahel ma Lea fo manabongi fe Yakob anak makadotok-ka. Sa'di leo been-na, o mamasu'i nai leo Efrata hataholin-nala tala'da, ma sa'di leo been-na, o nananita-nalelak nai Betlehem.

¹² Sa'di leo been-na, neukose Manetualain fe o ni'iana-la tunga ina muli-soluk ia, lakadada'dik o teidalem-ma sama leo Peres, fo Yehuda no Tamar anan-na.”

Boas ma tititi-nonosin

¹³ Boema, Boas ho'i-na Rut da'di saoinan. Manetualain ba'e-pala Rut, nalosa nailu, de ana bongi-na ni'iana touanak esa.

¹⁴ Inak-kala lafa'da Naomi lae, “Koa-kio Manetualain! Faik ia, Ana fe o upu touanak esa so, fo nakaboboi o. Sa'di leo been-na, ni'iana ndia ana da'di ni'iana nanakoa-nanakiok nai Israel!

¹⁵ O manafeum ndia, ana sue-na o ba'un-na seli. Ana fe o ba'u lena heni hata fo anatou ka 7-mala fek-ka. Besak ia, ana fe o upu touk esa so, fo neukose ana fe o manggate beuk, ma neukose nakaboboi o, nai o fai lasim-ma.”

¹⁶ Naomi ho'i-na ni'iana ndia, de nakaboboin no susue-lalaik.

¹⁷ Inak manai uma titia-tatain-nala, foi ni'iana ndia na'de Obed. Lafa'da su'di see lae, “Naomi hapu ni'iana touanak esa so!” Obed ia nde makabuin-na, ana da'di Isai aman; fo Isai ia nde been-na Dauk aman.

^18-22 Dauk tititi-nonosin mulai neme Peres nanasulak nde ia: Peres, Hezron, Ram, Aminadab, Nahason, Salmon, Boas, Obed, Isai, Dauk.