1RAJA-RAJA 12 - Susula Malalaok Hehelu Palak Ma Hehelu Beuk

Leo-leo manai Israel boboan kii ala la'ban manapaleta

¹ Rehabeam neu leo Sikhem neu, nanahu basa laun manai Israel boboan kii lala'en-na lakabubua lai naa soaneu ala ndo ein-na da'di manek.

² Nai lelek ndia, Yerobeam fo Nebat anan-na bei nai Masir, nanahu nalai neme Mane Salomo mai. Lelek fo anan-namanene la'eneu Rehabeam ndo ein-ne boema, ana fali leo Israel neu.

³ Laun manai Israel boboan kii, ala ka'i Yerobeam, boema ala lakabubua loon de leu lataa Rehabeam. Lafa'da lae,

⁴ “Salomo fo Ama Manek aman, fe basa lelepa mabela neu ami so. Besak ia, metema Ama Manek lui namada'u lelepa mabela ndia ma maloe ami doidoso ma soona, neukose ami da'di ata neu Ama Manek.”

⁵ Rehabeam nataa nae, “Au muse dodoo dei. Basa faik telu soona, mai seluk.” Boema hataholi sila-la fali.

⁶ Boema Rehabeam noke nanoli-nafa'dak neme lasi-lasik fo ala da'di hai Rehabeam aman Salomo manamanolin-mafa'dan so. Rehabeam natane nae, “Emi hahapum-ma leo bee fo ela au ata hataholi sila?”

⁷ Hataholi sila-lataa lae, “Metema te'e-te'e Ama Manek hii da'di ata neu laun-na soona, sipok sila nonoken-na, soona neukose ala lakalupu-lakatele neu Ama Manek losa dodoon-na.”

⁸ Tehu Rehabeam ta taoafik neu lasi-lasik sila-la nanoli-nafa'dan fa. Nasafali na, neu leo ndia dedena-baba'u muli-solun fo besak ia ala falin nana.

⁹ Ana natanes nae, “Emi nanoli-nafa'dam neu au a leo beek, fo au ataa laun-na fo loke ao lui amada'u sila lelepa mabela na?”

¹⁰ Hataholi sila-lataa lae, “Ama Manek muse mafa'das mae leoia, ‘Leomae au tapandoe anseli, tehu au balakaing-nga bei lena au amang!’

¹¹ Au amang fe emi lelepa mabela, tehu neukose au fe emi lelepa mabela lena seluk bai. Ana fepa-li'u emi nenik ue, tehu neukose au fepa-li'u emi nenik ue besik!”

¹² Basa faik telu boema, Yerobeam-ma hataholi sila leu lataa seluk Mane Rehabeam-ma sama leo hata fo ana paleta basan so.

¹³ Naseikosalak no lasik sila-la nanoli-nafa'dan, de laun fo ala mai neu na, nabengas no balakaik.

¹⁴ Nandaa no hataholi muli-solu kala nanoli-nafa'dan, de nafa'da nae, “Au amang fe emi lelepa mabela, tehu neukose au fe emi lelepa mabela lena seluk bai. Ana fepa-li'u emi nenik ue, tehu neukose au fepa-li'u emi nenik ue besik!”

¹⁵ Ana ta taoafik neu laun-na nonoken-na fa. Tehu memak Manetualain hihii-nanaun ndia. Hata fo Manetualain nafa'dan tunga Nabi Ahia, fo neme Silo mai, la'eneu Yerobeam fo Nebat anan-na, muse ana da'di.

¹⁶ Lelek laun-na bubuluk lae manek-ka ta nau namanene fas boema ala eki ma lafa'da lae, “Tafaduli beek neu Dauk ma tititi-nonosin-nala! Sila beita tao lita hata esa boen soaneu ita fa. Laun Israel-la lemin, mai fo ita fali te'u tala! Neme na fo ana ito-ato ndia aoinan-na mesak-kana!” Boema laun Israel-la fali Leona,

¹⁷ ma Rehabeam da'di manek-ka'da neu nusa Yehuda.

¹⁸ Leomae leondiak boe, mane Rehabeam-ma bei nalak nadenu Adoniram, fo malangan esa nai hataholi manatao bela nusak-kala, fo nafa'da laun-na beedenge. Tehu ala pian nenik batu losa maten. Rehabeam nita manada'dik ndia boema ana sa'e lai-lai leo kaletan lain neu de nalai leo Yerusalem neu.

¹⁹ Mulai neme hatematak ndia mai, laun manai nusa Israel boboan kii, ala la'ban tataas esa loo mane-manek fo maneme Dauk tititi-nonosin-nala mai.

²⁰ Nai lelek basa laun Israel-la lamanene lae Yerobeam fali ma'in neme Masir mai so, boema ala laloon leo buaok esa neu, de ala so'un da'di mane Israel. Ka'da leo Yehuda laun-na mesa kasa nde lilineka lahele Dauk tititi-nonosin-nala.

Nabi Semaya nafa'da memak manada'di manamaik-kala

²¹ Lelek Mane Rehabeam-ma losa Yerusalem boema nakabubuan-na solda'du malolen lifun natun esa faluhulu leme leo Yehuda ma Benyamin mai, soaneu latati loo Israel fo ana tao natetetu koasan-na neu leo-leo manai Israel boboan kii.

²² Tehu Manetualain nadenu Nabi Semaya

²³ nanduku-nalosak halak-ka nde ia neu Rehabeam-ma neu basa leo Yehuda ma Benyamin lala'en-na nae,

²⁴ “Boso matati moo o tolanom Israel. Fali leon! Hata manada'di basa ka nde been-na Au hihii-nanaung ndia.” Boema sila basa-basas tunga Manetualain paletan-na, de esa-esak fali ne'un leo ndia uman-na neu.

Yerobeam la'oela Manetualain

²⁵ Lelek Yerobeam da'di mane Israel boema, ana tao natetea-nahehele kota Sikhem fo nai letelepak Efraim-ma, boema ana leo lalai nai naa. Basa boema ana la'o seluk neme ndia mai, de ana tao natetea-nahehele kota Pnuel-la.

^26-27 Ana dodoon-na neui dalen dalen-nae leoia, “Metema laun-na leu leo, Yerusalem leu tataas esa soaneu fe tutunu-hohotuk nai Manetualain Uman sama leo hata fo ala taon besak ia soona, neukose ala tia-to'ba seluk Rehabeam fo mane Yehuda, boema ala taolisa au.”

²⁸ Ana tai dodoo basa dede'ak ndia boema, ana tao na sapi lilopilas nanadoki-dulak dua, boema nafa'da laun-na nae, “Leoina Israel-la lemin! Dook-ka nanseli so, emi meu leo Yerusalem meu fo hule-haladoi. Mulai neme besak ia mai buas ia-la nde da'di emi lamatuam fo no emi kalua meme Masir mai!”

²⁹ Boema Yerobeam pe'da sapi lilopilas sila-la, esa nai kota Betel, ma esa nai kota Dan.

³⁰ Boema laun-na boeo tao sala-singok, nanahu ala leu hule-haladoin-nai kota kaduak sila-la.

³¹ Yerobeam boeo napadedeik na mamana huhule-haladoi fe'ek-kala lai letek-kala poin-na, ma ana so'u imam-mala leme teidalek fo ta leo Lewi-la fa.

Manetualain soo-supa neu huhule-haladoik-ka nai Betel

^32-33 Basa boema Yerobeam fe imam sila-la bela-ba'uk nai Betel. Ma ndia fe tutunu-hohotuk neu ana taon-na sapi lilopilas sila-la. Boema ana tao nakeketuk nae, hataholi Yahudi-la bulak-ka falun-na fain sanahulu lima da'dileo fai malole soaneu Israel, sama leo fai malole manai Yehuda. Nai faik ndia, Yerobeam neu leo Betel neu fo ana fe tutunu-hohotuk soaneu tao fai malole fo nananaketu basak ndia so.