2TAWARIKH 23 - Susula Malalaok Hehelu Palak Ma Hehelu Beuk

Hataholi manatunga paleta taak-kala la'ban Atalya

¹ Neu teu kahitu-na boema Imam Yoyada naketu soaneu napalalani aon-na. Ana tao nakeketuk no malanga solda'du lima, fo nde Azarya fo Yeroham anan-na, Ismael fo Yohanan anan-na, Azarya fo Obed anan-na, Maaseya fo Adaya anan-na, ma Elisafat fo Zikhri anan-na.

² Ala leu leo basa kota manai Yehuda leu, de laloo lakabubua basa hataholi Lewi-la ma basa mane leo-la, boema loos leo Yerusalem leu.

³ Ala lakabubua nai Manetualain Uman, de ala tao hehelu-balataak loo Yoas, fo manek ndia anan-na. Yoyada nafa'da nae, “Manek Ahazia manamate-ka anamanen-na nde ia! Besak ia muse ana nangatuuk kandela manek-ka, nana Manetualain helu-balataa basa nae Dauk tititi-nonosin neukose paleta lahele.

⁴ Dede'ak ia nde ita muse taon-nana; Metema basa imam-mala ma hataholi Lewi-la lakalala'ok basa sila bela-ba'un nai fai Sabat-ta soona, ala ta bole fali fa. Sila baba'ek esa neme baba'ek telu mai, muse lanea nai Manetualain Uman-na lelesuina-nala,

⁵ baba'ek esa neme baba'ek telu mai, nai manek-ka uma manen-na, ma bei elak-kala lai Lelesuina manai Dae. Basa laun-na lala'en-na muse lakabubua lai Manetualain Uman-na so'dan-na.

⁶ Hataholi esa boen ta bole masok leo Manetualain Uman neu fa, tadafe'e basa imam-mala ma hataholi Lewi fo manalakalala'ok bela-ba'un. Sila bole masok nana sila nanahele hehelik soaneu Manetualain so. Hataholi fe'ek-kala muse tunga Manetualain nakaneneten-na, de lahele leme deak.

⁷ Hataholi Lewi-la muse nai manek-ka boboa-kaisun no tafaina isi-na nanalesuk nai deak, ma ana la'o su'di leo bee neu soona lanean. See sanga enok masok leo Manetualain Uman dale neu soona, muse taonisan.”

⁸ Hataholi Lewi-la ma Yehuda laun-nala lakalala'ok Yoyada paletan ndia. Hataholi fo basa ndia bela-ba'un nai fai Sabat-ta, ana ta bole fali ne'u fan. Da'di basa malanga solda'du matuaina-la esa-esak ho'i hataholin, nau hataholi fo basa bela-ba'un so, do hataholi fo besak-ka ana mai nakalala'ok bela-ba'un boe.

⁹ Yoyada baba'e fe basa malanga solda'du matuaina sila-la Manek Dauk-ka tee-dongi ma sisili musun fo nanape'dak nai Manetualain Uman.

¹⁰ Yoyada boeo ana pe'da hataholi neu Manetualain Uman-na boboa kii konan no tafaina isi-na nanalesuk nai deak soaneu lasulu-lahapa manek-ka.

¹¹ Basa ndia boema Yoyada noo Yoas leo deak neu, boema ana tao ti'ilanga manek-ka neu langan lain, ma ana fen Manetualain susula Hoholo-lalanen. Boema Yoas nanandoo eik da'di manek. Basa boema Yoyada no anan-nala po'a mina soso'u manek-ka neu Yoas, boema basa laun-na laloo bee bou lae, “So'da-molek ba'eneu manek-ka!”

¹² Atalya namanene la'un-na eki latadale ma lalai leu sipok manek-ka no kokoa-kikiok boema, lai-lai neu leo Manetualain Uman neu, fo mamanak nai bee laun-na lakamomotu.

¹³ Nita manek beuk ndia napadeik nai lelesu masok leo Manetualain Uman neu fo nai mamanak nai bee manek-ka nanandoo eik ma solda'du matuaina-la ma manafuu trompet-ala okofefeo lan. Basa laun-na lalae'na eki latadale boema ala fuu trompet, ma basa manamakminak sasanu manai Manetualain Uman-na tao lalole-lanapu feta ndia nenik sila sasanu liin-nala. Atalya dalen-na ba'ihana de ana sisii-lulu'i bua papaken-na ma ana nggasi nae, “Malelesik! Malelesik!”

¹⁴ Yoyada ta fe loak fo taonisa Atalya nai Manetualain Uman-na boboa-kaisun fa, da'di nafa'da basa malanga solda'du matuaina-la nae, “Moon leo deak neu, tunga manamanea-la tala'da, fo taomisa su'di see fo ana sanga soi-po'in.”

¹⁵ Ala ho'u-lan boema loon leo uma manek-ka neu. Ala taolisan nai naa fo nai Lelesuina Ndala.

Yoyada tao nabebeu nusak-ka

¹⁶ Imam Yoyada leleko Manek Yoas-sa ma laun-na sama-sama loo ndia tao hehelu-balataak lae neukose sila da'di Manetualain anan.

¹⁷ Basa ndia boema, basa-basas sapu-la Baal uma sosongon-na de ala tao lakalulutuk-kana. Ala tao lakalulutuk mei tunu-hotun ma dodoki-dudulan, ma taolisa Matan, fo Baal Imam-ma nai mei tunu-hotuk sila-la matan-na.

¹⁸ Boema Yoyada fe imam-ma ma hataholi Lewi-la bela-ba'uk soaneu ito-ato tatao-nono'ik manai Manetualain Uman tunga baba'ek fo Manek Dauk-ka naketu basan so. Sila muse fe tutunu-hohotu nanatunuk neu Manetualain – nandaa no Musa hoholo-lalanen – nenik feta ma nakameek sama leo Dauk ito-ato basak-ka.

¹⁹ Yoyada pe'da manamanea nai Manetualain Uman-na lelesuina-nala soaneu lanea fo ela hataholi fo ta nandaa sene-do'ok neu Manetualain-na, boso leo dalek neu.

²⁰ Basa malanga solda'du matuaina-la, lasi nggolok-kala, basa manaho'u paleta-la, ma basa laun-na lala'en-na tunga Yoyada fo loo Manek Yoas-sa leo uma manek-ka neu. Ala masok leme lelesuina makasososak-ka mai, boema ala fe manek-ka nangatuuk neu kandela manek lain.

²¹ Laun-na lamahoko lanseli, ma kota boeo tetu-temak ma taolisa Atalya so.