Zebur 47 - Mukaddes Kitap

47‑nji mezmur

1 Koranyň nesilleriniň nagmasy. Mezmur .

¹ Koranyň nesilleriniň nagmasy. Mezmur.

² Reb beýikdir, Hudaýymyzyň şäherinde, Onuň mukaddes dagynda Ol aşa şöhratlandyrylmaga mynasypdyr.

³ Belent, gözel Sion dagy tutuş ýer ýüzüniň şatlygydyr; Sion dagy Beýik Şanyň şäheri, ol Sapon dagynyň çür başy ýalydyr.

⁴ Hudaý onuň galasynda Özüni berkitme hökmünde tanadýar.

⁵ Ine, patyşalar agyz birikdirdiler, bilelikde ol ýerlerden geçdiler.

⁶ Olar ony görenlerinde haýran galdylar, dowla düşüp, gaçyp gitdiler.

⁷ Şol ýerde sandyrama tutdy olary, dogurýan aýalyň burgusy ýaly.

⁸ Gündogar ýeliň Tarşyş gämilerini çym-pytrak edişi ýaly, Sen derbi-dagyn etdiň olary.

⁹ Biz şäheriň şöhratyny eşitdik, indi bolsa ony: Hökmürowan Rebbiň şäherini – Hudaýymyzyň şäherini özümiz gördük. Ol ony ebedi berkarar eder. Sela

¹⁰ Eý, Hudaý, ybadathanaňda oýlanýarys sadyk söýgiň barada.

¹¹ Eý, Hudaý, Seniň adyň deý, alkyşyň-da ýeriň dört künjüne ýetýär. Seniň eliň adalatdan doludyr.

¹² Goý, Sion dagy begensin. Seniň adalatly hökümleriň hatyrasyna, Ýahudanyň gyzlary, goý, şat bolsun.

¹³ Sionyň daşynda gezip, ony aýlanyň, onuň diňlerini siz sanap çykyň.

¹⁴ Onuň içki berkitmelerine üns beriň, geljek nesle aýtmak üçin, onuň köşklerine aýlanyp çykyň.

¹⁵ Çünki bu Hudaý şunuň ýalydyr, Ol ebedi we baky Hudaýymyzdyr; ömürboýy bize ýol görkezjek Oldur.