Zebur 105 - Мукаддес Китап

105‑нҗи мезмур

¹ Реббе шан-шөхрат болсун! Шүкүр эдиң, чүнки Ол ягшы, Онуң сөйгүси бакы.

² Реббиң бейик ишлерини беян эдип билҗек бармыка? Оңа лайык шан-шөхрат айдып билҗек бармыка?

³ Адалаты гораянлар, элмыдама догрулык эдйәнлер нәхили багтлы!

^4-5 Я Реб, халкыңа мерхемет эдениңде, мени яда сал. Сениң сечип-сайланларыңың абаданлыгыны гөрүп билерим ялы, халкыңың шатлыгына шатланып билерим ялы, сайлан халкың билен биле магтанып билерим ялы, олары халас эдениңде маңа көмек эт.

⁶ Биз хем ата-бабаларымыз дей гүнә ишлери этдик, языклы болдук, яманлык этдик.

⁷ Ата-бабаларымыз Мүсүрде гудратларыңа дүшүнмедилер, болдан-бол садык сөйгиңи ятламадылар. Гызыл деңзиң якасында баш галдырдылар.

⁸ Эмма Ол гудратыны билдирмек үчин, Өз адының хатырасына олары халас эйледи.

⁹ Ол Гызыл деңзе буюрды, ол хем гурады, олары чуңлукдан гуры ерден кимин гечирди.

¹⁰ Олары душман элинден халас эйледи, олары ягының пенҗесинден Ол азат этди.

¹¹ Сувлар душманларының үстүни өртди, олардан хич бири аман галмады.

¹² Шонда Онуң сөзлерине уйдулар, Оңа шөхрат нагмасыны айтдылар.

¹³ Эмма олар Онуң ишлерини тиз унутдылар, Онуң маслахатына гарашмадылар.

¹⁴ Олар чөлде ачгөзлүге гөвүн бердилер, чөл-бееванда Худайы сынап гөрдүлер.

¹⁵ Ол оларың дилеглерини битирди, эмма үстлерине гыргын иберди.

¹⁶ Олар дүшелгеде Муса, Реббиң руханысы Харуна гөрип болдулар.

¹⁷ Ер ярылып Датаны ялмап ювутды, Абырамың топланышыгының үстүни өртди.

¹⁸ Оларың топланышыгында от алавлады, эрбетлери ялын яндырды.

¹⁹ Олар Хорепде өкүзиң хейкелини ясап, гуйма бута сежде этдилер.

²⁰ Олар Худайың шан-шөхратыны от иййән өкүзиң шекилине чалышды.

^21-22 Олар Худайы – Мүсүрде бейик ишлери, Хам юрдунда гудратлары ишлери, Гызыл деңизде хайбатлы ишлери эден Халасгәрлерини ятдан чыкарды.

²³ Ол олары ёк этмек ховпуна салды, эмма Муса, Онуң сайланы, Оңа төвелла этди, Онуң яндырыҗы газабын совды.

²⁴ Олар гөзел юрды әсгермедилер, Онуң берен сөзүне ынанмадылар.

²⁵ Өз чадырларында хүңүрдешдилер, Реббиң сесини диңлемедилер.

^26-27 Шоңа гөрә, олары чөлде ёкларын дийип, миллетлер арасындан зүрятларыны ёкларын дийип, олары ер йүзүне даргатҗак дийип, элини галдырып, Реб касам этди.

²⁸ Соңра Багалпегор бутуна бил багладылар, өлүлере багыш эдилен гурбанлыклары олар ийдилер.

²⁹ Олар эденлери билен Ребби газапландырды, мерги оларың башына инди.

³⁰ Шонда Пинехас дуруп төвелла этди, мерги тогтады.

³¹ Бу оңа догрулык хөкмүнде несиллербойы бакы сайылды.

³² Олар Мерибаның боюнда Ребби газапландырды, Муса олар зерарлы оңайсыз ягдая галды.

³³ Чүнки олар онуң рухуны гайгыландырды, онуң дили ойланышыксыз сөзлери айтды.

³⁴ Олар Реббиң буйранларыны берҗай этмедилер – олар халклары ёкламадылар.

³⁵ Гайтам миллетлере гарышып, оларың дәп-дессурына эердилер.

³⁶ Оларың бутларына хызмат этдилер, бутлар хем олара дузак болдулар.

³⁷ Олар өз огулларыны ве гызларыны галп худайлара гурбан этдилер.

³⁸ Олар огулларыны ве гызларыны Кенган бутларына гурбан этдилер, оларың бигүнә ганын дөкдүлер; юрды ган билен харамладылар.

³⁹ Эденлери билен харам болдулар, өз ишлери аркалы зына этдилер.

⁴⁰ Реб Өз халкына гаршы газаба мүнди, сайлап-сечен халкыны Ол йигренч сайды.

⁴¹ Олары миллетлериң элине берди, олары йигренйәрлер үстлеринден агалык сүрди.

⁴² Душманлары олара җебир чекдирди, олары гүйч билен боюн эгдирди.

⁴³ Ол энчеме гезек олары халас эйледи, эмма олар пәллеринден яңа баш галдырдылар, өз гүнәлери зерарлы кемсидилдилер.

⁴⁴ Эмма Ол дат-перятларыны эшиден вагты, оларың мушакгатларына назар айлады.

⁴⁵ Оларың хатырасына Өз әхтини ядына салды, садык сөйгүсиниң боллугына гөрә рехим эйледи.

⁴⁶ Олары есир эденлериң калбына олар бабатда рехим-шепагат салды.

⁴⁷ Эй, Худайымыз Реб, бизи халас эт! Мукаддес адыңа шүкүрлер эдер ялы, Сениң шөхратыңа буйсанар ялы, миллетлериң арасындан бизи топлап ал.

⁴⁸ Ысрайыл Худайы Реббе эзелден эбедә ченли алкышлар болсун! Әхли халк, гой, «Омын!» дийсин. Реббе шан-шөхрат болсун!