Zebur 88 - Мукаддес Китап

88‑нҗи мезмур

¹ Эзра неслинден болан Эйтаның маскили

² Я Реб, элмыдама Сениң сөйгиңе нагма айдарын, дилим вепадарлыгыңы беян эдер несилден-несле.

³ Дийдим: «Сениң сөйгиң бакы беркарар, вепадарлыгың гөклер дей мәкәм».

⁴ Дийдиң: «Сайланым билен Мен әхт баглашдым. Өз гулум Давуда Мен касам этдим:

⁵ „Эбеди беркарар эдерин сениң неслиңи, несиллербойы бина эдерин сениң тагтыңы“». Села

⁶ Я Реб, гөклер өвги айтсын гудратларыңа, мукаддеслер меҗлисинде – вепадарлыгыңа.

⁷ Чүнки гөклерде Реббе тай гелҗек бармы? Ылахы барлыкларың арасында Реб дейин бармы?

⁸ Худай мукаддеслер маслахатында өрән хайбатлы, төверегиндәкилериниң хеммесинден вехимли.

⁹ Я Хөкмүрован Бейик Худай! Сен дек, я Реб, кувватлы бармы? Вепадарлыгың гуршаяр Сени.

¹⁰ Гудузлан деңзе йөредйәң Өз хөкүмиңи, толкунлары мөвҗәнде, көшешдирйәң олары.

¹¹ Сен маслык кимин мынҗыратдың Рахабы, гүйчли голуң билен пытратдың ягыларыңы.

¹² Гөклер Сениңки, Ер-де Сениңки, Сен беркарар этдиң әлеми, ондакы әхли затлары.

¹³ Сен яратдың демиргазыгы ве гүнортаны, Табор, Хермон шатлыклы тарыплаяр Сениң адыңы.

¹⁴ Бардыр Сениң кувватлы голуң, Сениң элиң гүйчли, голуң белентдир.

¹⁵ Сениң тагтың дүйби – догрулык хем-де адыллык, өңүңден йөрейәр – сөйги хем вепалылык.

¹⁶ Шатлык шовхуныны билйән халк нәхили багтлы! Я Реб, олар Сениң йүзүңиң нурунда гезйәр!

¹⁷ Узаклы гүн Сени арша чыкаряр, догрулыгың аркалы олар бейгелйәр.

¹⁸ Чүнки гүйчлериниң шөхраты – Сенсиң, хошамайлыгың билен бейгелйәр бизиң гүйҗүмиз.

¹⁹ Бизиң галканымыз – Реббиңки, шамызы Ысрайылың Мукаддеси белледи.

²⁰ Сен бирвагтлар аянлыкда Өз садыкларыңа шейле дийипдиң: «Мен эдермене көмек бердим, Мен халкың ичинден оны сайладым.

²¹ Мен Өз гулум Давуды тапдым, башына мукаддес ягымы чалып, оны сайладым.

²² Элим элмыдама оны сөйгетләр, голум хем оны кувватландырар.

²³ Душман оны алдава салмаз, эрбет адам оңа хич сүтем этмез.

²⁴ Душманларыны өңүнде вейран эдерин, оны йигренйәнлери гырып ташларын.

²⁵ Онуң билен болар сөйгим, вепадарлыгым, Мениң адым билен онуң гүйҗи бейгелер.

²⁶ Онуң элини гоярын деңзиң үстүнде, Онуң голуны – деряларың үстүнде.

²⁷ Ол батлы гыгырып диер: „Сен – мениң Атам Худайым, гутулыш Гаям!“

²⁸ Мен новбахарлыгы оңа берерин, оны дүнйә шаларының иң бейиги эдерин.

²⁹ Өз садык сөйгими онуң үчин бакы сакларын, онуң билен эден әхтиме садык галарын.

³⁰ Мен бакы беркарар эдерин онуң неслини, гөклериң гүнлери дей – онуң тагтыны.

³¹ Эгер огуллары Мениң парзларымдан йүз өвүрселер, адалатлы хөкүмлериме гөрә йөремеселер,

³² Мениң парзларымы сакламасалар, табшырыкларымы берҗай этмеселер,

³³ таяк билен җезаландырарын этмишлерини, гамчы билен – оларың гүнәлерини.

³⁴ Эмма Давутдан айырмарын сөйгими, Мен вепадарлыгыма галплык этмерин.

³⁵ Мен Өз эден әхтими бозмарын, агзымдан чыкан сөзден дәнмерин.

³⁶ Бир гезек Өз мукаддеслигимден ант ичдим, Давуда ялан сөзлемерин Мен.

³⁷ „Онуң несли довам эдер эбеди, Мениң гашымда онуң тагты – Гүн ялы.

³⁸ Гөкде садык шаятлык болан, бакы беркарар эдилен Ай ялы болар“». Села

³⁹ Эмма Сен оны ташладың, кабул этмедиң, Өз сечип-сайланыңа Сен гахарландың.

⁴⁰ Өз гулуң билен эден әхтиңден дәндиң, онуң җыгасыны тозана гардың.

⁴¹ Онуң әхли диварларыны юмурдың, беркитмелерини вес-вейран этдиң.

⁴² Өтегчилериң әхлиси оны талаяр, гүлки болды ол гоңшуларына.

⁴³ Ягыларыны ондан үстүн чыкартдың, онуң душманларыны Сен бегендирдиң.

⁴⁴ Онуң гылыҗының тыгыны ыза өвүрдиң, Сен оны сөвешде хич голдамадың.

⁴⁵ Шан-шөхратының соңуна чыкдың, онуң тагтыны ере пылчадың.

⁴⁶ Яшлык гүнлерини Сен гысга этдиң, оны утанҗа гойдуң. Села

⁴⁷ Я Реб, йүзүңи гизлеҗек хачана ченли? Сен Өзүңи гизлеҗекми эбеди? Хачана ченли газабың яндырар от-алав ялы?

⁴⁸ Сен ядыңа сал өмрүмиң гысгадыгыны. Хайсы панылык үчин яратдың бар ынсан огулларыны?

⁴⁹ Хей-де яшап, өлүм йүзүни гөрмейән бармы? Өлүлер дүнйәсиниң пенҗесинден гутулан бармы? Села

⁵⁰ Я Таңры, Сениң өңки сөйгиң ниреде? Сен вепадарлыгыңда әхт этдиң-ә Давуда!

⁵¹ Я Таңры, ятла бенделериңиң рысвалыгыны, көп халкларың сөгүнҗини гурсагымда гөтеришими,

⁵² Я Реб, Сениң ягыларыңың яңсылайшыны, сечип-сайланыңың хер әдимини яңсылайшыны.

⁵³ Реб алкыша мынасып асырларбойы! Омын! Омын!