RUT SUSULAN-NA 2 - Susula Malalaok Hehelu Palak Ma Hehelu Beuk

Rut naue-nale'di nai Boas tinan

¹ Naomi teidalen esa, bei sao manamaten Elimelekh teidalen ndia. Hataholi ndia kamasu'ik, ma nananita-nalelak. Na'de Boas.

² Faik esa boema, Rut nafa'da Naomi nae, “Ina, au oke fo, au sanga u leo tina u, fo au akapipili gandum, te fafa'kama manaketu-kolu-la latu'da heni nggelok. Au dodoo-nana, neukose hapu hataholi nau au akapipili.” Boema Naomi nataa nae, “Hei anang-ngo, muu leona!”

³ Boema Rut neu leo tina neu, de ana nakapipili gandum, tunga manaketu-kolu dean-nala. Ndia te, se'kona neu leo Boas tinan-na neu.

⁴ Dodoo boema, Boas neme Betlehem mai, de nate'a manaketu-kolu-la nae, “Sa'di leo been-na, Manetualain no emi.” Boema, manaketu-kolu-la lataa lae, “Sa'di leo been-na, Manetualain ba'e-pala Ama.”

⁵ Boema Boas natane mandoon-na nae, “See inak ndia?”

⁶ Mandool ndia nataa nae, “Ina Moab ndia, besak-ka no Naomi leme nusa Moab-pa mai.

⁷ Noke au, fo ana tunga manaketu-kolu dean-nala, fo nakapipili gandum manatu'da henik-kala. Neme fafaik-ka mai, nakapipili nakandoo, de besak-ka ana hahaeaon doo-doo fa, nai lalaak dale.”

^8-9 Boema Boas nafa'da Rut nae, “So'ba nenene dei. O boso muu makapipili gandum nai hataholi fe'ek tinan. Makapipili meme ka'da ia, moo au ina manaketu-kolung-ngala. Leu ketu-kolu nai bee soona, taoafik neus. Fo tunga maheles tataas esa, boso dook-ka moos. Metema o maam-ma ma'dak-ka soona, ndui oe nai nggala fo au maue-male'di toung-ngala sali lahenuk sila-la, fo minu. Au paleta basas so, fo ela ala boso lakasoe loo o.”

¹⁰ Lelek Rut namanene dede'ak ndia boema, ana senek neu Boas matan-na, ma nae, “Ama, au ta andaa sipo ha'da-tatao malole ba'u basa ia neme Ama mai fa. Au ia hataholi manamai, de au ta andaa hapu Ama dale malolen-na fa!”

¹¹ Boema Boas nataa nae, “Au amanene basa, la'eneu basa o tatao-nono'im lala'en fo o taon soaneu o aliinam-ma, neme lelek mate o saotoum-ma. Au bubuluk basa, o la'oela o ina-amam, ma o dae-oem so, de o leo nai ia moo hataholi fo o ta malelak-kasa fa.

¹² Sa'di leo been-na, Manetualain balas basa o dale malolem lala'en-na. Sa'di leo been-na, o sipo hata fo nandaa Israel Manetualain-na Ana fen neu o, nanahu o mai fo masulu-mahapa neun!”

¹³ Boema Rut nataa nae, “Ama malole nanseli neu au, leomae au ta sama o Ama hataholi maue-male'din-nala fa. Ama dale mangana'un-na, tao namahoko au daleng-nga nanseli.”

¹⁴ Lelek fain-na losa, fo la'a-linu boema, Boas nafa'da Rut nae, “Mai fo mu'a leon. Oek-ka nde ia.” Boema Rut na'a nakabubua no basa manaketu-kolu-la. Boas fen gandum nanadalak boe, de Rut na'a losa nakabete. La'a basa te, Rut ta na'a basa nana'an-na fa.

^15-16 Basa boema, Rut neu nakapipili seluk gandum. Ana la'o boema, Boas nafa'da manaketu-kolun-nala nae, “Metema, ana ho'i gandum nanapuputu basak-kala soona, nemen-na. Boso tao makamamaek-kana, do mamanasan. Malole lenak, emi ho'i-ma gandum nanapuputuk sila-la beke faak, fo ta'ko emi matu'da henin, fo ela ana hehele nalas.”

¹⁷ Rut ka'da nakapipili gandum nakandoo, nai tina losa le'donoso. Ana fepa gandum aik-kala, fo de'en-nala kono henis leme ain-nala mai, fo ana ho'i-nalas, boema ana ukus te ana hapu fafa'kama, kilo 10.

¹⁸ Basa boema, neni ndia hahapun faik ndia, de ana fali ne'un leo kota neu, de natu'du aliinan-na, ndia hapu ba'ubee. Ma ana fe aliinan-na, na'a ela nana'ak-ka, nai lelek la'a-linu.

¹⁹ Boema Naomi natanen nae, “O hapu basa ia-la neme bee? Faik ia, o tao ue-le'dis neme see tinan? Sa'di leo been-na, Manetualain ba'e-pala hataholi fo manatao malole neu o ndia!” Boema, Rut tui Naomi nae, au akapipili gandum nai tina ndia nde been-na, touk esa na'de Boas tinan ndia.

²⁰ Boema Naomi nae, “Anang-ngonei, hataholi ndia, bei ita teidalen. Ndia nde muse mete-nakanae ita so'dan-na. Sa'di leo been-na, Manetualain ba'e-palan. Manetualain tao natetu hehelu-balatan tataas esa, nau neu hataholi bei maso'dak-ka, do neu sila fo manamate basak-kala so boe.”

²¹ Basa boema, Rut nafa'da seluk nae, “Ina, hataholi ndia boeo, nafa'da nae, au bole akapipili gandum akandoo o manamaue-male'din-nala, losa ketu-kolu basa tinan-na.”

²² Boema, Naomi nataa Rut nae, “Hei, anang-ngo, malole lenak o maue-male'di makabubua moo manamaue-male'di inak-kala, nai Boas tinan. Nana, metema o muu leo hataholi fe'ek tinan muu soona, hataholi bisa lakasoe lo o nai naa!”

²³ Hu ndia de, Rut tunga nahele manamaue-male'di inak-kala nai Boas tinan. Nakapipili gandum nai ndia, losa ala ketu-kolu basa tina ndia, – nau ketu-kolu makasososak-ka, do ketu-kolu mate'ek-ka. Ndia te, Rut leo no aliinan-na.