1RAJA-RAJA 16 - Susula Malalaok Hehelu Palak Ma Hehelu Beuk

¹ Boema Manetualain kokolak no Nabi Yehu fo Hanani anan-na nae, “Manduku-malosak Au hala hehelung-nga nde ia neu Baesa mae,

² ‘Makahulun-na o ta soa nda hata esa boen, tehu Au so'u basa o, da'di mauli-malangan neu Au anang Israel. Te besak ia o masala-masingo sama leo Yerobeam, ma o tao ma Au anang Israel nasala-nasingo, nalosa ala tao lafo'a Au nasa melung.

³ Hu ndia de, neukose Au tao a o ma o teidalem mala sapu-lalo sama leo hata fo Au taon soaneu Yerobeam.

⁴ O teidalem fo manamatek manai kota ia dalek-ka, neukose busa la la'as, ma sila fo manamatek manai kota deak-ka, neukose manupui la la'as.’ ”

^5-7 Manetualain hala hehelun neu Baesa ma teidalen-nala ndia, Nabi Yehu-a nanduku-nalosa kanan-nanahu Baesa tao basa tatao-nono'i mangalauk tunga Manetualain mata memeten-na, de Baesa nafofo'a Manetualain nasa melun, ta ka'da hu kande ana taonisa basa Yerobeam teidalen-nala lala'en-na fa. Tutui fe'ek la'eneu Baesa, ma Baesa palani tati batu na, nanasula basak nai Mane-Manek Israel-la buku Tutuin dale so. Mate Baesa boema latoin nai Tirza. Ela fo ana manen-na nggatin da'di manek.

Ela, mane Israel

⁸ Nai teuk-ka duahulu nee na fo Mane Asa paleta Yehuda, Ela fo Baesa anan-na da'di manek neu Israel. Ana paleta teuk dua dalen-na nai Tirza.

⁹ Zimri, fo malanga solda'du matuaina esa, ana da'di malangan neu solda'du manasa'e kaleta la seli, ana tao nakabua makahatuk fo ana la'ban Ela. Nai faik esa fo nai Tirza, ninu ala-lalu losa ana mafuk nai Arza uman. Arza nde been-na, uma manek-ka malanga uma loon-na.

¹⁰ Boema Zimri neu leo dalek neu de ana taonisa Ela, de basa boema ana da'di manek nggati Ela. Dede'ak ndia da'di nai teuk-ka duahulu hitu na, fo Mane Asa paleta Yehuda.

¹¹ Zimri da'di manek tutika, ana taonisa la'iesak Baesa teidalen-nala. Lena-lenak Baesa tolano-ka'afa'di tou nala, boema tia-lain teidalen-nala boeo ta hapu esa naladeak boen.

¹² Nandaa no hata fo Manetualain nafa'dan soaneu Baesa tunga Nabi Yehu nae, basa Baesa teidalen-nala lala'en-na nanataonisak.

¹³ Baesa no anan Ela, sene-do'ok neu lamatua daebafak-kala, de ala tao la hataholi Israel-la tao sala-singok. Hu ndia de ala tao lafo'a Amak fo hataholi Israel-la Manetualain nasa melun.

¹⁴ Tutui fe'ek la'eneu Ela nanasula basak nai Mane-mane Israel-la buku Tutuin dale so.

Zimri, mane Israel

¹⁵ Nai teuk-ka duahulu hitu na fo Mane Asa paleta Yehuda, Zimri da'di mane Israel de ana paleta nai Tirza faik hitu dalen-na. Nai lelek ndia, hataholi Israel-la bei lakahapi la Gibeton, fo hataholi Filistin-nala kotan-na.

¹⁶ Lelek lamanene lae Zimri tao nakabua makahatuk fo ala la'ban manek-ka boema ana taonisan nai faik ndia dalen-na boe nai sila mamana ofun ndia, boema basa-basas so'u Omri, fo sila malanga solda'du matuainan-na, da'di mane Israel.

¹⁷ Basa boema, Omri no solda'dun-nala la'oela Gibeton de leu lakahapi-la Tirza.

¹⁸ Nai lelek Zimri nita ala loso la kota ndia boema, ana neu leo uma manek dale neu de ana hotuaon no uma manek ndia, boema maten.

¹⁹ Dede'ak ndia da'di nanahu ana tao tatao-nono'i mangalauk nai Manetualain mata memeten-na. Sama na leo Mane Yerobeam-ma, Zimri boeo nasala-nasingo neu Manetualain de ana tao na hataholi Israel-la lasala-lasingo boe.

²⁰ Tutui fe'ek la'eneu Zimri no nakabua makahatun-na, nanasula basak nai Mane-mane Israel-la buku Tutuin dale so.

Omri, mane Israel

²¹ Boema heaba'e leoina Israel-la, nanahu hapu nggelok nau fo ela Tibni fo Ginat anan-na da'di manek, tehu hapu nggelok bai soona, ala nau Omri da'di manek.

²² Mate'e na, sila fo mana look Omri a sengi. Boema mate Tibni de Omri da'di manek.

²³ Dede'ak ndia ana da'di ndek teuk-ka teluhulu esa na, fo Mane Asa paleta Yehuda. Omri paleta da'dileo mane Israel-la, teuk sanahulu dua dalen-na. Nai teuk nee dalen fo ana paleta makasososan-na, neme Tirza.

²⁴ Tehu basa boema, ana asa na letek esa neme touk esa na'de Semer, belin-na doi fulak lifun nee. Boema nafofo'a na kota esa nai letek ndia lain, de ana foin na'de Samaria, tunga Semer fo manamanuu letek ndia makasososan-na, na'den-na.

²⁵ Omri tao sala-singo matuaina lena heni manek makahuluk-kala tao-no'i kala.

²⁶ Sama leo Yerobeam, Omri boeo nasala-nasingo boema ana tao na hataholi Israel-la lasala-lasingo ma ala sene-do'ok neu lamatua daebafak-kala boe. Hu ndia de, ala tao lafo'a Amak fo hataholi Israel-la Manetualain-na nasa-melun.

²⁷ Tutui fe'ek la'eneu Mane Omri ma basa hata fo ana tao-no'in, nanasula basak nai Mane-manek Israel-la buku Tutuin dale so.

²⁸ Mate Omri boema latoin nai Samaria, de Ahab fo anan-na nggatin da'di manek.

Ahab, mane Israel

²⁹ Nai teuk-ka teluhulu esa na, fo Mane Asa paleta Yehuda, Ahab fo Omri anan-na da'di manek nai Israel, de ana paleta nai Samaria, teuk duahulu dua dalen-na.

³⁰ Ana tao sala-singo matuaina lena neme mane-manek makahuluk-kala nai Manetualain mata memeten-na.

³¹ So'da masala-masingo ka beita dai ba'eneu fan, sama leo Mane Yerobeam-ma, lena-lenak ana saon-na Izebel, fo Mane Etbaal la neme Sidon mai, anafe'on-na, de ana sene-do'ok neu Baal-la.

³² Ana napadedeik uma sosongo-tatangok nai Samaria soaneu Baal-la, ma nai uma sosongo-tatangok ndia dalek, ana tao na mei tunu-hotuk esa soaneu lamatua daebafa ndia.

³³ Ana tao na Asyera, fo lamatua daebafa inak ka, doki-dulan boe. Ana tao sala-singok ba'u ka seluk neme basa mane Israel makahuluk-kala tao-no'in. Hu ndia de, ana tao lafo'a Manetualain fo hataholi Israel-la muse sene-do'ok-ka nasa-melun.

³⁴ Nai tepo lelek fo Ahab paleta, Hiel fo hataholi Betel ndia napadedeik falik kota Yerikho-a. Tehu sama leo hata fo makahulun-na Manetualain nafa'dan tunga Yosua fo Nun anan-na nae, neukose mate Hiel anan dua fo nde: Abiram fo uluk-ka, maten nai lelek Hiel pe'da kota ndia batu makasososan-na, ma Segub fo muliana ka maten nai lelek Hiel pasak kota ndia lelesuinan-nala.