1 TAWARIKH 10 - Susula Malalaok Hehelu Palak Ma Hehelu Beuk

Mane Saul-la mamaten-na

¹ Hataholi Filistin-nala latee-lata'ti loo hataholi Israel-la. Latee-lata'ti leme letelepak Gilboa. Hataholi Israel makadotok mates lai ndia, de bei elak-kala lalai sama-sama loo Mane Saul-la no anamanen-nala.

² Tehu hataholi Filistin-nala usi tungas, de ala taolisa amamanen 3, fo nde: Yonatan, Abinadab ma Malkisua.

³ Natee-nata'tik-ka makee nai Saul boboa-kaisun de musu-a kokou isin-nala la'en, nalosa nakahina.

⁴ Boema Saul nafa'da ta'eanak maneni tafa-sisilon-na nae, “Fe'a-ma, o tafainam-ma, fo paun neu au, fo ela hataholi Filistin fo ta lalelak Manetualain sila-la, boso tao au da'di bua nakamiminak.” Tehu ta'eanak ndia ta nau pau Saul fa, nanahu ana bii nanseli. Hu ndia de, Saul ho'i-na tafainan-na, de ana bala aoinan-na neu tafaina ndia lain.

⁵ Lelek ta'eanak ndia nita nae Saul maten so boema, ndia boeo ana bala aoinan-na neu tafainan lain, boema maten.

⁶ Boema mate Saul sama-sama no anamanen ka 3-nala, de no enok ndia boe de tutuin-na nate'e.

⁷ Lelek basa hataholi Israel manaleo nai Bafak Yizreel-la lamanene lae solda'du Israel-la lalai, ma lae mate Saul no anamanen nala so, boema lalai la'oela sila kotan-nala. Boema hataholi Filistin-nala langatuu-la kota sila-la.

⁸ Balahaa, fo nai lelek hataholi Filistin-nala mai lamanako popolak-kala boema, lita Saul no anamane ka 3-nala mates nai letelepak Gilboa so.

⁹ Ala o'du heni Saul ba'du natee-nata'tin-na de ala te'te-la langan-na, boema ala la'o. Basa boema, ladenu hataholi leo basa nusa Filistin-na lala'en-na neu, fo nanduku-nalosak hala malole ndia neu sila leoinan-na ma lamatua daebafan-na.

¹⁰ Ala pe'da Saul ba'du natee-nata'tin ndia nai sila uma sosongon-na, ma ala lona Saul langan-na nai sila-lamatua daebafan fo Dagon uman dale.

¹¹ Lelek laun Yabesh manai Gilead-tala, lamanene hata fo hataholi Filistin-nala tao basan soaneu Saul boema,

¹² sila hataholi palanin-nala leu ko'o-la Saul no anamanen-nala popolan-na, boema lenis leo Yabesh neu. Latoi duin-nala nai ai matuaina esa huun-na, basa boema, ala oka aon-nala faik 7 dalen-na.

^13-14 Saul maten nanahu ana ta lilineka neu Manetualain, ma ana ta tunga paletan-nala fa. Ana ta noke natutu'duk neme Manetualain mai fa, te noke neme hataholi manamatek-kala dula dalen-na mai. Hu ndia de, Manetualain hukun, de Ana fe kandela manen-na neu Dauk fo Isai anan-na.