Ýermeýa 21 - Мукаддес Китап

21‑нҗи бап Реб Сидкияның хайышыны рет эдйәр

¹ Патыша Сидкия Малкыяның оглы Пашхур билен Магасеяның оглы Сепаня руханыны Ермеяның янына иберенде, Ермея Реббиң шу сөзи аян болды. Пашхур билен Сепаня оңа:

² «Бабыл патышасы Небукаднесарың гаршымыза урушяндыгы себәпли бизиң үчин Реббе ялбарсана. Белки, Реб бизиң үчин Өз аҗайып гудратларының бирини гөркезип, Небукаднесары юрдумыздан ковар» дийди.

³ Ермея олара Сидкия шуны айдың дийди:

⁴ «Ысрайыл Худайы Реб шейле диййәр: „Сизиң дашкы диварларыңызы габаян Бабыл патышасы билен бабыллыларың гаршысына уланян элиңиздәки ярагларыңызы ызына өврерин. Оларың хеммесини бу шәхериң ортасына үйшүрерин.

⁵ Гүйч-гудратым билен, гүйчли гахарым билен газап атына атланып, Мениң Өзүм сизиң гаршыңыза уршарын.

⁶ Мен бу шәхердәкилериң барыны: ынсандыр хайваныны хеләк эдерин. Олар айылганч мергиден өлерлер.

⁷ Мундан соң Яхуданың патышасы Сидкияны, онуң эмелдарларыны, бу шәхериң илатыны урушдан, ачлыкдан ве мергиден аман галанларың барыны Бабыл патышасы Небукаднесарың, өз җанларының кастына чыкан душманларының элине берерин. Небукаднесар олары гылычдан гечирер, олары гайгырмаз, олара хайпы гелмез ве йүреги авамаз. Муны Реб айдяндыр“.

⁸ Бу халка хем Реб шейле диййәр дий: „Ине, Мен яшайыш ёлы билен өлүм ёлуны сизиң өңүңизде гойярын.

⁹ Бу шәхерде галан гылычдан, ачлыкдан ве мергиден өлер, эмма дашары чыкып, өзлерини габан бабыллыларың элине дүшен өз җаныны гутарып аман галар.

¹⁰ Мен бу шәхере ягшылык дәл-де, бетбагтлык индермек карарына гелдим. Муны Реб айдяндыр. Бу Бабыл патышасының элине берлер ве ол хем муны ода якар“.

¹¹ Яхуда патышасының неслине айт, Реббиң сөзүне гулак асың дий:

¹² „Эй, Давудың несли! Реб шейле диййәр: ‘Эртирине адалаты берҗай эдиң, талананы залымың элинден халас эдиң. Ёгсам пис ишлериңиз зерарлы газабым от кимин ловлап яндыраймасын, оны хич ким сөндүрип билмез.

¹³ Мен саңа гаршыдырын, эй, өзүни дүзде гая сайян җүлге илаты!’. Муны Реб айдяндыр. Сиз диййәңиз: ‘Бизе ким гаршы чыкып билер? Месгенимизе ким гирип билер?’

¹⁴ Мен сизи эден ишлериңизе гөрә җезаландырарын, токайыңыза от берерин, от төверегиңиздәки затлары якып яндырар“». Муны Реб айдяндыр.