Zebur 5 - Мукаддес Китап

5‑нҗи мезмур

¹ Айдымчылар топарының ёлбашчысына. Үфленип чалынян саз гуралында. Давудың мезмуры.

² Я Реб, диңле мениң сөзүми хем-де эшит мениң ахы-зарымы.

³ Диңле перядымың сесини, эй, Патышам хем-де Худайым, мен Саңа эдйәндирин дилеги.

⁴ Я Реб, мениң сесими эртирине эшидйәрсиң Сен, хәзирленип, сәхер билен хузурыңда гарашярын мен.

⁵ Сен эрбетлиги халамаян Худайсың, Сениң хузурыңда яман яшамаз,

⁶ текепбирлер Сениң гашыңда дурмаз; Сен йигренйәрсиң беткәрлериң барыны,

⁷ ёк эдйәрсиң ялан сөзлейәнлери. Я Реб, Сен йигренйәрсиң ганхор билен кеззабы.

⁸ Мен болса эгсилмез садык сөйгиң аркалы, гирерин Сениң өйүңе; мен Сенден хедер эдерин, мукаддес ыбадатханаңа тарап тагзым эдерин.

⁹ Я Реб, душманларым зерарлы, Өз адалатыңда мени угрукдыр; догрула Сен өңүмдәки ёлуңы.

¹⁰ Оларың агзында догры сөз ёкдур, оларың йүреги вейранчылыкдыр, оларың богазы ачык габырдыр, диллери билен-де яллаклаяндыр.

¹¹ Эй, Худай, олара чыкар хөкүми, пәллеринден тапып, йыкылсын олар; языклары үчин ковуп чыкар олары, чүнки олар Саңа гаршы баш галдырдылар.

¹² Сени пена эдинйәнлериң бары шатлансын, элмыдама җошуп, нагмалар айтсын; чүнки олары гораярсың Сен, адыңа ашыклар Сенде шат болсун.

¹³ Сен ялкаярсың догры ынсаны, хошамайлыгың-да боляр онуң галканы.