2 SEMUEL 4 - Susula Malalaok Hehelu Palak Ma Hehelu Beuk

Isyboset nanataonisak

^1-4 Saul tititi-nonosin nggelok nde Mefiboset, fo Yonatan anamanen-na. Ni'iana ndia, ei helak neme teun 5 mai, fo ndek Saul no Yonatan mamaten-na. Nana nai lelek halak-ka, neme kota Yizreel mai, la'eneu Saul no Yonatan mamaten-na boema, Mefiboset, fo inak manako'o-ifa manek-ka anan-na, nalai neu ma ana ko'o ni'iana ndia; tehu, hu kande nakalupu nanseli, de napesi heni ni'iana ndia, nalosa ana da'di ei helak. Lelek Isyboset, fo Saul anamanen-na namanene, nae ala taolisa Abner nai Hebron boema, mopo be'i-balakain-na, de basa leoina Israel-la dele bengge'be. Isyboset malanga solda'du matuainan dua, ala da'di malangan neu solda'du manaleo musu dale leu-a; esa na'de Baana, ma esak-ka na'de Rekhab. Rimon neme Beerot, fo neme leo Benyamin-na mai, anan sila. (Beerot nai dae Benyamin-na dalek. Laun nusa isik-kala, lalai leo Gitaim leu, de mulai neme lelek ndia mai boema, ala leo leme ndia.)

⁵ Malanga solda'du matuaina ka duak sila-la, leu leo Isyboset uman leu, de le'dohana boema, ala losa naa, nai lelek Isyboset hahaeaon nai fai le'dohanan-na.

⁶ Inak manea uma tekauk nai lelek ana da'i-eeko gandum, boema ana sungu. Hu ndia de, Rekhab ma Baana, hapu loak loi leo uma dale leu.

⁷ Ala masok lakandoo leo Isyboset kaman dale leu, te ana sungu namanee, boema ala pau lisan. Ala te'te-la langan-na, de ala la'o. Ala la'ok le'odae katemak esa, tunga Bafak Yarden-na.

⁸ Basa boema, ala fe Isyboset langan ndia leo Dauk neu, nai Hebron, ma lafa'da lae, “Saul anamanen Isyboset, fo Ama Manek musun fo ana sanga enok taonisa Ama Manek-ka, langan-na nde ia. Faik ia, Manetualain, balas Saul no tititi-nonosin-nala tatao-nono'in neu Ama Manek.”

⁹ Tehu Dauk nataa nae, “Manetualain, fo maso'dak-ka, fo manasoi-tefa-na au neme soe lala'en-na dalek mai so, Ana bubuluk, nae hata fo au sanga afa'dan ia, memak la'en.

¹⁰ Lelek au nai Ziklag, hataholi manamafa'da au Saul mamaten-na, de au aedaenga, hataholi ndia nadaek-ka neni hala malole. Tehu au ho'u-a hataholi ndia, de au taoisan. Au fen ngga'di-a, nde ndia, fo da'di leo babalak neu ndia neni halak-ka.

¹¹ Neukose, au aketu huhuku nabelaina lena seluk, soaneu hataholi dale mangalauk, fo manataonisa hataholi sala taak-ka, bei sungu nai uman dale. Besak ia, nau do ta nau fa, au muse balas emi kanisam ndia, boema au tao amopo-amate emi neme daebafak ia poin-na mai!”

¹² Basa ndia boema, Dauk paleta solda'dun-nala, fo taolisa Rekhab ma Baana. Taolisas boema, ala te'te-la ei-liman, de ala lolo'en deka no lifu-a. Tehu ala ho'i-la Isyboset langan-na, de latoi-latonon nai kota ndia boe, fo nai Abner mamana loo-laten.