Wagyz 2 - Мукаддес Китап

2‑нҗи бап Леззет бидерекдир

¹ Өз-өзүме шейле дийдим: «Гел, сени леззет билен сынайын, леззет ал». Эмма бу-да бидерек болды.

² Гүлки барада: «Акмаклык», леззет барада: «Нәме пейда гетирйәр?» дийдим.

³ Бедениме шерап билен леззет бермеги, акмаклыга урмагы йүрегиме дүвдүм, йүрегим маңа энтегем пайхас билен ёл гөркезйәрди. Мен муны өз гысга өмүрлериниң довамында гөгүң астында эдерлери ялы, ынсанлар үчин нәмәниң ягшыдыгыны билмек үчин этдим.

⁴ Бейик ишлер этдим: җайлар гурдум, үзүм агачларыны экдим,

⁵ өзүме бакҗалар ве сейил багларыны эдиндим; оларда хер хили мивели агачлары экдим.

⁶ Өсүп отуран баглары сувармак үчин, ховузлар эдиндим.

⁷ Гуллардыр гырнаклар сатын алдым; өз өйүмде доглан гулларым барды, сүри-сүри мал-гарам барды. Олар менден өң Иерусалимде боланларыңкыдан көпди.

⁸ Өзүм үчин алтын, күмүш ве патышаларың, велаятларың хазыналарыны топладым. Эркекдир аял айдымчылары хакына тутдум. Ислендик эркегиң гөвнүне ярамлы гөзел гырнак аяллар эдиндим.

⁹ Шейдип, мен бейгелип, өзүмден өң Иерусалимде боланларың әхлисинден оздум. Пайхасым шонда-да мениң биленди.

¹⁰ Гөзлеримиң ислән задыны гайгырмадым; йүрегими хич бир леззетден махрум этмедим; калбым эден хер ишимден леззет алды. Бу чекен әхли зәхметимиң муздуды.

¹¹ Онсоң эллеримиң эден әхли ишлерине, чекен әхли зәхметиме серетдим. Ине, буларың бары бидерекди, салгыма чапмакды. Гүнүң астында хич бир пейдалы зат ёкды.

Акыллы-да, акылсыз-да унудылар

¹² Соңра мен үнсүми акылдарлыга, телбелиге ве акмаклыга тарап гөнүкдирдим. Патышаның ерине гелҗек адам эййәм эдилен ишлерден башга нәме эдип билер?

¹³ Ягтылыгың гараңкылыкдан бәхбитли болшы кимин, акылдарлыгың хем акмаклыкдан бәхбитлидигини билдим.

¹⁴ «Акыллының гөзлери башындадыр; акылсыз болса гараңкылыкда гезйәндир. Эмма хеммесиниң такдырының бир экенлигини билдим».

¹⁵ Онсоң мен өз-өзүме: «Акылсызың башына гелен мениң-де башыма гелер. Онда акыллы болмагымың пейдасы нәме?» Өз-өзүме: «Бу-да бидерек» дийдим.

¹⁶ Чүнки акыллы-да акылсыз кимин унудылар, гелҗекде хеммелер унудылар. Нәме үчин акыллы акылсыз кимин өлйәр?

¹⁷ Шонуң үчин дурмушы йигрендим, чүнки Гүнүң астында эдилйән ишлер маңа хасрат гетирди. Бары бидерек, салгыма чапмак.

¹⁸ Мен Гүнүң астында чекен әхли зәхметими йигрендим, чүнки мен бар газанҗымы өзүмден соң гелҗеге гоюп гитмели.

¹⁹ Онуң акыллы я-да акылсыз болҗакдыгыны ким билйәр? Муңа гарамаздан, олар Гүнүң астында пайхас билен чекен бүтин зәхметиме эелик эдерлер. Бу-да бидерек.

²⁰ Шейдип, мен Гүнүң астында чекен бүтин зәхметимден умыдымы үздүм.

²¹ Чүнки адам пайхас, билим ве уссатлык билен зәхмет чекйәр, йөне ол барыны хич бир зәхмет чекмедик башга адама галдырмалы боляр. Бу-да бидерек, улы адалатсызлык!

²² Ынсанлар Гүнүң астында чекен әхли зәхметинден, өзүне зор салмакдан нәме пейда тапяр?

²³ Оларың бүтин өмри дертден, зәхмети гуссадан долы; йүреги гиҗесине-де рахатланмаяр. Бу-да бидерек!

²⁴ Адама ийип-ичмекден ве чекен зәхметинден леззет алмакдан башга говы зат ёк. Эмма мунуң-да Худайдандыгына гөз етирдим.

²⁵ Чүнки ким Онсуз ийип, леззет алып билйәр?

²⁶ Чүнки Худай пайхасы, билими ве шатлыгы Өзүни разы эдене берйәндир. Гүнәли адама болса, Худайы разы эдене берсин дийип топламак, йыгнамак ишини берйәр. Бу-да бидерек, салгыма чапмак.