BILANGAN 30 - Susula Malalaok Hehelu Palak Ma Hehelu Beuk

Nakanenetek la'eneu nasar

¹ Musa fe nakanenetek ia-la, neu basa leoina Israel-la.

² Metema touk esa fe nasar, do naheluk no Manetualain nenik soo-supak, nalosa ana pa'a aoinan-na neu hehelu-balataak esa, soona muse ana tao natetu hehelu-balataan ndia, fo ta bole nalelesi seluk hala-kokolan-na fa.

^3-4 Metema anafe'oanak esa, ana leo nai aman uman, fo ana fe nasar leo Manetualain neu, ma ana pa'a aoinan-na neu hehelu-balataak esa, de aman namanene dede'ak ndia boema, ta nahala nae le'e esa boen, soona anafe'oanak ndia, muse tao natetu nasar fo ana heluk ndia.

⁵ Tehu metema, nai lelek aman namanene dede'ak ndia boema, ana ta nau fa, soona anafe'oanak ndia, natapo'i neme nasar ma hehelu-balatan ndia mai. Neukose Manetualain fen do'o do ampon neun, nanahu aman ta nau fa.

^6-7 Metema anafe'oana sao beitak esa, ana fe nasar do ana pa'a aoinan-na neu hehelu-balataak esa, fafa'kama ana tai-dodoo nakahuluk-kana, do ka'da leondiak mesak-kana, soona anafe'oanak ndia, nanapa'ak no nasar ma hehelu-balataan ndia. Metema nai fai makabuin, ana saoana soona, anafe'oanak ndia nanapa'ak no nasar ma hehelu-balataan ndia, sa'di nai lelek saotoun-na namanene dede'ak ndia, te ta nahala nae le'e esa boen.

⁸ Tehu nai lelek saotoun-na namanene boema, ana kena-ka'in, soona natapo'i neme nasar ma hehelu-balataan ndia mai. Neukose Manetualain fe do'o do ampon neun.

⁹ Metema inafalu esa, do ina maela saok esa, ana tao nasar, do hehelu-balataak fo nanapa'ak no aoinan-na soona, inak ndia nanapa'ak no nasar do hehelu-balataan ndia, de muse ana tao natetun.

¹⁰ Metema ina masaok esa, ana tao nasar, do hehelu-balataak fo nanapa'ak no aoinan-na soona,

¹¹ muse ana tao natetu basa hata lala'en fo, ana helun ndia, sa'di nai lelek saotoun-na namanene dede'ak ndia, te ta nahala nae le'e esa boen.

¹² Tehu metema, nai lelek saotoun-na namanene dede'ak ndia boema, ana kena-ka'in, soona inak ndia natapo'i neme nasar, do hehelu-balataan ndia mai. Neukose Manetualain fen do'o do ampon, nanahu saotoun-na kena ka'in.

¹³ Saotouk-ka nanuu haak, soaneu nakaheik, do ana ta sipok nasar lala'en-na, do hehelu-balataak fo saoinan-na taok-ka

¹⁴ Tehu metema, nai lelek saotoun-na namanene dede'ak ndia, te nahala nae le'e esa boen soona, inak ndia muse tao natetu basa nasar lala'en-na, do hehelu-balataan-na. Saotoun-na nakaheik nasar do hehelu-balataak ndia, nanahu nai lelek namanene, te ta nahala nae le'e esa boen.

¹⁵ Metema nai fai makabuin, saotoun-na ta sipok saoinan-na nasar do hehelu-balataan ndia fa, soona saotoun-na nde muse lu'a-lepa tatao-nono'in nininin-na.

¹⁶ Nakanenetek sila-la nde Manetualain fen neu Musa, la'eneu nasar do hehelu-balataak, fo anafe'oanak esa taon, nai lelek ana bei leo nai aman uman, do ina masaok esa, ana taon.