Ýeşuwa 18 - Мукаддес Китап

18‑нҗи бап Галан ерлериң пайланылышы

¹ Тутуш ысрайыл җемагаты Шилода йыгнанышды ве ол ерде Реббе йүз тутулян чадыр гурулды. Чүнки әхли ерлер ысрайыллара табын болупды.

² Энтек ысрайыллардан өз мүлк ерини алмадык ене-де еди тире галыпды.

³ Шонуң үчин хем Ешува олара шейле дийди: «Сиз хачана ченли ата-бабаларыңызың Худайы Реббиң өзүңизе берен ерлерини алмага бипервай гарап гезҗексиңиз?

⁴ Хер тиреден үч адамы сайлаң, мен олары ерлере айланмага иберҗек, олар хер тирә етйән мүлк ери язга гечирсинлер-де, мениң яныма алып гелсинлер.

⁵ Ерлери мүлк пайыны алмадык еди тирәниң арасында бөлсүнлер. Яхудалар өз өңки еринде гүнортада галар, Юсубың несиллери болса демиргазыкдакы еринде галар.

⁶ Мүлк ериң еди бөлегини хем язга гечириң-де, маңа гетирип бериң. Мен шу ерде Худайымыз Реббиң хузурында сизиң үчин биҗе атарын.

⁷ Сизиң араңызда левилериң пайы ёкдур, себәби оларың пайы Реббе руханы хөкмүнде гуллук этмекдир. Гатлар, рубенлер ве манаша тиресиниң ярысы эййәм өз мүлк ерлерини Иордан дерясының гүндогарындан алдылар. Бу ерлери олара Реббиң гулы Муса берипди».

⁸ Шейдип, адамлар ёла дүшдүлер. Ешува ерлери өвренмәге гидйән ол адамлара шейле буйрук берди: «Әхли ерлери айланып чыкың ве оны язга гечириң-де, ызыңыза мениң яныма гелиң. Мен бу ерде Шилода Реббиң хузурында сизиң үчин биҗе атҗакдырын».

⁹ Шейлеликде, адамлар ерлериң ичинден гечип, олары галама-гала еди бөлеге бөлүп, гөзден гечириш китабына яздылар. Соңра олар Шилодакы дүшелгә – Ешуваның янына гайдып гелдилер.

¹⁰ Ол ерде Ешува Реббиң хузурында биҗе атып, ерлери ысрайылларың тирелерине өзлериниң бөлүшлери ялы пайлады.

Бенямин тиресиниң мүлк ери

¹¹ Илкинҗи болуп, бенямин тиресиниң уругларының биҗеси чыкды. Оларың биҗесине дүшен пай яхудалар билен Юсуп несиллериниң аралыгындакы ерлер болды.

¹² Оларың арачәгиниң демиргазык тарапы Иордан дерясындан башланяр, соң арачәк демиргазыкда Ерихо гершине чыкып, даглыкларың үсти билен гүнбатар тарапа өврүлип, Бейтавен чөллүгинде гутаряр.

¹³ Бу ерден арачәк илерлигине Лузуң (бу өңки Бейтел) гүнорта гершине ченли гелйәр. Соңра ашакы Бейтхороның гүнортасындакы даглыкдан Атаротаддара дүшйәр.

¹⁴ Соңра ол ерден айланып, дагларың гүнбатар тарапына өврүлйәр, яхудалара дегишли болан Кирятбагала (өңки Кирятегарым) гелйәр. Бу оларың гүнбатар тарапының арачәгидир.

¹⁵ Гүнорта арачәк Кирятегарымың четинден башлап, Нептова чешмесине ченли гелип етйәр.

¹⁶ Соңра арачәк Бенхинном дересиниң янындакы дагларың этегине ченли ашак дүшүп, Рапа дересине гелйәр. Ол демиргазыга Хинном дересине тарап ашак довам эдип, ябусларың галасының гүнорта эңңиди билен Эйнрогеле барып етйәр.

¹⁷ Инди болса арачәк демиргазыкдан айланып, Эйншемеше гелйәр. Соңра Адуммым гечидиниң гаршысындакы Гелилода ченли узалып, Рубен оглы Боханың дашына тарап ашак дүшйәр.

¹⁸ Соңра Бейтарабаның демиргазык эңңиди билен гечип, Араба дүзлүгине тарап ашак дүшйәр.

¹⁹ Арачәк Бейтхогланың демиргазыгы билен гидип, Өли деңзиң демиргазык айлагында ве гүнортада Иорданың четинде гутаряр. Бу оларың гүнорта арачәги болупдыр.

²⁰ Оларың гүндогар арачәги Иордан болупдыр. Бу бенямин тиресиниң уруглары боюнча әхли тараплайын арачәкленен мүлк ерлери болупдыр.

²¹ Ине, булар болса бенямин тиресиниң уруглары боюнча алан галалары: Ерихо, Бейтхогла, Эмеккесис,

²² Бейтараба, Самарайым, Бейтел,

²³ Авым, Пара, Опра,

²⁴ Кепар-аммоны, Опны, Геба – обалары билен биле җеми он ики гала.

²⁵ Гибгон, Рама, Беерот,

²⁶ Миспа, Кепира, Моса,

²⁷ Рекем, Йирпеел, Тарала,

²⁸ Села, Хаелеп, Ябус галасы (бу – Иерусалим), Гибга ве Кирятегарым – обалары билен биле он дөрт гала. Бу бенямин тиресиниң өз уругларына гөрә алан мүлк еридир.