Wagyz 10 - Мукаддес Китап

10-нҗы бап

¹ Өли сиңеклериң атырчының ягыны порсадып заялайшы ялы, азаҗык акмаклык-да акылдарлыгы ве хорматы хараплаяндыр.

² Акыллының йүреги догрулыга тарап, акылсызың йүреги болса эгрилиге тарапдыр.

³ Акылсыз ёлда йөрәнде-де, дүшүнҗеси кемлик эдйәндир, ол акмакдыгыны хеммелере әшгәр эдйәндир.

⁴ Хөкүмдарың саңа гахары гелсе-де, ериңи ташлап гитме, чүнки мылайымлык улы языкларың үстүни өртйәндир.

⁵ Гүнүң астында ене-де бир яманлык гөрдүм. Бу хөкүмдар тарапындан гойберилйән сәвликдир:

⁶ Акмак ёкары ерлерде гоюляр, бай пес ерде отуряр.

⁷ Мен ат мүнйән гуллары, гуллар ялы пыяда йөрейән хөкүмдарлары гөрдүм.

⁸ Чукура оны газяның өзи гачяндыр; дивары дешйәни йылан чакяндыр.

⁹ Даш кесйәне дашлардан шикес етер; одун айырян өзүне ховп салар.

¹⁰ Эгер палта күтек болса, йүзи йителдилмесе, оңа көпрәк гүйч сарп этмели боляндыр. Даналык болса үстүнлиге элтйәндир.

¹¹ Эгер йылан овсунмаздан өң чакса, овсунчының пейдасы ёкдур.

¹² Акыллының сөзлери оңа хормат гетирер, акылсызың сөзлери болса оны хеләк эдер.

¹³ Дилиндәки сөзлери акмаклык билен башланып, яман телбелик билен гутаряр.

¹⁴ Акылсыз көп геплейәндир. Хич ким нәме болҗагыны билйән дәлдир. Ким оңа өзүнден соң нәме болҗакдыгыны айдып билер?

¹⁵ Акылсызың зәхмети оны ядадяндыр, хатда ол шәхере гидйән ёлы-да билйән дәлдир.

¹⁶ Эй, җуван патышалы, хөкүмдарлары эртирине мейлис гурян юрт, дат гүнүңе!

¹⁷ Шасы асылзада, хөкүмдарлары серхошлык үчин дәл-де, гүйчленмек үчин өз вагтында мейлис гурян юрт багтлыдыр!

¹⁸ Ялталык зерарлы үчек чөкйәндир, ишсиз эллер зерарлы өе сув гечйәндир.

¹⁹ Мейлис кейпи-сапа үчин эдилйәндир, шерап дурмуша шатлык берйәндир, пул хер мәтәчлигиң өвезини доляндыр.

²⁰ Патыша хатда ичиңден-де гаргама, өз ятян отагыңда бая гаргама, чүнки гөкдәки гуш хабар әкидер, ганатлы гуш сөзүңи етирер.