IMAMAT 17 - Susula Malalaok Hehelu Palak Ma Hehelu Beuk

Nakanenetek la'eneu daak-ka

¹ Manetualain nadenu Musa

² fe Harun, boema anan-nala, ma basa leoina Israel-la lala'en-na, nakanenetek ia-la.

^3-4 Metema leoina Israel esa tunu-hotu sapi, bi'ilopo do bi'ihiik soaneu Manetualain soona, muse do'do bana ndia nai Manetualain Lalaa Teman-na lelesun-na, bafan-na. Metema ana do'don nai mamana fe'ek soona, ana la'olena hoholo-lalanek, nanahu nanisa so. De ana ta da'di Manetualain anan-nala so'on.

⁵ Paleta ndia sosoan-na nde, fo ela leoina Israel-la leni la'iesak bana tunu-hotuk, fo biasa ala do'do bana sila-la nai tina-la dalek-ka, muse lenis leo Manetualain Lalaa Teman-na neu. Sila muse leni tunu-hotuk sila-la leo imam-ma, nai Manetualain Lalaa Teman-na lelesun-na, bafan-na neu, fo ana do'don nai ndia, fo soaneu tutunu-hohotu mole-dame.

⁶ Imam-ma, muse pisi bana sila daan-na neu mei tunu-hotuk-ka boboan-nala, nai Manetualain Lalaa Teman-na lelesun-na, bafan-na, boema ana tunu minan-na, fo ela boon-na, nandaa no Manetualain dalen-na.

⁷ Leoina Israel-la, muse lilineka lahele neu Manetualain, ma ta bole do'do bana nai tina-la dalek makandondook so'on, soaneu tunu-hotu fe nitu mangalauk-kala. Muse tunga nakanenetek sila-la, losa dodoon-na.

⁸ Metema hataholi Israel esa, do hataholi nusa dea esa, ana leo nahele nai hataholi Israel-la tala'da, ana tunu-hotu tutunu-hohotu nanatunuk, do tutunu-hohotu fe'ek

⁹ fe Manetualain soona, muse ana tunu-hotun nai Manetualain Lalaa Teman-na lelesun-na, bafan-na. Metema ana tunu-hotun nai mamana fe'ek soona, ana ta da'di Manetualain anan-nala so'on.

¹⁰ Metema, hataholi Israel esa, do hataholi nusa dea esa ana leo nahele nai hataholi Israel-la tala'da, na'a paa daa soona, neukose Manetualain hukun, ma ana ta da'di Manetualain anan-nala so'on.

¹¹ Basa mahahaek lala'en-na, maso'dan-na nai daan dale. Hu ndia de, Manetualain paleta, fo ela muse pisi basa daak lala'en-na leo mei tutunu-hohotuk lain neu, fo ela hataholi-a sala-singon nanalose henik. Daak fo nde maso'dak-ka, ana lose heni sala-singok.

¹² Hu ndia de, leoina Israel-la, do hataholi nusa dea esa, ana leo nahele nai hataholi Israel-la tala'da, hapu kena-ka'ik, fo boso la'a paa daa.

¹³ Metema, hataholi Israel esa, do hataholi nusa esa, ana leo nahele nai leoina Israel-la tala'da, ho'un-na manupui, do bana fe'ek, fo ta nalulik fa soona, muse ana do'do heni bana ndia daan-na, fo nakadofu ketun nenik dae.

¹⁴ Basa mahahaek lala'en-na, maso'dan-na nai daan dale, hu ndia de, Manetualain kena-ka'i leoina Israel-la, fo boso la'a daak. Ba'eneu hataholi see, fo ana tao tatao-nono'ik nananalulik ndia soona, ana ta da'di Manetualain anan-nala so'on.

¹⁵ Ba'eneu hataholi Israel-la, do hataholi nusa dea, na'a bana manamate aok-ka paan-na, do maten, hu kande bana makaak-kala kaa lisan soona, muse ana safe bua papaken-na, boema nadiu oe, ma nahani losa le'do tenak, fo besak-ka ana da'di balisi.

¹⁶ Metema, ana ta tao tunga nakanenetek sila-la fa soona, muse ana lu'a-lepa tatao-nono'in buna-boan.