Ýunus 1 - Мукаддес Китап

1‑нҗи бап Юнус Реббиң эмринден боюн товлаяр

¹ Эмитай оглы Юнуса Реббиң шу сөзи аян болды:

² «Ханы бол, Ниневә – ол бейик шәхере гит-де, онуң халкының гүнәкәрдигини җар эт, чүнки оларың бетпәллиги Маңа аян болды».

³ Йөне Юнус Реббиң назарындан гачып, Таршыша гитмек үчин ёла дүшди. Ол Яфо шәхерине гелип, Таршыша гидйән бир гәми тапды. Гәминиң ёл кирейини төледи ве Реббиң назарындан гачып, Таршыша гитмек үчин, гәмичилер билен биле гәмә мүнди.

⁴ Эмма Реб деңзе гүйчли ел иберди; деңизде элхенч гай туруп, гәми чагшара гелди.

⁵ Гәмичилери горкы гаплап алды; оларың херси өз худайыны чагырмага башлады. Олар гәмини еңлетмек үчин, йүклерини деңзе ташладылар. Юнус болса ашакда, гәминиң ички аммарында сүйҗи ука гидипди.

⁶ Гәминиң башлыгы онуң янына гелип: «Хей! Сен нәме ятырсың? Тур, өз худайыңы чагыр. Белки, онуң рехими инип, бизи халас эдер» дийди.

⁷ Шол вагт гәмичилер бири-бирлерине: «Гелиң, биҗе аталың-да, хайсымыз себәпли бу бела дучар боландыгымызы билелиң» дийишдилер. Шейлеликде, олар гурра ташладылар. Гурра Юнуса дүшди.

⁸ Онсоң: «Сен бизе айт, нәме себәпли бу бела саташдык? Бу ерде нәме ишләп йөрсүң? Ниреден гелйәрсиң? Сен нирели? Хайсы халкдан боларсың?» дийип, олар ондан сорадылар.

⁹ Юнус булара: «Деңзи ве гуры ери ярадан Гөгүң Худайы Реббе сыгынярын. Мен еврейдирин» дийип җогап берди.

¹⁰ Соңра гәмичилер җуда горкдулар ве Юнуса: «Нәме үчин бейтдиң?» дийдилер. (Себәби Юнус олара өзүниң Реббиң назарындан гачып баряндыгыны айдыпды.)

¹¹ Деңиз гитдигисайы газаба мүнйәрди. Гәмичилер Юнуса: «Деңиз көшешер ялы, биз сени нәме эдели?» дийдилер.

¹² Юнус олара: «Бу гай-тупана дучар болмагыңыза өзүмиң себәпкәрдигими мен билйәрин. Мени гөтериң-де, сува ташлаң, шонда деңиз көшешер» дийди.

¹³ Олар етишибилдиклерине күрекләп, кенара чыкмага дырҗашярдылар, йөне бу олара башартмаярды, чүнки деңиз гитдигисайы гүйчли чырпынып, олара гаршылык гөркезйәрди.

¹⁴ Шондан соң олар Ребби чагырмага дурдулар: «Я Реб, бу адамың җаны үчин бизи хеләк этме, буларың хеммеси Сениң ислегиң билен болды. Шоңа гөрә, бизи нәхак гана галдырма».

¹⁵ Соңра олар Юнусы гөтердилер-де, деңзиң дүйбүне гойбердилер. Деңиз дессине көшешди.

¹⁶ Гәмичилер Ребден гаты горкдулар; Оңа гурбанлык бердилер ве Оңа гуллук этмәге касам ичдилер.