1 TAWARIKH 20 - Susula Malalaok Hehelu Palak Ma Hehelu Beuk

Dauk loso na Raba

¹ Fai sele-nggali manamaik ka, fo mane-manek-kala biasa na leu latee-latati boema, Yoab nadenu solda'dun nala leu de ala loso la nusak Amon na. Nai lelek ndia, Manek Dauk ka nahele neme Yerusalem, de ana ta tunga fa. Yoab no solda'dun nala lakahapi la kota Raba, boema ala sapu lan de ala tao lakalulutuk kota ndia.

² Basa dia boema, Dauk mai de loso nini buas makadotok nanseli nem kota ndia mai Nai buas sila-la dalek, hapu manek Amon na ti'ilanga manen na. Ti'ilanga manek ndia belan na fafa'kama kilo teluhulu haa, ma nanadokik nenik poemata de'ek esa. Dauk ho'i na poemata ndia de ana pasa kana neu ndia ti'ilanga manen na.

³ Basa boema Dauk foo nini laun kota Raba de nakasetis laue-lale'di lenik hoholok, tatatis ma taka. Ana tao dede'ak ndia soaneu Amon kota fe'e-fe'en nala boe. Basa ndia boema, Dauk no basa solda'dun nala lala'en-na, fali le'us leo Yerusalem leu.

Natee-natatik la'ban Filistin hataholin fo ao matuaina-mademainan-nala

⁴ Basa ndia de teuk de'ubee boema, natee-natatik la'ban hataholi Filistin nala da'di seluk nai Gezer. Nai natee-natatik esa dalek, Sibkhai fo hataholi Husa, ana taonisa ao matuaina ma mademaina esa na'de Sipai. Boema hataholi Filistin nala kala.

⁵ Nai natee-natati fe'ek esa dalek soaneu la'ban hataholi Filistin nala, Elhanan, fo Yair anan na taonisa Lahmi fo Goliat hataholi Gat ndia tolanon na. Lahmi tee na ai na ba'u manatenu-henge la ai bole na.

⁶ Nai natee-natati fe'ek esa seluk nai Gat, hapu hataholi ao matuaina ma mademaina esa, limaku'un nee ma eiku'un nee. Hataholi ndia tititi-nonosik neme hataholi ao matuaina ma mademaina tepo lelek makahulun eli mai.

⁷ Ana hakinonoli hataholi Israel-la, hu ndia de Yonatan fo Dauk ka'an Simea anan na taonisan.

⁸ Hataholi ka teluk fo Dauk no solda'du nala taolisas sila-la nde been-na, hataholi ao matuaina ma mademaina manai Gat ala tititi-nonosin sila.