BILANGAN 8 - Susula Malalaok Hehelu Palak Ma Hehelu Beuk

Banuk-ka pepe'da fufuan

¹ Manetualain nafa'da Musa nae,

² “Mafa'da Harun mae nai lelek, ana pe'da banuk ka hituk-kala neu banu eik ndia soona, muse ana pe'da matalololen fo ela lasalaa leo banu eik ndia matan neu.”

³ Harun tao tunga Manetualain paletan-na. Ana pe'da banuk sila-la, lasale leo banu eik-ka uluk neu.

⁴ Banuk ndia mamanan-na losa lain, ma bunga nanabalias-sala, nanataok neme lilopilas nanatutuk-ka mai, ma tunga lupak fo Manetualain natu'dun neu Musa.

Hataholi Lewi-la soso'un-na

⁵ Manetualain nafa'da Musa nae,

⁶ “Ta'da fe'e hataholi Lewi-la leme hataholi Israel fe'ek-kala mai, fo tao feta nalalao-nalalafu aoinak-ka soaneus

⁷ nenik eno-dalak ia: pisis nenik oe fo paken soaneu tao nalalao-nalalafu aoinak-ka, ma madenus fo ala nggeuheni basa buluk manai aoinan-nala lala'en-na, ma ala safe bua-papaken-nala. No enok ndia, fo ala da'di balisi.

⁸ Boema madenus, fo ala pa'a-la sapi maneanak esa, no tutunu-hohotu nana'ak, fo taon neme ha'desopu nanasese'dok mina. Boema, o muse pa'a-ma sapi mane fe'ek esa, soaneu tutunu-hohotuk fo sala-singok hapu do'o do ampon.

⁹ Basa soona, maloo makabubua hataholi Israel-la lala'en-na, fo madenu hataholi Lewi-la lapadeik leu Au Lalaa Temang-nga matan-na.

¹⁰ Hataholi Israel-la muse lalaa sila liman-na neu hataholi Lewi-la langan lain,

¹¹ boema Harun muse fe hataholi Lewi sila-la, da'di leo hataholi Israel-la tunu-hotu hehelin soaneu Au, fo ela ala hapu tao Au nakalupu-nakatela.

¹² Boema hataholi Lewi-la, muse lalaa sila liman-na neu sapi mane ka duak sila-la langan lain; muse tunu-hotu esa soaneu tutunu-hohotuk fo sala-singok hapu do'o do ampon, ma esak-ka, soaneu tutunu-hohotu nanatunuk. No feta ndia, de hataholi Lewi-la nanatao nalalao-nalalafuk.

¹³ Fe hehelik hataholi Lewi-la soaneu Au, ma madenus fo lalalau-laoono Harun boema anan-nala.

¹⁴ No feta ndia, de emi ta'da fe'e hataholi Lewi-la neme hataholi Israel fe'ek-kala mai, fo ela sila da'di Au nuung.

¹⁵ O tao basa feta fo fe hataholi Lewi sila-la leo Au mai soona, besak-ka lanuu haak soaneu lalalau-laoono nai Au Lalaa Temang dale.

¹⁶ Au tao-alas da'di mananggati neu basa Israel anatou ulun-nala so; da'di, sila nde been-na, Au nuu heheling.

¹⁷ Lelek Au taoisa basa ana uluk-kala neme Masir-ra, hataholi Israel-la anatou ulun-nala, ma bana-manun fo ana bongi ana makasososak-ka, Au taos da'di Au nuu heheling so.

¹⁸ Besak ia, Au ho'i-a hataholi Lewi-la, da'di leo mananggati neu basa hataholi Israel-la ana ulun-nala,

¹⁹ de Au fe hataholi Lewi sila-la leo Harun no anan-nala leu, fo ela lalalau-laoono hataholi Israel-la, nai Au Lalaa Temang dale. Boeo, fo ela loke Au fe do'o do ampon neu leoina Israel-la, fo ela metema ala mai deka lanseli loo mamana malalao-malalafuk ndia soona, soe bodo tuni la'e leoina ndia.”

²⁰ Hu ndia de Musa, Harun ma hataholi Israel-la lala'en-na, ala fe hataholi Lewi-la leo Manetualain neu, sama leo Manetualain paletan neu Musa.

²¹ Hataholi Lewi sila-la, ala tao feta tao nalalao-nalalafu aoinak-ka, ma ala safe bua papaken-nala, boema Harun fes leo Manetualain neu, da'di leo tunu-hotu hehelik. Boeo, ana tao fes feta, fo tao nalalao-nalalafu aoinan-nala.

²² Hataholi Israel-la, tao basa hata lala'en fo Manetualain paletan neu Musa, la'eneu hataholi Lewi-la. No enok ndia, hataholi Lewi-la hapu haak soaneu lalalau-laoono nai Manetualain Lalaa Teman dale, fo Harun no anan-nala nde lauli-lalangas-sala.

²³ Manetualain nafa'da Musa nae,

²⁴ “Ba'eneu hataholi Lewi fo teun duahulu lima leo lain neu, muse ana tao bela-ba'un nai Au Lalaa Temang dale,

²⁵ ma teun-na losa limahulu soona, ana hahae neme bela-ba'un mai.

²⁶ Basa ndia boema, ana bole fali hataholi Lewi fe'ek fo bei nalalau-naoono nai Au Lalaa Temang dale, tehu ana da'di ka'da manatulu-fali nai lau onok ndia dalek. Ito-atok soaneu hataholi Lewi-la ue-le'din, leondiak.”