1 TAWARIKH 12 - Susula Malalaok Hehelu Palak Ma Hehelu Beuk

Dauk hataholi manatungan maneme leo Benyamin-na mai

¹ Lelek Dauk nalai neme Manek Saul-la mai boema, neu leo nai Ziklag. Palani ta'ti batu fo manalilinekak ma malelak makadotok, ala mai lakabubua loo Dauk.

² Hataholi sila leme leo Benyamin-na mai, sama leo Saul. Sila kou ma pilu lalelak – nau nenik lima konak do lima kiik boe.

^3-7 Sila mauli-malangan nde Ahiezer ma Yoas, fo Semaa neme Gibea, anan-nala. Palani ta'ti batu sila-la nde ia: Yeziel ma Pelet, fo Azmawet anan-nala Berakha ma Yehu, fo hataholi Anatot Yismaya, hataholi Gibeon, fo palani ta'ti batu nananita-nalelak, ana da'di mauli-malangan esa nai nakabubuak “Tridasawira”. Yeremia, Yahaziel, Yohanan ma Yozabad, fo hataholi Gedera Eluzai, Yerimot, Bealya, Semarya ma Sefaca, fo hataholi Harufi Elkana, Yisia, Azareel, Yoezer ma Yasobam, fo leme leo-ingu Korah mai Yoela ma Zebaja, fo Yeroham hataholi Gedor ndia, anan-nala.

Dauk hataholi manatungan maneme leo Gad-ta mai

⁸ Nai lelek Dauk nai mamana leleon-na nai moo solokaek-ka, palani ta'ti batu nananita-nalelak ma malelak makadotok, leme leo Gad-ta mai, de lakabubua loon. Hataholi sila-la nde been-na, palani ta'ti batu malelaina-la nai pake babaafanak-ka ma tee; hataholi sila-la metes soona, palani mesa-mesan, sama leo singa ma lakabale lai-lain-nala sama leo nusa.

^9-13 Hataholi sila-la na'den-nala nanasulak tunga esa-esak nangatutuu-na nde ia: Ezer, Obaja, Eliab, Mismana, Yeremia, Atai, Eliel, Yohanan, Elzabad, Yeremia, Makhbanai.

¹⁴ Hataholi Gad sila-la nggelok nde been-na, malanga solda'du mademaina, fo ala da'di malangan neu hataholi 1.000; Nggelok nde been-na malanga soloda'du, fo ala da'di malangan neu hataholi 100.

¹⁵ Manada'dik esa, ana da'di hai nai hataholi Yahudi-la bula ka esa-na, nai lelek Lee Yarden-na faa matuaina boema, malanga solda'du mademaina sila-la lena lee ndia, de ala usi laun manai bafak-kala, nau manai lee ndia boboan dulu, do boboan muli boe.

Dauk hataholi manatungan maneme leo Benyamin ma Yehuda mai

¹⁶ La'i esa boema, hataholi bubuak esa leme leo Benyamin ma Yehuda mai, de leu leo Dauk mamana leleon-na.

¹⁷ Dauk neu natongo nos, de nafa'da nae, “Metema emi mai da'di leo tia-laik soaneu tulu-fali au soona, makabubua moo ami. Ami sipok emi no dale namahokok. Tehu metema emi sanga ke'di au, fo emi fe au leo musu neu soona, leomae au ta tao mangalauk neu emi fa, te Manetualain fo ita bei-ba'i kain sene-do'ok-ka bubuluk, de neukose Ana huku emi.”

¹⁸ Hataholi esa neme hataholi sila-la mai, fo nde Amasai, fo basa boema ana da'di mauli-malangan neu nakabubuak fo loken lae “Tridasawira”, Manetualain Dula Dalen-na koasa-nan, boema nafa'da nae, “Dauk, fo Isai anan-na! Ami tia-to'ba o! Sa'di leo been-na, o ma sila manatulu-fali o-a, sila tulu-falin ta louk fa. Manetualain nok o!” Boema Dauk sipok-kasa, de ana so'us da'di malanga solda'du mademaina nai solda'dun-nala dalek.

Dauk hataholi manatungan maneme leo Manasye mai

¹⁹ Lelek Dauk no hataholi Filistin-nala latee-lata'ti loo Manek Saul-la, leo Manasye solda'dun-nala seli leu look Dauk. Tuga ndoon-na, Dauk ta tulu-fali hataholi Filistin sila-la fa. Basa mauli-malangan Filistin-nala ladenun fali ne'un leo Ziklag neu, nanahu ala bii, neukose neu fo nok Manek Saul-la, fo nalelesi sila.

²⁰ Basa manamatee-matatik neme leo Manasye fo leu look Dauk nai lelek anan-nai leleo-lala'o na dalek leo Siklag neu a, nde: Adnah, Yozabad, Yediael, Mikhael, Yozabad, Elihu ma Ziletai. Esa na nalanga solda'du lifun esa.

²¹ Sila manamtee-matati makadelek kala de ala tulu-fali Dauk la'ban solda'du musu a. Neu fai makabuin boema, ala da'di malanga solda'du matuaina nai Israel solda'du nala dalek.

²² Hii nae, tunga faik hapu hataholi beuk mai lakabubua da'di esa loo Dauk, de nalosa beita doo bee boen te, Dauk solda'du nala lamaba'u lanseli.

Dauk solda'du nala dede'u nala

^23-37 Lelek Dauk neme Hebron na, manamatee-matatik fo nanananoli basak ba'uk ka lakabubua da'di esa loon. Ala tulu-falin fo ela ana bisa da'di manek nggati Saul nandaa no Manetualain hehelun-na. Sila dede'u na nde ia: Neme leo Yehuda: hataholi lifun nee natun falu, no babaa fanak ma tee manadaik. Neme leo Simeon: hataholi nanananolik lifun hitu natun esa. Neme leo Lewi: hataholi lifun haa natun nee. Yoyada fo Harun tititi-nonosin mauli-malangan anaboan-nala: hataholi lifun telu natun hitu. Zadok, fo manamatee-matati muli-soluk esa, tolano ka'a-fa'din nala: hataholi duahulu dua – basa-basas malanga uma loo. Neme leo Benyamin (Manek Saul la leo na): hataholi lifun telu; neme leo Benyamin na mai, sila ba'u na bei lilineka lahele neu Saul. Neme leo Efraim: hataholi lifun duahulun-natun falu, nanakoa-kiok nai esa-esak teidale-bobogin na dalek. Neme leo Manasye fo manai Lee Yarden na boboan muli: hataholi lifun sanahulu falu nananatu'duk soaneu so'u Dauk da'di manek. Neme leo Isakhar: mauli-malangan natun dua sama-sama loo sila anaboan-nala; mauli-malangan ia la laketu lalelak hata fo laun Israel-la muse taon nandaa no fai na. Neme leo Zebulon: hataholi lifun limahulu pake lalelak matalolole basa tee-tafa mata-matak lala'en-na, ma laheheleaon soaneu latee-latati; hataholi sila-la nde been-na hataholi manalilinekak ma nananamahelek. Neme leo Naftali: mauli-malangan lifun esa sama-sama loo solda'du lifun teluhulu hitu fo babaa fanan-nala ma tee nala manadaik. Neme leo Dan: hataholi nanananoli basak lifun duahulu falu natun nee. Neme leo Asyer: hataholi lifun haahulu laheheleaon soaneu latee-latati. Neme leo-leo manai Yarden boboan dulu, fo nde Ruben, Gad ma leo Manasye seli: hataholi lifun natun esa duahulu pake lalelak matalolole basa tee-tafa mata-matak lala'en-na.

³⁸ Basa hataholi manamatee-matatik sila-la leu leo Hebron leu no heohiluk natee-natatik ma dale kisak soaneu so'u Dauk da'di manek neu Israel-lala'en-na. Ma basa hataholi Israel fe'ek kala boeo dalek esa soaneu dede'ak ndia.

³⁹ Faik telu dalen-na, hataholi manamatee-matatik sila-la leo loo Dauk lai ndia, ma ala tao feta de la'a ma linu nana'a-nininuk fo hataholi Israel fe'ek kala sadian soaneu sila.

⁴⁰ Neme leo-leo damedoo manai nusak kii boe, fo nde neme leo Isakhar, Zebulon ma Naftali, ala faa beeosu loo keledei, unta, meoasu, ma sapi fo ala fua lahenus lenik nana'a-nininuk: ha'desopuk, kaa boak, angol boa tuuk, angol ma mina setun. Ala leni sapi ma bi'ilopo boe, soaneu ala do'do fo la'a. Basa sila-la ala da'di natutu'duk esa nae, laun manai Israel-lala'en-na, lamahoko lanseli.