1RAJA-RAJA 13 - Susula Malalaok Hehelu Palak Ma Hehelu Beuk

¹ Nai lelek ndia, hapu nabi esa nai Yehuda. Manetualain nadenun fo neu leo Betel neu. Nabi ndia losa naa, nai lelek Yerobeam bei napadeik nai mei tunu-hotuk-ka matan soaneu fe tutunu-hohotuk.

² No Manetualain paleta-na, de nabi ndia naloo bou-bou neu mei tunu-hotuk ndia nae, “Hai mei tunu-hotuk, hai mei tunu-hotuk-ka nei! Manetualain nafa'da nae leoia, ‘Ni'iana esa neukose nanafoik na'de Yosia, neukose bongin nai Dauk teidalen-na dalek. Nai o lain, hai mei tunu-hotuk-ka nei, neukose ana taonisa imam-imam fo lalalau-laoono lai mamana hule-haladoik-kala neu lamatua daebafak-ka, ma manafe basa tutunu-hohotuk nai o lain so boe. Ma nai o lain boe, neukose ana hotu hataholi daebafak-ka dui nala.’ ”

³ Nabi ndia kokolak nakandoo nae, “Mei tutunu-hohotuk ia, neukose ana hea neu, ma afu manai lai na, neukose po'ahenin. Ndia da'di buti nae, Manetualain nde nadenu au a.”

⁴ Nai lelek Yerobeam namanene hala-kokolak sila-la boema, natu'du leo nabi ndia neu boema ana eki ma nae, “Ho'u ma hataholi ndia!” Tehu Yerobeam liman-na mela tutik, nalosa ana ta hapu hela falik-kana fa.

⁵ No kaiboboianak, mei tunu-hotuk ndia hea neu, de po'aheni afu manai lai na leo dae lain neu, sama leo hata fo nabi ndia nafa'da basan no Manetualain paletan-na.

⁶ Boema Yerobeam nafa'da nabi ndia nae, “Suen-na hule-haladoi neu o Manetualain soaneu au. Moke susue-lalain leona, fo nakahahaik au limang-nga!” Nabi ndia hule-haladoi neu Manetualain, boema manek-ka liman-na hai.

⁷ Basa boema manek-ka nafa'da nabi ndia nae, “Mai fo mu'a nai au umang. Au nau fe o bua palsen.”

⁸ Nabi ndia nataa nae, “Leomae Ama Manek fe au Ama Manek hata-heton seli boeo, neukose au ta tunga fo au u'a do inu o Ama Manek fa.

⁹ Au hapu paleta neme Manetualain mai fo au boso u'a do inu, ma ta fali tunga enok fo au tungan nai lelek fo au mai.”

¹⁰ Boema nabi ndia fali tunga eno fe'ek.

Nabi lasik esa nai Betel

¹¹ Nai lelek ndia hapu nabi lasik esa nai Betel. Ana nala lafa'dan la'eneu nabi maneme Yehuda ndia mai. Ala tuin la'eneu hata fo ana taon nai Betel nai faik ndia, ma hata fo nafa'dan neu Mane Yerobeam-ma.

¹² Boema nabi lasik ndia natane nae, “Nabi fo maneme Yehuda ndia, nai lelek ana fali, ana tunga enok bee ka?” Boema ala latu'dun enok ndia.

¹³ Boema nadenus fo ala bela nene'ik neu keledei na. Basa ndia boema, ana sa'e neu keledein lain de neu

¹⁴ usi tunga nabi fo maneme Yehuda ndia mai. Natongo no nabi ndia bei nangatuuk nai ai manituk esa huun-na. Nabi lasik ndia natane nae, “Ade o nde nabi fo maneme Yehuda ndia mai do?” Hataholi ndia nataa nae, “Tete'e ka.”

¹⁵ Nabi lasik ndia nae, “Mai fo mu'a nai au umang.”

¹⁶ Tehu nabi fo maneme Yehuda ndia nataa nae, “Au ta bisa sipok Ama nonoken soaneu tunga leo Ama uman neu fa. Au boeo neukose ta u'a do inu o Ama nai ia fa.

¹⁷ Manetualain paleta basa au soaneu ta u'a do inu ma ta fali tunga enok fo na'ka-sa au tunga, nai lelek fo au mai.”

¹⁸ Boema nabi lasik fo maneme Betel mai ndia boeo nasapepeko neun nae, “Au boeo nabi sama leo o boe. No Manetualain paletan-na boe, de ata nusa so'dak esa nadenu basa au soaneu au mai ala o fo au fe o mu'a nai au umang.”

¹⁹ Boema nabi fo maneme Yehuda mai ndia tunga leo nabi lasik ndia uman neu fo na'a non.

²⁰ Lelek bei langatuuk la'a te, Manetualain kokolak no nabi lasik ndia,

²¹ nalosa ana ka'i nabi fo maneme Yehuda mai ndia nae, “Manetualain nafa'da nae, ‘O ta tunga neu fan. O ta tao hata fo Ana paletan neu o fa.’

²² O fali ma mu'a minu so, te se'kona o nanakena-ka'ik basak soaneu tao dede'ak ndia. Hu ndia de, neukose o nanataonisak, ma neukose o popola ma ta nananatoi-natonok nai o teidalem-mala late na fa.”

²³ Lelek la'a basa boema, nabi lasik ndia bela nene'ik neu nabi maneme Yehuda mai ndia keledei na,

²⁴ boema nabi ndia sa'e de ana la'o leona. Ana losa eno tala'dak boema, singa esa sapun-nan de ana kaa nisan. Basa boema popolan-na lee-lee nai enok lain, ma keledei na napadeik nai boboan-na. Meoasu ndia boeo napadeik nai ndia.

²⁵ Hataholi manatunga ndia, lita popolak ma singa ndia nai ndia. Boema leu leo Betel leu de ala tui hata fo sila litan.

²⁶ Lelek nabi lasik ndia namanene la'eneu dede'ak ndia boema nafa'da nae, “Tao leo bee o, mamates ndia nde nabi fo ta manatunga neu Manetualain paletan-na fa! Hu ndia de Manetualain haitua singa ndia mai kaan-nalan fo taonisan sama leo hata fo Manetualain nafa'da nakahuluk-kana so.”

²⁷ Boema nabi lasik ndia nafa'da anan-nala nae, “Bela nene'ik neu au keledei nga.” Ana sa'e nala keledein lain boema, ana la'o leona.

²⁸ Ana nita nabi fo maneme Yehuda mai ndia popolan-na bei lee-lee nai enok lain no keledei na ma singa nai boboan-na. Singa ndia ta kaa keledei ndia fa, ma ta na'a popolak ndia boen.

²⁹ Ana ko'o na mamates ndia de ana fuan neu keledein lain, boema neni falik-kana leo Betel neu fo ala kii-makaleleun ma latoi-latonon.

³⁰ Nabi lasik ndia mesak-kanan-natoi-natono popolak ndia nai teidalen-nala late na, boema nabi lasik ndia no anan-nala kii-makaleleu mamates ndia. Lafa'da lae, “Kasian ba'eneu o, tolano ngo ne, kasian la'iesak-kana!”

³¹ Basa boema nabi lasik ndia nafa'da anan-nala nae, “Metema mate au soona, matoi au nai mamana loo-lates ia, fo nai nabi ndia boboan-na.

³² Hata fo ana kokolak basan tunga Manetualain paletan-na soaneu mei tunu-hotuk manai Betel ndia, ma mamana huhule-haladoik manai kota-kota Samaria-la, tao leo bee-o, ana da'di.”

Yerobeam tao tatao-nono'i mangalauk

³³ Mane Yerobeam-ma ta nau la'oela tatao-nono'i mangalaun-na makandondook fa. Soaneu ito-ato mamana hule-haladoik fo napadedeik nan sila-la, ka'da ana hele nahele imam-mala leme teidale biasa la mai. Su'di see fo anan nau soona, ana so'un da'di imam.

³⁴ Tatao-nono'i mangalaun ndia tao na tititi-nonosin hapu soe ma lakalulutuk la'iesa kasa.