Ýermeýa 18 - Мукаддес Китап

18‑нҗи бап Ермея күйзегәриң өйүнде

¹ Ермея Реббиң шу сөзи аян болды:

² «Тур, күйзегәриң өйүне гир, сөзлерими шол ерде саңа аян эдерин».

³ Мен күйзегәриң өйүне гитдим. Мен онуң чархың башында ишләп отураныны гөрдүм.

⁴ Күйзегәриң тоюндан ясаян күйзеси элинде дөвленде, ол өз ислейши ялы палчыкдан башга бир күйзе ясады.

⁵ Онсоң маңа ене Реббиң шу сөзи аян болды:

⁶ «Эй, ысрайыл халкы, Мен-де сизи бу күйзегәриң ясайшы ялы ясап билмеринми? Муны Мен-Реб айдяндырын. Эдил күйзегәриң элинде тоюн нәхили болса, сиз хем Мениң элимде шейлесиңиз, эй, ысрайыл халкы!

⁷ Мен бир миллети я-да патышалыгы согруп ташламак, юмруп ёк этмек барада җар этсем,

⁸ эмма гүррүңини эден бу миллетим шонда эрбетлигинден дөнсе, онуң башындан индерҗек бетбагтлыгымдан эл чекерин.

⁹ Айдалы, Мен бир миллети я-да патышалыгы беркарар эдип, бина этмек хакында җар эден болсам,

¹⁰ эмма бу миллет мениң назарымда пис ишлер эдип, сөзүме гулак асмаса, онда Мен оңа этҗек ягшылыгымдан эл чекерин.

¹¹ Шонуң үчин хем инди яхуда халкы билен Иерусалим илатына Реб шейле диййәр дий: „Мен сизе гаршы эрбет пикирлер дүзүп, башыңыза бела-бетер гетирерин. Инди хер бириңиз пис ёлларыңыздан дөнүң, яшайшыңызы ве херекетлериңизи дүзедиң“.

¹² Эмма олар: „Бидереклик! Биз өз пикирлеримизе эерерис, кесирлик билен өз эрбет ниетлеримизе гөрә херекет эдерис“ диерлер.

¹³ Мунуң үчин Реб шейле диййәр: „Миллетлер арасында сораң, булар ялы зады ким эшидипдир? Ысрайыл бой гызы өрән элхенч иш этди.

¹⁴ Ливаның гары онуң бейик гаяларыны, хей, терк эдерми? Онуң узакдан акян совук булаклары хей кесилерми?

¹⁵ Эмма халкым болса Мени терк этди, бидерек худайлара түтетги якды. Бу худайлар оларың гитҗек ёлларында, овалкы ёлларда бүдремеклерине себәп болдулар. Олар чаркандаклы ёлдан йөрәп, догры ёлы терк этдилер.

¹⁶ Олар бу юрды элхенчлиге, эбедилик масгарачылыга өвүрдилер. Ондан гечйәнлериң барыны горкы басар, олар гең галып, башларыны яйкарлар.

¹⁷ Олары душманларының өңүнде гүндогар шемалы кимин пытрадарын. Башларындан бетбагтлык инен гүни йүзүми дәл-де, еңсәми гөркезерин“».

¹⁸ Шонда халк: «Гелиң, Ермея гаршы дил дүвшелиң. Руханыларың өвретҗек кануны-да, акылдарларың берҗек маслахаты-да, пыгамберлериң аян этҗек сөзи-де етерлик ахырын. Гелиң, оңа дилимиз билен хүҗүм эделиң, хич бир сөзүне гулак асмалың» дийди.

¹⁹ Я Реб, Сен маңа гулак гой, гаршыдашларымың сесини эшит!

²⁰ Ягшылыга яманлык эдилерми? Эмма олар җанымы алмак үчин чукур газдылар. Газабыңы олардан совмак, олара ягшылык дилемек үчин, хузурыңда нәхили дуранымы ядыңа сал.

²¹ Мунуң үчин чагаларыны ачлыга бер, кесгир гылыҗа табшыр. Аяллары перзентсиз дул галсын, эркеклерини аҗал алсын, яш йигитлери сөвешде гылычдан өлсүн.

²² Үстлерине гаракчылары дуйдансыз дөкениңде, өйлеринден дады-перят эшидилсин. Чүнки мени тутмак үчин чукур газдылар, аягымың астына гизлин дузак гурдулар.

²³ Я Реб, Сен мени өлдүрмек үчин эдилен бу дилдүвшүклериң барыны билйәнсиң. Оларың языгыны багышлама, гүнәлерини назарыңдан дүшүрме. Гой, олар хузурыңда йыкылсынлар, олара гаршы газабыңда херекет эт.