KELUARAN 27 - Susula Malalaok Hehelu Palak Ma Hehelu Beuk

Mei tunu-hotuk

¹ “Taom-ma mei tunu-hotuk esa neme ai akasia mai. Taom-man balakak, ma nanalu loloan sama, metel dua senti 20 ma dedeman-na metel esa senti 30.

² Nai mei tunu-hotuk ndia bu'un-nala lain, bu'un esa soona tao masusulak, sama leo bana susulan-na, fo ala da'di esa loo mei tunu-hotuk-ka. Muse makadiditak liti neu susulak fo sama leo bana susulak sila-la basa-basan lala'en-na.

³ Tao uledae, sakop, mango, besi kabaek sama leo po'da, ma la'o. Muse tao bua-lo'as sila-la neme liti-a mai.

⁴ Mala'e kafa neme liti mai, ma taom-ma suek 4, fo soaneu ai ndondolok manai bu'u ka haan-na dae.

⁵ Kafa nananala'ek ndia dedeman-na muse ba'e duak mei tunu-hotuk-ka dedeman-na. Kafa nananala'ek ndia, muse fefeon neu mei tunu-hotuk-ka buin dae, losa ba'e duak mei tunu-hotuk-ka.

⁶ Taom-ma ai ndondolok 2 neme ai akasia mai, fo makadiditak-kasa nenik liti,

⁷ fo lo'dos leo suek manai mei tunu-hotuk-ka boboan duas dalek neu, nai lelek ndolo mei tunu-hotuk ndia.

⁸ Tao mei tunu-hotuk ndia neme papak-ka mai, fo nai dalek louk, tunga Au dale tutu'ung fo Au atu'dun neu o neme letek ia lain.”

Manetualain Lalaa Teman-na uma so'dan-na

⁹ “Tao uma so'dak okofefeo Au Lalaa Temang-nga, fo pa'a okofefeok-kana nenik tema abalutu. Temak manai boboa konan-na, nanaluun-na metel 44,

¹⁰ dii liti 20 lakatakan, fo esa soona tao dii eik liti esa neu, ma soloka'dok, boema ndelin-na neme lilofulak-ka mai.

¹¹ Boboan kii boeo, tao taon leondiak.

¹² Temak manai boboan muli, nanalun-na metel duahulu dua, no dii 10 ma dii eik 10.

¹³ Lelesun-na nai boboan dulu, fo temak manai ndia, nanalun-na metel duahulu dua boe.

^14-15 Muse tao temak neu lelesu ndia boboa-kii-konan, fo temak esa soona nanalun-na metel 6 senti 60, no dii 3 lai dii eik 3 dalek.

¹⁶ Soaneu lelesun-na soona, muse tao tema babaa lelesu neme temak abalutu mai, nanalun-na metel 9, ma nanatenuk nenik tema kabeli momo'dok, pilabalanggeok ma pilas, ma balias-sana nenik seseu-sosook mana'ahiik. Muse taom-ma dii 4 loo dii eik 4 fo lakataka tema lelesu ndia.

¹⁷ Basa dii manaokofefeo-la uma so'dak ndia, muse latutiao loo ndeli lilofulak-kala; muse tao ndelin-na neme lilofulak-ka mai, ma dii ein-nala neme liti mai.

¹⁸ Temak manaokofefeon-na uma so'dan-na ndia, nanalun-na metel 44, loloan-na metel duahulu dua, ma dedeman-na metel dua senti 20. Temak ndia muse taon neme tema abalutu, ma dii ein-na neme liti mai.

¹⁹ Basa bua-lo'as fo nanapakek nai Lalaa Temak ndia dalek, basa Lalaa Temak-ka ai papakun-nala ma teman-na, muse taos neme liti mai.”

Ito-ato banuk-ka tao leo beek

²⁰ “Madenu hataholi Israel-la fo leni mina setun isik ma malole hiik soaneu banuk manai Au Lalaa Temang dale, fo ela de'den soona, ana pila nakandoo.

²¹ Harun no anan-nala muse ito-ato banuk ndia neme le'donoso losa fafaik nai mamanak fo Au nai ndia, nai temak nanalolo'ek-ka deak nai Peti Hehelu-balataak-ka matan. Hataholi Israel-la loo tititi-nonosin muse lakalala'ok paleta ndia losa dodoon-na.”