Zebur 143 - Мукаддес Китап

143‑нҗи мезмур

Давудың мезмуры

¹ Мениң эллериме урушмагы, бармакларыма сөвешмеги өвредйән гаям Реббе алкышлар болсун!

² Ол мениң садык сөйгимдир, мениң галам, беркитмәм, Халасгәримдир, мениң галканым, Пенакәримдир. Ол халклары маңа табын эдйәндир.

³ Я Реб, ынсан киммишин, Сен онуң аладасыны эдериң ялы? Ынсан оглы киммишин, Сен онуң пикирини эдериң ялы?

⁴ Ынсан бир дем киминдир, онуң өмри гечип барян көлеге дейдир.

⁵ Я Реб, Өз гөклериңи яр ве ашага ин, даглара эл дегир, гой, түтесинлер!

⁶ Йылдырымлар чакдыр, пытрат олары, пейкамларыңы ягдыр, даргат олары!

⁷ Бейикликден узат элиңи, хайбатлы сувлардан, кесекилерден азат эт, халас эт мени.

⁸ Оларың агзы ялан сөзлейәр, олар ялан касам үчин саг элини галдыряр.

⁹ Эй, Худай, Саңа тәзе нагма айдарын, он киришли гуралда Саңа мукам чаларын.

¹⁰ Сенсиң шалара еңишлер берйән, бендәң Давуды залым гылычдан азат эйлейән.

¹¹ Мени азат эт, кесекилериң элинден халас эт мени. Оларың агзы ялан сөзлейәр, ялан касам үчин олар саг элини галдыряр.

¹² Огулларымыз яш чагында, өсүмлик дей паҗарлап өссүн. Гызларымыз көшгүң хашамланан сүтүнлери дей болсун.

¹³ Аммарларымыз дүрли азык-овкатлардан, гой, долуп-дашсын. Гоюнларымыз өрүлерде мүңлерче, он мүңлерче болуп өрңесин.

¹⁴ Сыгырларымызың хөври көп болсун, душман гала диварыны, гой, бөвүсмесин; олар бизи есирлиге алмасын, көчелеримизде ахы-налыш болмасын!

¹⁵ Шейле ялканан халк нәхили багтлы! Худайы Реб болан халк нәхили багтлы!