Закаря 2 - Мукаддес Китап

2‑нҗи бап Үчүнҗи аламат: өлчег йүпи

¹ Соңра мен середип дуркам, эли өлчег йүпли бир адамы гөрдүм.

² Мен ондан: «Нирә барярсың?» дийип сорадым. Ол маңа: «Иерусалими өлчәп, онуң ининиң хем-де узынлыгының нәчедигини билмәге барярын» дийип җогап берди.

³ Мениң билен геплешен перишде менден дашлашанда, башга бир перишде оны гаршыламага чыкды.

⁴ Ол: «Бар, ылга-да шол йигиде айт: „Ол ерде ерлешҗек сан-саҗаксыз адамлардыр мал-гарадан яңа Иерусалим диварсыз бир шәхер болар.

⁵ Мен онуң дашының отлы дивары, ичиниң шөхраты боларын. Муны Реб диййәр“» дийди.

⁶ Реб шейле диййәр: «Хайдаң, хайдаң! Демиргазык юрдундан гачың. Чүнки Мен сизи гөгүң дөрт тарапына өвүсйән ел кимин даргатдым, муны Мен – Реб айдяндырын.

⁷ Хайда, Бабылда яшаян Сион, гач!»

⁸ Чүнки Хөкмүрован Реб мени Өз шөхраты үчин иберди. Сизи талан халклар бабатда Ол шейле диййәр: «Сиона деген хут Мениң гөреҗиме дегйәндир.

⁹ Инди Мен оларың гаршысына эл гөтерҗек; олары өз гуллары талаңа салар». Шонда яныңыза мени Хөкмүрован Реббиң иберендигини билерсиңиз.

¹⁰ «Айдым айт, шатлан, эй, Сион гыз! Мен гелип, сизиң араңызда мекан тутҗак. Муны Реб айдяндыр.

¹¹ Шол гүн көп халклар Мен-Реббе бил багларлар ве Мениң халкым боларлар. Мен сизиң араңызда мекан тутарын». Шонда яныңыза мени Хөкмүрован Реббиң иберендигини билерсиңиз.

¹² Реб мукаддес топракда Өз пайы хөкмүнде Яхуданы мүлк эдип алар ве ене Иерусалими сайлар.

¹³ Әхли җанлы-җандарлар, Реббиң өңүнде үмсүм болуң; Ол туруп, мукаддес меканындан чыкып гелйәр.