Wagyz 8 - Мукаддес Китап

8‑нҗи бап

¹ Дана тай гелҗек бармы? Затларың манысыны ким билйәр? Пайхас ынсаның йүзүни нурландыряр, оңа мәхир берйәр.

Патыша гулак асың

² Худайың хузурында патыша садык болҗакдыгыңа ант ичендигиң үчин, онуң табшырыкларыны сакла.

³ Патышаның хузурындан чыкмага ховлукма, яман ишиң тарапдары болма, чүнки патыша ислән задыны эдйәндир.

⁴ Патышаның сөзи гүйчлүдир. Ким оңа: «Нәме эдйәрсиң?» дийип билер?

⁵ Табшырыгы берҗай эдйәне зелел етмез; дана адамың йүреги хачан нәме этмелидигини билйәндир.

⁶ Ынсаның дерди гаты агыр болса-да, хер бир ишиң өз мөврити бардыр.

⁷ Ол хакыкатдан нәме болҗакдыгыны билйән дәлдир; ким оңа нәме болҗакдыгыны айдып билер?

⁸ Ели сакламага хич кимиң гүйҗи етйән дәлдир, өлүм гүнүни сакламага-да хич кимиң гүйҗи етмез. Бу сөвешден гачып болмайшы ялы, пислик-де пис адамы өлүм гүнүнден халас эдип билмез.

Пислер ве догрулар

⁹ Мен буларың хеммесини гөрдүм, Гүнүң астында эдилйән әхли ише үнс бердим; бир адамың бейлекиниң үстүнден агалык этмеси онуң зыянынадыр.

¹⁰ Соңра мен пислериң җайлананыны гөрдүм: олар мукаддес ере гелип-гидердилер, эден писликлери үчин шәхерде тарыпланардылар. Бу-да бидерек.

¹¹ Яман ише гаршы хөкүмиң тиз чыкарылмаяндыгы үчин, ынсанларың йүреги яманлык этмәге тайындыр.

¹² Гүнәкәр йүз гезек яманлык эдип, өмрүни узалдян болса-да, мен ене Худайдан горкянларың говулык гөрҗекдигини билйәрин, чүнки олар Онуң хузурында горкярлар.

¹³ Эмма пис адам говулык гөрмез, көлегәниң узалышы ялы онуң өмри узалмаз, чүнки ол Худайың хузурында горкян дәлдир.

¹⁴ Ер йүзүнде эдилйән бир бидереклик бар: пислериң ишине мынасып болайҗак зат догры адамларың башына гелйәр; догры адамларың ишине мынасып болайҗак зат пислериң башына гелйәр. Мен бу-да бидереклик диййәрин.

¹⁵ Шонуң үчин мен леззет алмаклыгы макул гөрйәрин, чүнки Гүнүң астында ынсан үчин ийип-ичмекден ве леззет алмакдан говы зат ёк. Худайың Гүнүң астында берен өмрүниң бүтин гүнлеринде чекен зәхметинден ынсана хемра болҗак диңе шатлыкдыр.

¹⁶ Мен пайхасы билмеги, ынсаның гөзлериниң гиҗе-гүндиз укы гөрмән, ер йүзүнде эдйән ишини өвренмеги ниетиме дүвдүм.

¹⁷ Шейдип, Худайың әхли ишлерини гөрдүм. Гүнүң астында эдилйән ишлере дүшүнип болмаяр. Ынсан оны агтарҗак болуп, нәче сынанышса-да, тапмаз, хатда дана адам муны билйәндигини айтса-да, тапып билмез.