Закаря 10 - Мукаддес Китап

10-нҗы бап Реб халас этмәге сөз берйәр

¹ Яз мөвсүминде Ребден ягыш диләң. Гара булутлар гетирйән Реб олара гүйчли чабгалар ягдыряр, хер кесиң мейданында отлар битирйәр.

² Бутлар биманы геплейәрлер, палчылар ялан сөзлейәрлер, галп дүйшлери ёрярлар, соңы бош гөвүнлик берйәрлер. Шол себәпден гоюн ялы ыгып йөрлер, чопансыздыклары үчин эҗир чекйәрлер.

³ Чопанлара гаршы туташды гахарым, баштутанлары җезаландырарын. Хөкмүрован Реб Өз сүрүсиниң – Яхуда неслиниң аладасыны эдер, олары буйсанчлы сөвеш аты кимин эдер.

⁴ Бурч дашы, чадыр газыгы, сөвеш яйы, әхли ёлбашчылар олардан чыкар.

⁵ Сөвеш эсгерлери дей болар олар, депеләрлер душманы көчелериң палчыгында. Реббиң өзлери билендиги үчин сөвешип, олар атлы гошуны уяда гоярлар.

⁶ Яхуда неслини кувватландырарын, Юсуп неслини халас эдерин, Мен ызына гетирерин олары, чүнки олара рехимим инди. Мен тарапдан унудылмадык ялы боларлар. Себәби оларың Худайы Реб Мендирин; Мен олара гулак асарын.

⁷ Эфрайым халкы батырлар кимин болар, шерап ичен дей оларың көңли хош болар. Муны огуллары гөрүп гуванарлар; оларың гөвүнлери Ребде галкынар.

⁸ Сыкылык чалып, топларын олары, чүнки Мен азат этдим олары. Көпелерлер олар хут өңкүлери ялы.

⁹ Миллетлер арасына олары тохум дей сепдим, эмма олар Мени узак юртларда ятларлар. Чагалары билен аман галып доланып гелерлер.

¹⁰ Ызына гетирерин олары Мүсүрден; Ашурдан йыгнарын. Гетирерин Гилгада, Ливана йөне олар сыгмазлар ол ере.

¹¹ Реб җебир деңзинден гечирер, деңиз толкунларыны көшешдирер. Нилиң дүйпсүз чуңлуклары гурар, Ашурың текепбирлиги чөкер, Мүсүриң шалык хасасы элинден гидер.

¹² Олар Мен-Ребде кувватланарлар, Мениң адым билен гезерлер, Муны Реб айдяндыр.