Ýahuda 1 - Мукаддес Китап

1‑нҗи бап Саламлар

¹ Иса Месихиң гулы ве Якубың доганы болан мен Яхудадан Худайың халкы болмага чагырыланлара догайы салам! Бу хаты Атамыз Худай тарапындан сөйлүп, Иса Месих аркалы горалян сизе язып ёллаярын.

² Гой, Худайың чәксиз мерхемети, парахатлыгы ве сөйгүси сизе яр болсун!

Гүнә ве хөкүм

³ Эй, сөйгүли доганлар! Мен сизе Худайың мени ве сизи нәхили халас эдендиги барада язмагы җуда макул билйәрдим. Эмма муңа дерек Худайың Өз халкына бир гезекде мүдимилик табшыран иманы угрунда сизи гөрешмәге рухландырып язмагымың хас-да ваҗыпдыгына гөз етирдим.

⁴ Себәби кәбир худайсызлар огрынча араңыза сүмлүп гирдилер. Олар Худайың аҗайып мерхемети бизе азгынлык этмәге ыгтыяр берйәр дийип өвредйәрлер ве еке-тәк Хоҗайынымыз ве Реббимиз Иса Месихи рет эдйәрлер. Шейле адамларың җезасы гадымдан бәри язылып гойландыр.

⁵ Бу затларың әхлисини озал билйән хем болсаңыз, муны сизе ятлатмакчы болярын: Реб ысрайыл халкыны Мүсүр гулчулыгындан азат этди, эмма соңра иман этмедик адамлары ёк эдип ташлады.

⁶ Мертебелерини сакламан, месген тутан ерлерини терк эден перишделери хем Ол түмлүкде зынҗырлар билен эбедилик баглады. Олары элхенч кыямат гүнүне ченли шол ерде саклаяр.

⁷ Шейле-де Содом билен Гомораның ве оларың төверегиндәки шәхерлериң адамлары хем эдил шол перишделер ялы херекет этдилер, олар зынахорлыга көңүл берип, азгынчылыга йүз урдулар. Шонуң үчин олар эбеди отда янмак җезасыны чекип, хеммелере сапак болдулар.

⁸ Муңа гарамаздан, араңыза сүмлүп гирен бу адамлар гөрен дүйшлерине даянып, өз беденлерини харамлаярлар. Худайың хөкмүрованлыгыны рет эдйәрлер, гөкдәки перишделере сөгйәрлер.

⁹ Эмма хатда баш перишде Микайыл Мусаның җеседи барада иблис билен чекелешенде, иблисе гаршы сөгмәге милт этмеди. Гайтам, диңе: «Сени Реббиң Өзи язгарсын!» дийди.

¹⁰ Эмма бу дүйш гөрйән адамлар дүшүнмейән затларына сөгйәрлер. Олар эдил хайванлар ялы, өз угруна херекет эдип, ислән затларыны эдйәрлер, бу затлар хем олары хеләк эдйәр.

¹¹ Оларың халына вай! Олар Кабылың гөрелдесине эерйәрлер. Билгам ялы, пул үчин адамларың гөзүни гапярлар. Кора ялы баш галдырандыклары үчин хеләк болярлар.

¹² Бу адамлар сизиң үчин горкунчдыр, олар өз гарынларыны доюрмак үчин сизиң билен бир сачакда ийип-ичйәрлер. Шемал билен ковлан ягмырсыз булутлар кимин, мөвсүминде миве бермейән дарагтлар киминдирлер. Олар дүйбүнден гопарылып ташланандырлар, бүтинлей өлүдирлер.

¹³ Оларың шер ишлери буланык сув толкунлары ялы әшгәр боляр ве өзлери-де сергездан йылдызлар киминдир. Түм гараңкылык олар үчин эбедилик сакланяр.

¹⁴ Адам атадан соңра единҗи несил болан Ханок хем бу адамлар хакда шейле пыгамберлик эдипдир: «Ине, Реб сан-саҗаксыз, мүңлерче перишделери билен гелйәр.

¹⁵ Ол әхли адамзада казылык эдер, гүнә эден худайсызлары хөкүм эдер. Худайсызларың ярамаз этмишлерини ве Оңа гаршы күпүр гепләндиклери үчин олары җезаландырар».

¹⁶ Олар хемме затдан нәгиле болуп, зейренип йөренлердир. Диңе өз пис хөвеслерине эерйәндирлер; гопбамсы гүрләп, өз бәхбидини арап, икийүзлүлик эдйәндирлер.

Дуйдурышлар ве несихатлар

¹⁷ Сиз болса, эй, сөйгүли доганлар, Реббимиз Иса Месихиң ресулларының өңден айданларыны ядыңызда саклаң.

¹⁸ Олар сизе: «Дүнйәниң ахыркы гүнлеринде өз тен хөвеслерини канагатландырян яңсылайҗылар пейда болар» дийипдилер.

¹⁹ Булар сизиң араңыза бөлүнишик салып, өз ынсан дүшүнҗелерине гөрә яшаян адамлардыр ве Мукаддес Рухдан махрумдырлар.

²⁰ Эмма сиз, сөйгүли доганлар, мукаддес иманыңыза бил баглап, бири-бириңизе өвүт-үндев эдиң. Мукаддес Рухдан ылхамланып, дога-дилег эдиң.

²¹ Реббимиз Иса Месих Өз рехимдарлыгы аркалы сизи бакы яшайша говшурянча, Худайың сөйгүси билен яшамагы довам этдириң.

²² Шүбхеленйән адамлара рехим-шепагатлы болуң.

²³ Башгалары гелеҗекки җеза одундан халас эдиң. Кәбирлерине болса, Худайдан горкмак билен рехим эдиң, йөне хүшгәр болуң, оларың дурмушыны харама өврен гүнәни йигрениң.

Соңкы дога-дилеглер

²⁴ Имандан дәнмез ялы, Худай сизи горамагы ве шатлыкдан долдурып, Өз шөхратлы хузурына сизи бүтинлей мүйнсүз гетирмеги башаряндыр.

²⁵ Шонуң үчин Реббимиз Иса Месих аркалы еке-тәк Халасгәримиз Худая шан-шөхрат, гүйч-гудрат, хөкүмдарлык эзелден, хәзир ве бакы яр болсун! Омын.