Zebur 70 - Мукаддес Китап

70‑нҗи мезмур

¹ Я Реб, мен Сени пена эдинйәрин, мени хич хачан утанҗа гойма.

² догрулыгың билен мени халас эт, азат эт, маңа гулак гой, тиз етиш мениң дадыма.

³ Элмыдама мени гизләп биләйҗек, месген тутунҗак мәкәм гаям бол. Халас болмагымы Сен эмр этдиң, чүнки гаям, беркитмәм Сенсиң.

⁴ Эй, Худайым, мени халас эт эрбедиң элинден, адалатсыз билен залымың пенҗелеринден.

⁵ Чүнки, эй, Хөкмүрован Реб, умыдым Сенсиң, яшлыгымдан бил багланым Сенсиң.

⁶ Дүнйә иненимден Саңа даяндым, Сен эҗемиң гөвресинден мени дүнйә индердиң; мен Саңа дынгысыз алкыш айдярын.

⁷ Мен көплере тәсинлик болуп гөрүндим, эмма Сен мәкәм пенамсың.

⁸ Саңа болан алкыш дүшмез дилимден, узаклы гүн агзым долы шан-шөхратыңдан.

⁹ Гаррылык чагымда мени ташлама, кувватдан дүшенимде мени терк этме.

¹⁰ Душманларым мен барада гүррүң эдишйәр, җанымы аңтап, өзара дил бирикдирйәр.

¹¹ Олар диййәр: «Худай оны ташлады, ковалап, тутуң сиз оны. Оны халас этҗек ёк инди».

¹² Эй, Худай, менден дашлашма, эй, Худайым, тиз етиш мениң дадыма.

¹³ Мениң ягыларым утансын, ёк болуп гитсин, маңа яманлыгы ниет эдйәнлер утанч билен бетнамлыга бүрелсин.

¹⁴ Мен болса хемише умыт багларын, Саңа алкыш үстүне алкыш айдарын.

¹⁵ Дилим узаклы гүн сөзләр догрулыгыңы хем-де халас этмек үчин эдйәнлериңи; оларың саны акыл етирерден кән.

¹⁶ Мен Хөкмүрован Реббиң гудратлы гүйҗи билен гелерин, Сениң, диңе Сениң догрулыгыңы ыглан эдерин.

¹⁷ Эй, Худай, яшлыгымдан маңа тербие бердиң, мен хениз-де гудратларыңы беян эдйәрин.

¹⁸ Җар эдйәнчәм гелҗек несле гүйч-кувватыңы, инди догулҗакларың әхлисине Сениң гүйҗүңи, гаррасам-да, башым чаларса-да мени ташлама.

¹⁹ Эй, Худай, Сениң догрулыгың гөклере етйәр, Сен берҗай этдиң әгирт ишлери. Эй, Худай, бармы Сен ялы?

²⁰ Көп гөргә, яман мушакгатлара мени учратдың, йөне гайтадан мени яшайша говушдырарсың, ериң тейинден мени ене чыкарарсың Сен.

²¹ Бейгелдерсиң мениң ат-абрайымы, калбыма берерсиң Сен рахатлыгы.

²² Эй, Худайым, мен арфада вепалылыгыңы өверин. Эй, Ысрайыл Мукаддеси, лирада Саңа алкыш айдарын.

²³ Мен Саңа нагма айданымда, дилим, халас болан җаным шатлык билен гыгырар.

²⁴ Дилим узаклы гүн догрулыгыңы айдар, чүнки маңа яманлыгы ниет эденлер масгара болуп, утанҗа галды.