Zebur 71 - Мукаддес Китап

71‑нҗи мезмур

Сүлейманың мезмуры

¹ Эй, Худай, патыша пай бер адалатыңдан, ша оглуна – Өз догрулыгыңдан.

² Гой, ол догрулык билен халкыңа казылык этсин, гарыпларыңа адалатлы хөкүм чыкарсын.

³ Гой, даглар халка абаданлык хабарыны гетирсин, депелер адалаты, гой, ыглан этсин.

⁴ Ша халкың гарыпларының хакыны, гой, алып берсин, мәтәчлериң огулларыны халас эйлесин, залымлары, гой, вейран этсин!

⁵ Тә Гүн хем Ай шөхле сачярка, несиллербойы, гой, ол яшасын.

⁶ Инсин орлан яйла бир ягмыр кимин, ери суварян чабгалар кимин.

⁷ Онуң гүнлеринде адалатлык гүллесин. Ай йитип гидйәнчә абаданчылык болсун.

⁸ Деңизден-деңзе, Евфрат дерясындан ериң учларына ченли, гой, ол өз хөкүмини йөретсин.

⁹ Чөлде яшаянлар оңа баш эгсин, душманлары, гой, топрак яласын.

¹⁰ Таршыш шалары ве деңиз якасындакылар оңа пач-хырач төлесин, Шеба ве Себа шалары совгат гетирсин.

¹¹ Оңа әхли шалар, гой, тагзым этсин, оңа әхли миллетлер, гой, хызмат этсин.

¹² Чүнки ол халас эдйәр мәтәҗи өзүне перят эденде, гарыбы-да, көмекчиси болмадык ынсанлары-да.

¹³ Онуң эҗизлере, мәтәчлере рехими инйәр, ол мәтәчлериң җаныны аман галдыряр.

¹⁴ Гораяр сүтемден, зорлукдан оларың җанларыны, назарында гымматлы оларың ганы.

¹⁵ Патыша, гой, узак яшасын! Шеба алтынындан оңа берилсин, онуң үчин элмыдама дога окалсын, узаклы гүн оңа алкыш айдылсын.

¹⁶ Юртда галла болелин болсун, дагларың депелеринде, гой, толкун атсын, онуң хасылы Ливандакы дей көп болсун; шәхер халкы яйла оты кимин, гой, паҗарласын.

¹⁷ Онуң ады бакы яшасын, Гүн астында онуң ады гүллесин, әхли халклар онда ялкансын, әхли миллетлер оңа, гой, багтлы дийсин.

¹⁸ Ысрайыл Худайына, Реббе алкышлар болсун! Гудратлары диңе Ол эдйәр.

¹⁹ Онуң шөхратлы адына бакы алкышлар болсун! Онуң шөхраты тутуш ериң йүзүне долсун. Омын! Омын!

²⁰ Йышай оглы Давудың дога-дилеглери тамамланды.