Ýermeýa 41 - Мукаддес Китап

41‑нҗи бап Ысмайыл Гедаляны өлдүрйәр

¹ Единҗи айда патыша неслинден ве патышаның ёлбашчыларының бири болан Элишаманың агтыгы, Нетаняның оглы Ысмайыл өзүниң он адамы билен Миспадакы Ахыкамың оглы Гедаляның янына гелди. Ол ерде биле ийип-ичип отыркалар,

² Нетаняның оглы Ысмайыл билен онуң янындакы он адам туруп, Бабыл патышасының юрдуң үстүнден беллән хәкими Шапаның агтыгы, Ахыкамың оглы Гедаляны гылыч билен өлдүрди.

³ Ысмайыл Миспада Гедаля билен биле болан әхли яхудалары-да, ол ердәки бабыл эсгерлерини-де өлдүрди.

⁴ Гедаля өлдүриленден бир гүн геченсоң, энтек муны хич ким билмейәркә,

⁵ Шекемден, Шилодан ве Самариядан сегсен адам гелди. Оларың сакгаллары сырылгыды, эгинбашлары сал-салды, беденлерине яра салныпды, эллеринде болса Реббиң өйүне гетирмек үчин галла садакасы билен якымлы ыслы түтетги барды.

⁶ Олары гаршыламак үчин, Миспадан Нетаняның оглы Ысмайыл гелди. Ол аглай-аглай адамларың деңине гелип, олара: «Ахыкамың оглы Гедаляның янына барың» дийди.

⁷ Олар шәхериң ичине гиренлеринде, Нетаняның оглы Ысмайыл билен онуң янындакы адамлар олары өлдүрип, гуррук гуя ташладылар.

⁸ Йөне оларың арасындан он адам: «Бизи өлдүрме! Бизиң мейданда гизләп гоян бугдайымыз, арпамыз, ягымыз ве балымыз бар» дийди. Шейлеликде, ол пикиринден дәнип, олары ёлдашлары билен бирликде өлдүрмеди.

⁹ Ысмайыл өлдүрен адамларының җесетлериниң барыны гуррук гуя ташлады. Муны өң Аса патышасы Ысрайыл патышасы Багшадан горанмак үчин газдырыпды. Нетаняның оглы Ысмайыл оны адам җесединден долдурды.

¹⁰ Онсоң Ысмайыл җанпеналарың баштутаны Небузарадоның Миспада Ахыкамың оглы Гедаля берен халкының әхлисини, патышаның гызларыны, умуман, ол ерде аман галан халкың хеммесини есир алды. Нетаняның оглы Ысмайыл олары есир алып, аммонларың тарапына гечмек үчин ёла дүшди.

Ёханан халкы халас эдйәр

¹¹ Эмма Кареяның оглы Ёханан ве онуң янындакы әхли гошун серкерделери Нетаняның оглы Ысмайылың эден пис ишлерини эшиденлеринде,

¹² адамларының барыны алып, Нетаняның оглы Ысмайыл билен урушмага гитдилер. Олар оны Гибгондакы әпет ховзуң башындан тапдылар.

¹³ Ысмайылың янындакы адамларың хеммеси Кареяның оглы Ёханан билен онуң гошун серкерделерини гөренлеринде бегендилер.

¹⁴ Шейлеликде, Ысмайылың Миспадан есир алан адамларының бары ызына өврүлип, Кареяның оглы Ёханана гошулды.

¹⁵ Эмма Нетаняның оглы Ысмайыл секиз адамы билен Ёханандан гачып, аммонларың янына гитди.

¹⁶ Кареяның оглы Ёханан янындакы гошун серкерделери билен аман галанларың хеммесини: эсгерлери, аяллары, чагалары ве көшк агталарыны Гибгондан ызларына гетирди. Нетаняның оглы Ысмайыл Миспада Ахыкамың оглы Гедаляны өлдүренинден соң, олары есир алыпды ве Гибгона гетирипди.

^17-18 Юрдуң үстүнден Бабыл патышасының беллән хәкими Ахыкамың оглы Гедаляны Нетаняның оглы Ысмайылың өлдүрендиги үчин, олар бабыллылардан горкярдылар ве олардан гачмак үчин Мүсүре тарап ёла дүшдүлер. Олар Бейтуллахамың голайындакы Герут Кимхамда сакландылар.